ख्रीष्टियमतबारे १० ओटा भनाइहरू (भाग २)

सूर्यको उदयमाथि विश्वास गरेझैँ म ख्रीष्टियमतमाथि विश्वास गर्दछु, मैले यसलाई देखेकोले गर्दा मात्रै होइन तर यसद्वारा मैले हरेक कुरोलाई देखेकोले गर्दा पनि हो ।

सी. एस. लेविस, साहित्यकारसाथै ख्रीष्टियान रक्षाशास्त्री

यदि ख्रीष्टियमत झुटो छ भने यसको कुनै महत्त्व छैन र यो साँचो छ भने यो असीमित रूपमा महत्त्वपूर्ण छ । यो अलि–अलि महत्त्वको भने हुन सक्दैन ।

सी. एस. लेविस, साहित्यकारसाथै ख्रीष्टियान रक्षाशास्त्री

ख्रीष्टियमतले जत्तिकै अन्य कुनै धर्म, दर्शनशास्त्र, शिक्षा, राष्ट्र, अभियान वा कुनै पनि कुरोले झनै असल बनाउन संसारलाई परिवर्तन गरेको छैन ।

पावल एल. माइर, इतिहासकारसाथै उपन्यासकार 

मैले ख्रीष्टियमतलाई अङ्गाले किनकि येशू ख्रीष्ट एक पात्र, व्यक्तित्व हुनुहुन्छ भनी म विश्वस्त भएँ । मैले उहाँ; उहाँको बुद्धि; उहाँको प्रेम र उहाँको सर्तविनाको प्रेमलाई प्रेम गरेँ ।

मोसाब हसिन युसुफ, लेखक

यदि ख्रीष्टियमत असत्य छ भने यो जतिसुकै मद्दतदायी भए पनि कुनै इमान्दार मानिसले यसलाई विश्वास गर्न चाहँदैन । तर यो सत्य छ भने हरेक इमान्दार मानिसले यसलाई विश्वास गर्न चाहन्छ यद्यपि यसले उसलाई कत्ति पनि मद्दत नगरोस् ।

सी. एस. लेविस, साहित्यकारसाथै ख्रीष्टियान रक्षाशास्त्री

म बौद्धिक रूपमा ख्रीष्टियमतको खण्डन गर्न तम्सिएँ तर सकिनँ । त्यसपछि म बाइबल सत्य छ र येशू ख्रीष्ट परमेश्वरका पुत्र हुनुहुन्छ भन्ने निष्कर्षमा पुगेँ । 

जोस म्याकडोल, ख्रीष्टियान रक्षाशास्त्री, वक्तासाथै लेखक

ख्रीष्टियमतको अपिलको प्राथमिक स्रोत येशू हुनुहुन्थ्यो अर्थात् उहाँको अवतार, उहाँको जीवन, उहाँको क्रूसारोहण र उहाँको पुनरुत्थान । 

केनेथ स्कट लाटुरेट, इतिहासकार

वास्तविक ख्रीष्टियमतलाई दुई ओटा आज्ञामा सारांशमा ल्याउन सकिन्छ: परमेश्वरलाई प्रेम गर्नुस् र मानिसहरूलाई प्रेम गर्नुस् ।

जोएस मेएर, ख्रीष्टियान लेखिकासाथै वक्ता

ख्रीष्टियमत पाश्चात्य सभ्यताको वास्तविग जग र आधार हो ।

दिनेस दिसुजा, राजनीतिक टिप्पणीकारसाथै लेखक

ख्रीष्टियमत एउटा ऐतिहासिक धर्म हो । यसले विशिष्ट दाबीहरू गर्दछ जुन जाँच पडतालको लागि खुला छन् ।

लि स्ट्रोबेल, रक्षाशास्त्री, लेखकसाथै, पत्रकार

Leave Your Comments Here.

स्टालिनकी छोरीले साम्यवादलाई त्यागी परमेश्वरमा विश्वास गरिन्

जोसेफ स्टालिन बिसौँ शताब्दीको तेस्रो दसकदेखि ख्रीष्टाब्द १९५३ मा आफ्नो मृत्यु नहोउञ्जेलसम्म सोभियत युनियनका नास्तिकवादी अगुवा थिए । स्कुलहरूमा विशेष नास्तिकवादी शिक्षा लादेर, धर्मको विरुद्धमा व्यापक प्रचार–प्रसार गरेर, विश्वासीहरूको विरुद्धमा त्रासदीपूर्ण गतिविधिहरू गरेर तिनको सरकारले नास्तिकवादलाई बढावा दिएको थियो । 

स्टालिनका दुई छोरा र एक छोरी थिए । एउटा छोरो ख्रीष्टाब्द १९४१ मा नाजीहरूद्वारा कब्जा गरिए र पछि बन्दी शिविरमा उसको मृत्यु भयो । अर्को छोरो दुव्र्यसनमा फसी ४० वर्षको उमेरमा यस धरतीबाट बिदा भएर गयो ।

