प्राध्यापकको तर्कद्वारा नास्तिक विद्यार्थीलाई झट्का

एउटा मुख्य विश्वविद्यालयमा नीतिशास्त्र पढाउने प्राध्यापकले आफ्ना विद्यार्थीहरूलाई नीतिशास्त्रसम्बन्धी कुनै एउटा विषय रोजेर त्यसबारे शोधपत्र लेख्न अनुरोध गरे । विद्यार्थीहरूले आ–आफ्नो शोधपत्रलाई कारणसहित उचित प्रकारले समर्थन गर्नुपथ्र्यो । एक नास्तिकवादी विद्यार्थीले नैतिक सापेक्षवादको विषयमा धाराप्रवाह रूपमा लेख्यो । उसको तर्क थियो, “सबै नैतिक नियम सापेक्ष छन् । सच्याइ वा न्यायको कुनै निरपेक्ष मापदण्ड छैन । यो आ–आफ्नो विचारको कुरो हो । तपाईंलाई चक्लेट मन पर्छ, मलाई फलफुल मन पर्छ ।” कारणहरूले भरिपूर्ण शोधपत्रलाई उसले नीलो रङको फाइलमा राखेर आफ्ना प्राध्यापकलाई बुझायो । सम्पूर्ण शोधपत्र पढिसकेपछि प्राध्यापकले मुख पृष्ठमा लेखे, “असफल ! मलाई नीलो रङको फाइल मन पर्दैन ।”

त्यस विद्यार्थीले आफ्नो शोधपत्र फिर्ता पाइसकेपछि ऊ बेसरी रिसायो । ऊ प्राध्यापकको कार्यालयमा गयो र गुनासो गर्न थाल्यो, “यो उचित होइन, यो ठिक भएन, यसमा न्याय छैन । शोधपत्रमा लेखिएका कुराहरूको आधारमा तपाईंले अङ्क दिनुभएन ।”

प्राध्यापकले शान्त भएर जवाफ दिए, “मैले धेरै शोधपत्र पढेँ । सच्याइ छैन भनी बताउने शोधपत्र तिम्रो नै होइन र ?”

विद्यार्थीले जवाफ दियो, “हो ।”

प्राध्यापकले फेरि भने, “मैले न्याय गरिनँ, मैले ठिक गरिनँ, मैले उचित गरिनँ भनी तिमीले बताउनुको अर्थचाहिँ के हो त ?” प्राध्यापकले अझै थपे, “कसैलाई चक्लेट मन पर्छ भने कसैलाई फलफुल मन पर्छ भनी के तिम्रो शोधपत्रले तर्क गर्दैन र ?”

विद्यार्थीले पुन: जवाफ फर्कायो, “हो, त्यही नै मेरो राय हो ।”

प्राध्यापकले जवाफ दिए, “मलाई नीलो रङ मन पर्दैन, त्यसैले तिमी फेल भयौ ।”

अकस्मात् उसको दिमागमा केही नाच्न थाल्यो । उसले नैतिक मापदण्डहरूमा विश्वास गरेको रहेछ भनी उसले महसुस गर्न थाल्यो । कम से कम उसले न्यायमाथि विश्वास गर्दोरहेछ । नीलो रङकै कारणले प्राध्यापकले उसलाई फेल गराएको हुनाले उसले प्राध्यापकलाई अन्याय भयो भनी आरोप लगाउँदै थियो । एउटा सामान्य सत्यताले सापेक्षवादप्रति उसको पुरै मुद्दालाई पराजित गर्‍यो ।

Leave Your Comments Here.

गुड फ्राइडबारे तपाईंले जान्नुपर्ने १० ओटा सत्यताहरू

१. येशूको मृत्युको सम्झनामा वर्षको एक चोटि मनाइने उत्सवलाई नै गुड फ्राइडे भनिन्छ । येशू निर्दोष र पापरहित हुनुभए तापनि उहाँ आजभन्दा लगभग दुई हजार वर्षअगि मानव–जातिको पापको लागि क्रूसमा टाँगिनुभएको थियो । 

२. गुड फ्राइडे अङ्ग्रेजी Good Friday को लिप्यन्तरण हो । गुड फ्राइडेलाई अङ्ग्रेजीमा होली फ्राइडे वा ग्रेट फ्राइडे पनि भनिन्छ । यसलाई नेपालीमा “असल शुक्रबार” वा “शुभ शुक्रबार” भनी अनुवाद गरिएको पाइए तापनि यसलाई “पवित्र शुक्रबार” भनी अनुवाद गर्नु बढी मुनासिब हुन्छ । किनभने अक्सफोर्ड अङ्ग्रेजी शब्दकोशअनुसार गुड फ्राइडेमा उल्लिखित “गुड” शब्दको अर्थ हुन्छ, “पवित्र ।”  

