विश्वविख्यात नास्तिकले परमेश्वरमाथि विश्वास गरे

बिसौँ शताब्दीको पुर्वाद्धसम्म एन्टोनी फ्लु विश्वप्रसिद्ध नास्तिक थिए । दार्शनिक फ्लुले अक्सफोर्ड, योर्कजस्ता विश्वका नामी विश्वविद्यालयहरूमा पढाए । रिचार्ड डाउकिन्स, क्रिस्टोफर हिचेन्स र साम हेरिसजस्ता व्यक्तिहरू जसले धर्ममाथि आक्रमण गरेका थिए तिनीहरूको सूचीमा फ्लुको नाउँ पनि आउँछ । अविश्वासका प्रवक्ता थिए फ्लु । आफ्नो पुस्ताका प्रखर नास्तिक फ्लुले ख्रीष्टाब्द २००४ मा संसारलाई तिनछक पारिदिए, परमेश्वरको अस्तित्वमाथि विश्वास गरेको घोषणा गरेर । जीवनको अधिकांश समय नास्तिकवादको पक्षपोषकको रूपमा चिनिएका फ्लुले ८१ वर्षको उमेरमा परमेश्वरमाथि विश्वास गरे । २००७ मा प्रकाशित आफ्नो पुस्तक (देएर इज अ गड: हाउ द वल्र्ड मोस्ट नोटोरियस एथिइस्ट चेन्ज्ड हिज माइन्ड) मा तिनले नास्तिकवादबाट ईश्वरवादतर्फ भएको आफ्नो यात्रालाई उल्लेख गरेका छन् । केले तिनलाई नास्तिकवादप्रतिको जीवनभरिको आफ्नो अडानलाई त्याग्न उत्प्रेरित गर्‍यो ? तिनका आफ्नै शब्दहरूमा— “[विगत] ५० वर्षभन्दा बेसी लगाएर डीएनए अनुसन्धनबारे पत्ता लागेका खोजहरूले संरचनाको पक्षमा नयाँ र अत्यधिक शक्तिशाली तर्कका लागि सामग्रीहरू जुटाएका छन् ।” बिसौँ शताब्दीको पूर्वाद्र्धमा जन्मेका फ्लु २०१० मा ८७ वर्षको उमेरमा यस धरतीबाट बिदा भए । यसरी एक पटक विश्व हल्लाएका नास्तिकले वैज्ञानिक साक्षीको आधारमा परमेश्वरको अस्तित्वलाई स्वीकारे ।  

Leave Your Comments Here!

यहूदा इस्करियोतको मृत्यु कसरी भयो ? मत्तीको विवरणअनुसार यहूदा इस्करियोतले आत्महत्या गर्‍यो (मत्ती २७:१–५) भने प्रेरितको पुस्तकअनुसार त्यसको भुँडी फुट्यो (प्रेरित १:१८) । यी दुई ओटा खण्डलाई तुलनात्मक रूपमा अध्ययन गर्दा के यी बेमेल देखिँदैनन् र ?

यहूदा इस्करियोतको मृत्युको सम्बन्धमा मत्तीले लेखेका छन्, “तब चाँदीका ती सिक्काहरू मन्दिरमा फ्याँकेर त्यो गयो, र त्यसले झुण्डेर आत्महत्या गर्‍यो” (मत्ती २७:५) । त्यसको मृत्यु वरिपरिको क्षणको विषयमा प्रेरितको पुस्तकका लेखक डा. लूकाले प्रेरित पत्रुसको भनाइलाई यसरी अभिलिखित गरेका छन्, “त्यस मानिसले अधर्मको कमाइबाट एउटा जग्गा किन्यो, र उँधोमुन्टो भई खस्यो र त्यसको भुँडी फुटयो, र त्यसका सबै आन्द्रा–भुँडी निस्के” (प्रेरित १:१८) । बाइबल त्रुटिविहीन छ भन्ने ख्रीष्टियान शिक्षालाई यो प्रस्ट विरोधाभासले गलत साबित गर्छ भनी केही बाइबल आलोचकहरू निर्धक्कसँग बोल्न हिच्किचाउँदैनन् ।

येशू ख्रीष्टको जीवनी अध्ययन गर्ने व्यक्तिको लागि यहूदा इस्करियोत अपरिचित नाउँ होइन । सुसमाचारहरूमुताबिक त्यसले येशू अर्थात् आफ्ना गुरुलाई तिस ओटा चाँदीको सिक्कामा बेचिदियो । त्यसो गरेकोमा पछि त्यसलाई अत्यधिक पछुतो भयो र त्यसले आत्महत्यालाई नै अन्तिम उपचारको रूपमा देख्यो ।

