येशूको कन्याबाटको जन्मबारे केही भनाइहरू

हाम्रा परमेश्वर येशू ... पवित्र आत्माद्वारा ... मरियमको कोखमा गर्भधारण हुनुभयो ।

इग्नेसियस, एन्टिओखियाका बिशप

उहाँ आफै सर्वोच्च परमेश्वरका पुत्र हुनुहुन्छ जो पवित्र आत्माद्वारा देखिनुभयो; स्वर्गबाट ओर्लनुभयो अनि हिब्रू कन्याबाट जन्मेर देह धारण गर्नुभयो ।

अरिस्तिदेस

पिता परमेश्वरको एकलौटे पुत्र हाम्रा शिक्षक येशू ख्रीष्ट सम्भोगको परिणामस्वरूप जन्मनुभएन । ... परमेश्वरको शक्ति कन्यामाथि ओर्ली उनीमाथि छाया पारियो अनि उनी कन्या छँदै गर्भवती भइन् । ... किनभने परमेश्वरको शक्तिद्वारा कन्या भए तापनि उनी गर्भवती भइन् । ... परमेश्वरको इच्छाअनुसार उहाँका पुत्र येशू ख्रीष्ट कन्या मरियमबाट जन्मनुभएको छ ।

जस्टिन मार्टर, रक्षाशास्त्री

बाइबलको पुष्टिको बाबजुत पनि यदि हामी कन्याबाटको जन्मलाई स्वीकार गर्दैनौँ भने बाइबलको अधिकारलाई हामीले आँच आउन दिएका हुन्छौँ । र, यसका अन्य शिक्षाहरूलाई हामीले किन स्वीकार गर्नुपर्छ भन्नाका लागि सैद्धान्तिक रूपमा कुनै कारण हुँदैन । यसरी कन्याबाटको जन्मको इन्कारका आशयहरू यस शिक्षाभन्दा निकै परसम्म फैलन्छन् ।

मिलार्ड जे. एरिक्सन, लेखकसाथै ईश्वरशास्त्री

यसरी, किन ख्रीष्टियान मण्डलीले मानवीय पिताविना नै येशूको जन्मलाई विश्वास गर्‍यो भन्नुको कारण वास्तवमा उहाँ त्यसरी नै जन्मनुभएको थियो भन्ने स्वीकारको लागि राम्रो आधार छ ।

जे. ग्रेसाम माचेन, ईश्वरशास्त्री

सारा साक्षीले ख्रीष्टको आश्चर्यमय जन्मलाई प्रमाणित गर्छ ।

क्लेमेन्ट रोजर्स

कन्याबाटको जन्मलाई बाइबलमा स्पष्टत: सिकाइएको कारणले गर्दा मात्रै यो साँचो भएको होइन तर येशू ख्रीष्टको चरित्रसाथै मिसन अनि पतित संसारको निम्ति उद्धारबारे भएको परमेश्वरको महान् योजनासित यो तादात्म्य भएकोले यो साँचो भएको हो । ... यस्तो आश्चर्यकर्म असम्भव छ भनी बताउनु परमेश्वरको अस्तित्वलाई इन्कार गर्नु हो वा उहाँले आफ्नो सृष्टिमाथि नियन्त्रण गर्न सक्नुहुन्छ भन्ने कुरोलाई इन्कार गर्नु हो ।

हेन्री मोरिस, सृष्टिवादी वैज्ञानिक

Leave Your Comments Here.

मिसनरीको सुसमाचारद्वारा डरलाग्दो हत्याराको परिवर्तन

रोबर्ट मोफाट उन्नाइसौँ शताब्दीमा अफ्रिकामा मिसनरी भएर जाने प्रभुका साहसिला सेवक हुन् । तिनी विश्वविख्यात मिसनरी डेभिड लिभिङ्स्टोनका ससुरा थिए । दक्षिण अफ्रिकामा ५० वर्षभन्दा बेसी समय बिताएका मोफाटले उक्त देशको बेखुनास नामक आदिवासीको भाषामा बाइबललाई अनुवाद गरेका थिए । 

तिनले जुन ठाउँमा सुसमाचार लिएर गएका थिए त्यहाँ अफ्रिकानर नाउँ गरेको एक डरलाग्दो हत्यारा थियो । ऊ यति हिंसक थियो कि दक्षिण अफ्रिकी सहर केप टाउनका गभर्नरले उसलाई जीवित या मृतक फेला पारेको खण्डमा झन्डै पचार हजार रुपियाँ उपहार दिने घोषणा गरेका थिए । अफ्रिकानर र त्यसका मानिसहरू दक्षिण अफ्रिकाको त्रास बनेका थिए । जब रोबर्ट मोफाट अफ्रिकानरको जातिको लागि मिसनरी भई गए केप टाउनका मानिसहरूले तिनी जिउँदै फर्केर आउँछन् भनी कहिल्यै अपेक्षा गरेनन् । त्यसले मोफाटको खप्परलाई चिया पिउने भाँडो बनाउनेछ भनी सहरका मानिसहरूले बताए ।

