ख्रीष्टियान मण्डलीलाई सताउने ३० जना उच्च पदाधिकारीहरूको डरलाग्दो अन्त्य

ख्रीष्टियान मण्डलीले हरेक शताब्दीमा सतावट भोग्दै आएको छ: पहिलो शताब्दीदेखि आज एक्काइसौँ शताब्दीसम्म । सतावट मण्डलीको एउटा हिस्सा नै बनेको छ । आदि मण्डलीले रोमबाट अकल्पनीय सतावट भोगेको थियो । इतिहासलाई नियाल्दा मण्डलीलाई सताउनेहरूले डरलाग्दो अन्त्य भोग्नुपरेको सत्यता पनि छर्लङ्गै छ । 

आदि ख्रीष्टियानहरूलाई तीव्र रूपमा सतावट गर्ने तिस जना रोमी सम्राट्हरू, राज्य प्रमुखहरू र उच्च ओहोदामा भएका अधिकारीहरूमध्ये एक जना पागल बने; एक जनाको आफ्नै छोरोद्वारा हत्या गरियो; एक जना अन्धा बने; एक जनाका आँखाहरू निस्किए; एक जनाको डुबेर मृत्यु भयो; एक जनाको घाँटी निमोठिएर निधन भयो; एक जना दुर्दशाग्रस्त निर्वासनमा मरे; एक जना अनौठो तरिकाले मरे; एक जना रोगले मरे; दुई जनाले आत्महत्या गरे; एक जनाले आत्महत्याको प्रयास गरे तर त्यसलाई पुरा गर्न अर्कोलाई डाक्नुपर्‍यो; पाँच जनाको आफ्नै मानिसहरू वा नोकरहरूद्वारा हत्या गरियो; अर्का पाँच जनाले दुर्दशाग्रस्त मृत्यु भोगे र आठ जना युद्धमा मारिए वा कैदी बनाइएर लगिएपछि तिनीहरूको हत्या गरियो ।

Leave Your Comments Here.

परमेश्वर अझै पनि परमेश्वर नै हुनुहुन्छ

ग्लेडिज अलवार्ड एक निर्भीक स्त्रीको नाउँ हो । उनी मनग्गे प्रतिकूलताका बाबजुत पनि चीनमा मिसनरी भई जाने साहसिक स्त्री हुन् । नगण्य क्षमता भएको व्यक्तिले पनि जब आफैलाई पवित्र आत्माको हातमा सुम्पन्छ तब उसले जीवनमा कसरी असाधारण काम गर्छ भन्ने ज्वलन्त उदाहरण हो ग्लेडिज । 

यो ख्रीष्टाब्द १९३८ को कुरो हो जुन बेला जापानी आक्रमणकारीहरूले ग्लेडिज बसेको याङ्गचेङ्ग सहरमाथि हमला गरे । उनले कैयौँ बालबालिकाहरूलाई पालेर राखेकी थिइन् । जापानीहरूले उनलाई जासुसी ठानेकाले उनलाई त्यहाँ बस्नु असुरक्षित थियो । मार्च १९४० मा आफूसँग भएका १०० जना केटाकेटीलाई लिएर उनी अर्को प्रान्तको पहाडी गाउँमा भागिन् ।

जोखिमपूर्ण यात्रामा एक बिहान ग्लेडिजले सुरक्षाको कुनै आशा देखिनन् । १३ वर्षकी सानी केटीले उनलाई यसो भन्दै सान्त्वना दिन खोजिन्, “तपाईंले हामीलाई भन्नुभएको उजाड–स्थानमा मोशाको कथालाई नभुल्नुस् ।” 

उनको जवाफ थियो, “हो मेरी प्रिय, तर म मोशा होइनँ ।”

ती सानी ठिटीले यस्तो वचन बोलिन् जसले हामीलाई पनि हौसला मिल्छ, “हो, तर परमेश्वर अझै पनि परमेश्वर नै हुनुहुन्छ ।”

एक महिनापश्चात् तिनीहरू सुरक्षितसाथ आफ्नो गन्तव्यमा पुगे । यति लामो र जोखिमपूर्ण यात्रामा पनि एक जना बच्चाको मृत्यु भएन ।

Leave Your Comments Here.

चिनियाँ पत्रकार झाङ्ग बोली पास्टर बने

तिनको नाउँ हो, झाङ्ग बोली । तिनी ख्रीष्टाब्द १९५९ मा छिमेकी मुलुक चीनमा जन्मेका थिए । तिन वर्षको कलेज जीवन सिद्याएपछि तिनले पत्रकारको रूपमा काम गर्न थाले । तिनले विभिन्न पुरस्कारहरू पनि जितेका छन् ।

ख्रीष्टाब्द १९८९ मा बोली विद्यार्थीहरूद्वारा नेतृत्व गरिएको एउटा अभियानमा सामेल भए । आन्दोलनसँग जोडिएको भोक हडतालको प्रबन्ध गर्न तिनले उल्लेखनीय भूमिका निभाए । सरकारी दृष्टिकोणबाट त्यो अभियान कुनै न कुनै रूपमा सरकारको विरुद्धमा भएकोले आन्दोलन हाँक्ने बोलीलगायत २१ जना अगुवाहरूको खोजी हुन थाल्यो । चिनियाँ सरकारले तिनीहरूलाई “मोस्ट वान्टेड” को सूचीमा राख्यो जसमा बोली सत्रौँ नम्बरमा थिए ।

यस्तो कठिन परिस्थितिमा बोलीले भगुवा जीवन बिताए र अन्त्यमा तिनी अमेरिका पुगे ।

१९९५ को ख्रीष्टमसको समयमा बोलीले परमेश्वरको बोलावटको महसुस गरे अनि तिनी एउटा बाइबल कलेजमा भर्ना भए । त्यस बेलादेखि तिनले प्रभु येशूको प्रचार गर्ने निधो गरेका छन् । १९९९ मा तिनी पास्टर बने र हाल ६७ वर्षका यी पाका पास्टर परमेश्वरको बोलावटप्रति विश्वसनीय छन् । चिनियाँ मण्डलीहरू, एसियाका दक्षिण–पूर्वमा रहेका क्षेत्रहरूसाथै उत्तर अमेरिकामा तिनी परिचित वक्ता हुन् । तिनी एस्केप फ्रम चाइना नामक पुस्तकका लेखक पनि हुन् ।

Leave Your Comments Here.