यहाँ मत्ती र लूकाको विवरणलाई हामीले होसियारीपूर्वक पढ्नु आवश्यक छ । यहूदा खसेनन् भनेर मत्तीले भनेका छैनन् न त यहूदाले आफूलाई झुण्ड्याएनन् भनी लूकाले व्यक्त गरेका छन् । यहाँ एक जनाले एउटै वस्तुलाई कालो र अर्कोले सेतो भनेको अवस्था छैन । दुवै खण्डलाई ध्यान दिएर पढ्दा वास्तवमा ती खण्डहरू एक अर्काको अन्तर्विरोधी नभई परिपूरक छन् ।

यहूदाले आफैलाई हिन्नोमको बेँसीमाथि भएको पहरोको छेउमा झुण्ड्यायो भनी परम्परागत रूपमा विश्वास गरिएको छ । बेँसीको फेँददेखि त्यो चट्टानको भिर झण्डै चालिस फिटसम्म अग्लो छ, त्यो पनि ठाडै । यहूदाले आफूलाई आत्महत्याको लागि जुन रूखमा बाँधेको थियो त्यो सुकेको हाँगा परेकोले हावाको झोक्काको कारणले त्यो हाँगा भाँचियो वा डोरी चुँडेकोले त्यो भुइँमा पछारियो र परिणाम स्वरूप त्यसका आन्द्रा–भुँडी निस्के भन्ने व्याख्या त्यो भूगोलको संरचनासित पूर्णत: स्वाभाविक छ । सारांशमा भन्नुपर्दा, मत्तीले यहूदाको मृत्युको प्रयासको निम्ति त्यसले अपनाएको विधिलाई अभिलिखित गर्छन् भने लूकाले त्यसको आखिरी नतिजालाई ।  

Leave Your Comments Here!

येशूको विश्वव्यापी प्रभावबारे सुप्रसिद्ध भनाइहरू

दार्शनिकहरूका सबै प्रवचनहरू र नीतिज्ञहरूका सबै अर्तीहरूले भन्दा [येशू] ख्रीष्टको तिन वर्षे सक्रिय जीवनको सामान्य अभिलेखले मानव–जातिलाई आध्यात्मिक उन्नति गराउन र नरम पार्न बेसी काम गरेको छ ।

विलियम लेके, विख्यात ब्रिटिस इतिहासकार

मानव–जातिको बिचमा देखा परेका फलहरूलाई मापन गर्दा त्यो छोटो जीवन नै यस ग्रहमा जिउने सबैभन्दा प्रभावशाली जीवन बनेको छ । ... शताब्दीहरू बित्दै जाँदा त्यस जीवनको प्रभाव लोप हुँदै जानुको साटो झन् गहन हुँदै गएको छ । उहाँद्वारा दसौँ लाख मानिसहरू रूपान्तरित भएका छन् अनि तिनीहरूले उहाँको नमुनादायी जीवनलाई पछ्याउन थालेका छन् । ... देखा परेका नतिजाहरूलाई नाप्दा येशूको जन्म, जीवन, मृत्यु र पुनरुत्थान मानव–जातिको इतिहासका सर्वाधिक महत्त्वपूर्ण घटनाहरू हुन् । उहाँको प्रभावलाई मापन गर्दा येशू मानव इतिहासको केन्द्रिय पात्र हुनुहुन्छ ।

फिलिप स्काफ 

म एउटा इतिहासकार हुँ, विश्वासी होइनँ । नासरतका यी अकिञ्चन प्रचारक अपरिवर्तनीय रूपमा इतिहासको केन्द्र हुनुहुन्छ भनी एउटा इतिहासकारको नाताले मैले स्वीकार गर्नैपर्छ ।

                एच. जी. वेल्स

सुकरातले ४० वर्षसम्म सिकाए, प्लेटोले ५०, अरस्तुले ४० र येशूले केवल ३ वर्ष । तथापि प्राचीन संसारका यी तिन महानतम दार्शनिकहरूले १३० वर्षसम्म सिकाएको शिक्षाले पारेको प्रभावभन्दा ख्रीष्टको ३ वर्षे सेवा–कार्यको प्रभाव असीमित रूपमा श्रेष्ठतर छ ।

                अज्ञात

शताब्दीहरू बित्दै जाँदा साक्षीहरू यति प्रचुर भएका छन् कि इतिहासमा उहाँको प्रभावलाई मापदण्ड बनाउने हो भने येशू यस ग्रहमा बाँच्नुहुने सर्वाधिक प्रभावशाली व्यक्तित्व हुनुहुन्छ ।