३. येशूको क्रूसारोहणको वास्तविक मिति अज्ञात रहे तापनि क्रूसारोहणको समयमा देखा परेको अन्धकारको आधारमा खगोल विज्ञानअनुसार येशू ३ अप्रिल ३३ मा मर्नुभएको थियो भनी अनुमान गरिएको छ । 

४. नयाँ करारका अगिल्ला चार ओटा सुसमाचारहरू (मत्ती, मर्कूस, लूका र यूहन्ना) येशूको जीवनीबारे बताउने सबैभन्दा भरपर्दा र प्रारम्भिक स्रोतहरू हुन् । ती चार ओटै सुसमाचारले उहाँको मृत्युबारे सविस्तार वर्णन गरेका छन्— मत्ती २७:१–६६; मर्कूस १५:१–४७; लूका २३:१–५६ र यूहन्ना १८:२८–१९:४२ ।    

५. शुक्रबार बिहान ३ बजेतिर आफ्ना चेलाहरूसँगै येशू गेतसमनीको बगैँचामा प्रार्थना गरिरहनुहँदा उहाँ गिरफ्तार हुनुभयो । बिहान ९ बजे क्रूसमा टाँगिनुअगि उहाँले ६ ओटा जाँचको सामना गर्नुभयो । ६ घण्टा क्रूसमा बिताउनुभई उहाँले आफ्नो प्राण त्याग गर्नुभयो ।   

६. “पाम सन्डे” पछिको र “इस्टर सन्डे” अगिको शुक्रबार नै गुड फ्राइडे हो । प्रसिद्ध सौर्य पात्रोलाई आधार नमानी चन्द्र पात्रोलाई आधार मानिएकोले गुड फ्राइडेको मिति सालिन्दा फरक–फरक हुन्छ । गत साल अर्थात् ख्रीष्टाब्द २०१५ मा गुड फ्राइडेको मिति अप्रिल ३ मा परेको थियो भने यो वर्ष मार्च २५ मा परेको छ र आगामी वर्ष अप्रिल १४ मा पर्नेछ। 

७. अधिकांश पाश्चात्य राष्ट्रहरूसहित संसारका विभिन्न मुलुकहरूमा गुड फ्राइडेको दिन सार्वजनिक बिदा दिइन्छ । मानव–जातिको इतिहासमा यो एउटा अति नै गम्भीर दिन भएकोले यस दिनमा धेरै व्यापारहरू, स्कुलहरू र विश्वविद्यालयहरू पनि बन्द गरिन्छन् ।    

८. येशू क्रूसमा मर्नुहुँदा पुरानो करारमा सयौँ वर्ष पहिले भनिएका दर्जनौँ भविष्यवाणीहरू मात्र पुरा भएका थिएनन् तर येशू स्वयम्ले आफ्नो मृत्युको विषयमा गर्नुभएका भविष्यवाणीहरू पनि पुरा भएका थिए । पुरानो करारको यशैया ५३ अध्यायमा उहाँको मृत्युबारे सविस्तार भविष्यवाणी पाइन्छ । 

९. गुड फ्राइडेको दिनमा प्रभु–भोज खाईंदैन । प्रभु येशूले दिनुभएका दुई ओटा विधिहरूमध्ये एउटा हो— प्रभु–भोज । अर्कोलाई हामी बप्तिस्मा भन्छौँ । येशूको दोस्रो आगमन नभएसम्म मण्डलीलाई अक्सर प्रभु–भोज खान आज्ञा दिइएको छ ।  

१०. गुड फ्राइडेको दिनमा ख्रीष्टियानहरू उपवास बस्छन्; प्रभातफेरीमा सहभागी हुन्छन्; मण्डलीहरूमा विशेष सेवा सञ्चालन गरिन्छ जसमा येशूको मृत्युको वर्णन गर्ने भजनहरू, लघु नाटकसाथै वचन प्रस्तुत गरिन्छन् ।  

Leave Your Comments Here.

येशूको मृत्युमा देखा परेका तिन ओटा असाधारण दृश्यहरू

येशूको मृत्यु संयोग थिएन न त त्यो साधारण मृत्यु थियो । उहाँको मृत्यु हुँदा देखा परेका दृश्यहरूले पनि उहाँको मृत्यु असाधारण र अलौकिक थियो भनी पुष्टि गर्छन् । यहाँ हामी तिन ओटा त्यस्ता दृश्यहरूलाई ध्यान दिनेछौँ ।