स्टालिनको स्भेटलना अलिलुएभा नाउँ गरेको एक जना छोरी थिए । उनले ख्रीष्टाब्द १९६७ मा साम्यवाद र रुसलाई त्यागी सनसनी मच्चाइदिइन् । धेरै मानिसहरू तिन छक खाए । उनले किन साम्यावादलाई त्याग गरेकी थिइन् भन्ने पत्रकारहरूको प्रश्नमा उनले न्युयोर्कमा बताइन्, “ह्दयमा परमेश्वरलाई नअङ्गाली जिउन असम्भव भएको पाएँ मैले । कसैको सहायता वा प्रचारविना म आफै नै त्यो निष्कर्षमा पुगेँ । त्यो एउटा ठुलो परिवर्तन थियो किनकि त्यस क्षणदेखि उसो साम्यवादका मुख्य–मुख्य सिद्धान्तहरू मेरा लागि कुनै महत्त्वका रहेनन् । म यहाँ आत्मविकासको खोजीको लागि आएको छु जसलाई रुसमा धेरै लामो समयदेखि इन्कार गरिएको थियो ।”

स्भेटलनाले सङ्घर्षपूर्ण जीवन बिताइन् । रुसलाई छाड्न उनले त्यसको राजधानी सहरमा भएका दुई छोरीलाई पनि छाड्नुपर्‍यो र उनले महसुस गरिन् कि त्यहाँ फर्केर जान उनको लागि असम्भव भइसकेको थियो ।  

Leave Your Comments Here.

के अन्नका बाला टिपेर खाँदा येशूका चेलाहरूले शबाथ–दिनको उल्लङ्घन गरे (मत्ती १२:१–८) ?

मत्ती १२:१–२ मा लेखिएको छ, “त्यस समय येशू शबाथमा अन्नका खेतहरूबाट भएर जाँदैहुनुहुन्थ्यो । उहाँका चेलाहरू भोकाएका थिए र अन्नका बाला टिप्दै खान लागे । तर फरिसीहरूले यो देखेर उहाँलाई भने, ‘हेर्नोस्, तपाईंका चेलाहरू शबाथमा जे गर्नु अनुचित छ, त्यही गर्दछन्’ ।” के शबाथमा अन्न टिपेर खाँदा फरिसीहरूले आरोप लगाएझैँ येशूका चेलाहरूले शबाथको उल्लङ्घन गरे त ?

भोकाएको बेलामा शबाथको दिनमा अन्नको बाला टिपेर खाँदा येशूका चेलाहरूले परमेश्वरको व्यवस्थाको उल्लङ्घन गरेनन् । तर निश्चय नै तिनीहरूले फरिसीहरूको व्यवस्था भने तोडे । परमेश्वरको व्यवस्थामा फरिसीहरूले आफ्ना परम्पराहरू थपेका थिए जसको लागि येशूले तिनीहरूलाई बारम्बार हप्काउनुभयो (मत्ती ५:४३ र १५:६ लाई पनि हेर्नुस्) । पुरानो करारअनुसार शबाथ–दिनमा दया र आवश्यक कामहरू गर्न मिल्थ्यो । यस खण्डमा येशूका चेलाहरूले अन्नको कटनी गरिरहेका छैनन् बरु तिनीहरूले केवल अन्नको बाला टिपेर खाँदै छन् जुन कार्य गर्न पुरानो करारको व्यवस्थाले अनुमति दिएको थियो (व्यवस्था २३:५) ।

शबाथको विषयमा येशूले भन्नुभएको छ, “शबाथ–दिन मानिसको लागि बनेको हो, मानिस शबाथ–दिनको निम्ति होइन” (मर्कूस २:२७) । उहाँ नै शबाथको प्रभु हुनुहुन्छ भनेर पनि उहाँले दाबी गर्नुभएको छ । येशूको भनाइको अर्थ यही हो कि शबाथ उच्चतम नियम थिएन किनकि न्याय, दयाजस्ता विषयहरू उच्च कोटीमा पर्छन् (मत्ती २३:२३ लाई हेर्नुस्) । येशू जो परमेश्वरको पुत्र हुनुहुन्छ उहाँ शबाथको नोकर हुनुहुन्थेन, उहाँ त यसको मालिक हुनुहुन्थ्यो । उहाँले यसको सृजना गर्नुभयो र उहाँले चाहनुभएको खण्डमा यसलाई बद्लन सक्नुहुन्थ्यो जस्तो उहाँले पछि गर्नुभयो ।

यसरी, हामी देख्छौँ कि फरिसीहरूले येशूका चेलाहरूलाई गलत अभियोग लगाएका थिए । येशू र उहाँका चेलाहरू होइन तर फरिसीहरू गलत थिए ।            

Leave Your Comments Here.