                केनेथ स्कट लाटुरेट, इतिहासकार

ख्रीष्ट इतिहासकै सर्वाधिक प्रभावशाली व्यक्तित्वको रूपमा खडा हुनुभएको छ । निस्सन्देह संसारलाई रूपान्तरण गर्ने मानिसहरूको सूचीमा मोशा, बुद्ध र मोहम्मदका नाउँहरू समावेश हुन्छन् । तथापि यहूदी, बुद्ध र इस्लाम धर्ममा मोशा, बुद्ध र मोहम्मदले जुन ठाउँ ओगट्छन् ख्रीष्टियमतमा येशूले त्योभन्दा नितान्त फरक ठाउँ ओगट्नुहुन्छ । मोशा, बुद्ध र मोहम्मदले कहिल्यै पनि आश्चर्यकर्महरू गरे भनी दाबी गरेनन् । वास्तवमा तिनीहरूले आफूलाई कहिल्यै पनि मानिसभन्दा ठुलो प्राणीको रूपमा हेरेनन् । तिनीहरूले आफूलाई केवल परमेश्वरका सन्देशवाहकहरूको रूपमा हेरे । ख्रीष्ट मात्रै इतिहासमा एउटा यस्तो व्यक्तित्व हुनुहुन्छ जसले पुरै धर्मलाई आफ्नो व्यक्तित्ववरिपरि परिभाषित गर्नुभएको छ ।

दिनेश डिसुजा  

इतिहासका सन्त र हिरोहरू हामीबाट टाढा–टाढा भाग्दै छन् । र, इतिहासले तिनीहरूका कामहरूको अभिलेखलाई झनै साँघुरो पृष्ठमा सङ्कुचित पार्दै छन् । तर येशू ख्रीष्टको नाउँ, कार्यहरू र वचनहरूमाथि समयको कुनै ताकत छैन ।

विलियम ई. चानिङ

               

सतही दिमागहरूले ख्रीष्ट र साम्राज्यका संस्थापकहरूसाथै अन्य धर्मका देवताहरूको बिचमा समानता देखाए । त्यो समानता विद्यमान छैन । ख्रीष्टियमत र अन्य कुनै पनि धर्मको बिचको दुरी अनन्त छ ।

नेपोलियन बोनापार्ट, फ्रान्सका सम्राट्

परमेश्वर–मानवको रूपमा येशू ख्रीष्ट महानतम व्यक्तित्व हुनुहुन्छ । तसर्थ, उहाँको व्यक्तिगत प्रभाव यस धरतीमा बाँच्ने कुनै पनि मान्छेको भन्दा बढी छ ।

बर्नाड र्‍याम

येशू ख्रीष्ट सम्पूर्ण कालको असाधारण व्यक्तित्व हुनुहुन्छ । ... उहाँ संसारको ज्योति हुनुभयो । एउटा यहुदी भएको नाताले यसमा मैले किन गर्व नगर्ने ?

सोलेम आस, यहूदी लेखक

उन्नाइस शताब्दी आएर बितिसकेका छन् र आज उहाँ मानव–जातिको केन्द्रिय व्यक्तित्व हुनुहुन्छ र उहाँ प्रगतिको स्तम्भको अगुवा हुनुहुन्छ । मार्च पास गर्ने सम्पूर्ण सेनाहरू, सबै नौसेनाहरू, सबै संसदहरू र शासन गर्ने सबै राजाहरूलाई सँगसँगै राखिने हो भने पनि यस एकल जीवनले यस पृथ्वीमा जति शक्तिशाली ढङ्गमा प्रभाव पारेको छ त्यति तिनीहरूले पारेका छैनन् भन्दा पनि मैले उहाँलाई उचित अङ्क दिएको हुँदैन ।

अज्ञात

व्यक्तिगत रूपमा नासरतका येशूको बारेमा मानिसहरूले जस्तो सोचाइ र विश्वास राखे तापनि झण्डै बिस शताब्दीसम्म उहाँ पाश्चात्य संस्कृतिको इतिहासमा प्रबल व्यक्तित्व हुनुभएको छ । ... उहाँको जन्मबाट नै प्रायजसो मानव–जातिले पात्रोको आरम्भ गर्छन् । उहाँको नाउँ लिएर नै दसौँ लाखले सराप दिन्छन् भने उहाँकै नाउँमा दसौँ लाखले प्रार्थना चढाउँछन् ।

जारोस्लाम पेलिकान, विश्वचर्चित इतिहासकार

Leave Your Comments Here!