१. मन्दिरको पर्दा टुप्पादेखि फेदसम्म दुई भाग भएर च्यातियो (मत्ती २७:५१) ।

येशू पृथ्वीमा हुनुहुँदा यरूशलेममा एउटा मन्दिर थियो । यहूदीहरूको जीवनमा मन्दिर अति नै आवश्यक अङ्ग थियो । येशूको मृत्यु हुँदा जुन पर्दा च्यातिएको थियो त्यसले मन्दिरको महा–पवित्रस्थानलाई पवित्रस्थानबाट अलग गथ्र्यो । यो पर्दा माथिदेखि तलसम्म च्यातिएको यथार्थताले यो परमेश्वरको कार्य हो भनी अङ्कित गर्दछ । पुरानो करारमा प्रधान पूजाहारी मात्र वर्षमा एक चोटि महा–पवित्रस्थानभित्र प्रवेश गर्न सक्थ्यो । प्रधान पूजाहारीले नै सारा इस्राएलीहरूका पाप परमेश्वरको सामु लैजाने गर्दथ्यो । साधारण इस्राएलीले आफै त्यसो गर्न पाउँदैनथ्यो । तर मृत्युको समयमा यो पर्दा च्यातिएकोले अब हरेक व्यक्ति सोझै परमेश्वरको उपस्थितिमा जान सक्छ भन्ने तथ्यलाई परमेश्वर उजागार पार्दै हुनुहुन्थ्यो (हिब्रू ४:१४–१६; १०:१९–२२) ।

यो पर्दा येशू ख्रीष्टको मानवीय शरीरको प्रतिरूप थियो (हिब्रू १०:२०) । पर्दा च्यातिएको तथ्यले पुरानो करारको सम्पूर्ण यहूदी व्यवस्थाको समाप्तिलाई पनि अङ्कित गर्दछ । सम्भवत: यहूदी पूजाहारीहरूले च्यातिएको पर्दाको मर्मत गरी तिनीहरू पुरानै व्यवस्थामा लागिरहे । यसको अर्थ तिनीहरूले परमेश्वरको नियमलाई उल्लङ्घन गरी तिनीहरूले मानवीय नियमलाई नै निरन्तरता दिए । तर ख्रीष्टाब्द ७० मा परमेश्वरको भयानक न्याय पर्‍यो र त्यो मन्दिर सदाको लागि नष्ट गरियो र आजको दिनसम्म त्यहाँ मन्दिर छैन । अब नयाँ करारको शिक्षाअनुसार हामी सबै नै पूजाहारी हौँ (१ पत्रुस २:९) र हामी सिधै परमेश्वरलाई बिन्ती चढाउन सक्छौँ ।

२. एउटा ठुलो भूकम्प गयो (मत्ती २७:५१) ।

भूकम्पलाई प्राकृतिक विपत्तिको रूपमा लिइने भए तापनि यहाँ यो भूकम्प येशूको मृत्युको नतिजास्वरूप देखिएको छ । सृष्टि परमेश्वरको अधीनमा छ भन्ने प्रस्ट सङ्केत हो यो । सृष्टिले उहाँको मृत्युमाथि विलौना गरेको सङ्केत हो यो । यो भूकम्प पक्कै पनि गलगथावरिपरि नै गएको हुनुपर्छ । उहाँको मृत्युको दर्शक बन्न आउने तमाम व्यक्तिहरूका लागि उहाँको मृत्यु साधारण मृत्यु होइन भन्ने टडकारो प्रमाणको रूपमा यो भूकम्प खडा छ । निश्चय नै, यसले येशूप्रति भएको धेरैको नकारात्मक दृष्टिकोणलाई परिवर्तन गरिदियो । यस्तो दृश्य देखेपछि कप्तान र उहाँलाई रुँग्नेहरूले निष्कर्ष निकालेका छन्, “साँच्चै, यिनी परमेश्वरका पुत्र रहेछन्” (मत्ती २७:५४) ।

३. चिहानहरू उघारिए, र सुतिगएका धेरै सन्तहरूका मृत शरीर जीवित भई उठे (मत्ती २७:५२) ।

यो तेस्रो घटनालाई मत्तीले मात्र अभिलिखित गरेका छन् । सम्भवत: यरूशलेममा भएका चिहानहरू उघारिए । हामीले यहाँ होसियारीपूर्वक पढेको हुनुपर्छ कि यी सन्तहरू येशूको मृत्युको समयमा बौरी उठ्नैबित्तिकै त्यही दिनमा पवित्र सहरमा प्रवेश गरी धेरैकहाँ देखा परेका छैनन् । तर येशूको मृत्युमा तिनीहरू जीवित भई उठे र उहाँको पुनरुत्थान भएपछि मात्र तिनीहरू पवित्र सहरमा प्रवेश गरी धेरैकहाँ देखा परे ।

यहाँ उल्लिखित पवित्र सहर यरूशलेम हो । यो सम्भव छ कि लाजरस, याइरसकी छोरी र नाइनकी विधुवाकी छोरीले पुन: शारीरिक मृत्युको सामना गर्नुपरेजस्तै यी सन्तहरूले पनि पुन: देह त्याग गरे । तर येशूले जस्तै यी सन्तहरूले पनि महिमित शरीर धारण गरी मृत्यु फेरि मृत्यु नचाखी यिनीहरू स्वर्ग गएको पनि हुन सक्छ ।  

Leave Your Comments Here.