तर मोफाटले परमेश्वरमाथि दृढ भरोसा राखे । उक्त जङ्गली जातिको बिचमा तिनले साहसपूर्वक सुसमाचारको सन्देशलाई बाँडे । उदेकको कुरो के भयो भने त्यही हत्यारा नै पहिलो विश्वासी बन्यो । पछि मोफाटले उसलाई आफूसितै केप टाउनमा लगे । त्यो हिंसक जङ्गली हत्यारालाई नम्र ख्रीष्टियान व्यक्तिमा परिवर्तन भएको देखेर उपनिवेशी शासकले आश्चर्य मान्दै भने, “कस्तो आश्चर्यकर्म ! यो त संसारको आठौँ आश्चर्य हो ।”    

Leave Your Comments Here.

प्रेरित ७:१५–१६ ले याकूबलाई शकेममा गाडिएको सङ्केत दिन्छ जब कि उत्पत्तिको विवरणले निश्चयतासाथ बताउँछ कि तिनी मम्रेनेरको मक्पेलाको खेतमा भएको ओडारमा गाडिए (उत्पत्ति ५०:१२–१३) । वास्तवमा याकूब कहाँ गाडिए ?

प्रेरित ७:१५–१६ ले बताउँछ, “याकूब मिश्रदेशमा गए, र त्यहीँ उनको देहान्त भयो, र हाम्रा पुर्खाहरूको पनि त्यहीँ नै देहान्त भयो । त्यसपछि तिनीहरूका मृत शरीर शकेममा लगे, र अब्राहामले शकेममा हमोरका छोराहरूबाट दाम तिरेर किनेको चिहानमा राखे ।” तर मोशाको विवरणअनुसार याकूबले मर्ने बेलामा आफ्ना छोराहरूलाई दिएको आज्ञालाई तिनीहरूले शिरोपर गरे, “तिन [याकूब] का छोराहरूले तिनलाई कनानसम्मै पुर्‍याए, र हित्ती एप्रोनसँग खेतसमेत अब्राहामले चिहान बनाउनलाई किनेको ओडार, अर्थात् मम्रेनेरको मक्पेलाको खेतमा भएको ओडारमा तिनलाई गाडे” (उत्पत्ति ५०:१३) । यी दुई ओटा विवरणहरूलाई तुलनात्मक रूपमा अध्ययन गर्दा याकूबको समाधि स्थलबारे प्रस्ट विरोधाभास देखिन्छ । केही बाइबल आलोचकहरूले स्तिफनसले यहाँ भुल गरेका छन् भन्नेसम्मको दुस्साहस गरेका छन् । तर होसियार अध्ययनले स्तिफनसको भनाइलाई गम्भीरतापूर्वक बुझ्नुपर्दोरहेछ भन्ने निष्कर्षतर्फ डोर्‍याउँछ ।

उत्पत्तिको पुस्तकले प्रस्टसँग बताउँछ कि अब्राहाम र तिनकी पत्नी सारा अनि इसहाक र तिनकी पत्नी रिबेका अनि याकूब र तिनकी पत्नी लेआ मम्रेनेरको मक्पेलाको खेतमा भएको ओडारमा गाडिए (उत्पत्ति ४९:२९–५०:१४) । प्रेरित ७:१५–१६ अनुसार याकूबलाई शकेममा गाडिएको जस्तो देखिए तापनि शकेममा गाडिएका लाशहरूमा तिनको लाश पर्दैन तर निश्चय नै योसेफ र तिनका दाजु–भाइहरूका लाशहरू भने पर्छन । योसेफको लाशलाई पहिले मिश्रमा नै राखियो (उत्पत्ति ५०:२६) तर तिनको अस्थिलाई पुन: शकेममा गाडियो (यहोशू २४:३२) । यो साँचो हो कि यहोशू २४:३२ ले योसेफको अस्थिलाई मात्र उल्लेख गर्छ र तिनका दाजु–भाइका शवहरूबारे केही पनि भन्दैन । पुरानो करार तिनीहरूको समाधि स्थलबारे मौन रहे तापनि स्तिफनसले पहिलो पटक आफ्नो भाषणमा उल्लेख गरे कि तिनीहरू शकेममा नै गाडिए । तब हामी तर्कसङ्गत यो निष्कर्षमा जान सक्छौँ कि प्रेरित ७:१६ मा उल्लिखित सर्वनाम “तिनीहरूका” ले अब्राहाम, इसहाक र याकूबलाई समावेश नगरी पद १५ को “हाम्रा पुर्खाहरू” तिर फर्की योसेफ र तिनका दाजु–भाइहरूलाई मात्र उल्लेख गर्छ ।  

Leave Your Comments Here.