“परमेश्वर येशू ख्रीष्ट” लेखिएको शिलालेख फेला पर्‍यो

ख्रीष्टाब्द २००५ मा इस्राएलको मगिद्दोमा एउटा प्राचीन मण्डलीको भुइँ पत्ता लाग्यो जुन एक्काइसौँ शताब्दीकै एउटा विस्मयकारी पुरातात्त्विक खोज साबित भयो । मगिद्दोस्थित झ्यालखानाको आकार बढाउनको लागि पुरातत्त्वविद्हरू कैदीहरूसँगै  मिलेर खन्ने क्रममा अकस्मात् फेला पारिएको यस भुइँको क्षेत्रफल ५१२ वर्ग फिट रहेको छ । थप उत्खनन गर्दा अन्य थुप्रै शिलालेखहरू फेला पारिए जसमध्ये एउटा शिलालेख अत्यधिक महत्त्वपूर्ण छ जसमा येशूलाई “परमेश्वर येशू ख्रीष्ट” भनिएको छ । यो शिलालेखलाई ख्रीष्टाब्द तेस्रो शताब्दीको मिति दिइएको छ जसको अर्थ हुन्छ कि यो लगभग १,७०० वर्ष पुरानो लेखोट हो ।

ख्रीष्टाब्द ३१३ भन्दा पहिले ख्रीष्टियान बन्नु गैरकानुनी थियो । रोमी साम्राज्यले ख्रीष्टियानहरूलाई खुल्लमखुल्ला आराधना गर्न र आफ्नो विश्वासको अभ्यास गर्न निषेध गरेको थियो । ख्रीष्टियानहरूले लुकीछिपी येशूलाई परमेश्वरको रूपमा आराधना चढाउने गर्थे । 

आदि मण्डलीले येशूलाई परमेश्वरको रूपमा पुजेका थिए र यो पछिल्लो आविष्कार होइन भनी यस खोजले पुष्टि गरेको छ । इस्राएलका सिमानाहरू र भूमध्यसागर वरिपरिका क्षेत्रहरूमा ख्रीष्टियान विश्वास फैलिसकेको थियो र यसलाई स्वीकार गरिएको थियो भनेर पनि यस आविष्कारले प्रमाणित गर्दछ । 

Leave Your Comments Here.

क्षमाबारे २१ ओटा भनाइहरू

जसरी क्षमाविना प्रेम हुँदैन त्यसै गरी प्रेमविना क्षमा हुँदैन ।

ब्रायन्ट एच. म्याकगिल, लेखकसाथै वक्ता

मेरो लागि क्षमा भनेको तपाईंले मलाई चोट पुर्‍याउनुभएकोले तपाईंलाई चोट पुर्‍याउने मेरो अधिकारलाई त्याग गर्नु हो ।

अज्ञात

क्षमा दिनु भनेको कैदीलाई स्वतन्त्र पारी त्यो कैदी आफै हो भनी आविष्कार गर्नु हो ।

लुइस बी. स्मिडेस, लेखक, नीतिज्ञसाथै ईश्वरशास्त्री

क्षमा प्रेमको उच्चतम र सबैभन्दा सुन्दर रूप हो । बदलामा, तपाईंले नाप्न नसकिने शान्ति र खुसी पाउनुहुन्छ ।

रोबर्ट मुलर

कमजोरहरूले कहिल्यै क्षमा दिन सक्दैनन् । क्षमा बलवान्हरूको गुण हो ।

महात्मा गान्धी, अगुवा 

क्षमाले विगतलाई बदल्दैन तर निस्सन्देह यसले भविष्यलाई फराकिलो बनाउँछ ।

पावल बोसे

क्षमा दिन नसक्नेले त्यस्तो साँघुलाई भाँच्छ जुन साँघुलाई ऊ आफैले पार गर्नुपर्ने हुन्छ ।

जर्ज हर्बट, ईश्वरशास्त्री, कविसाथै वक्ता

तपाईंलाई चोट पुर्‍याउने सबैलाई क्षमा दिनुस्, तिनीहरूका निम्ति होइन तर आफ्नै लागि ।

हरिट नेल्सन

क्षमा सबैभन्दा मिठो बदला हो ।

आइज्याक फ्राएडम्यान

जीवन क्षमामा विद्यमान जोखिमपूर्ण यात्रा हो ।

नर्मन कजिन्स, लेखक, प्राध्यापकसाथै पत्रकार

क्षमा क्रियाकलाप र स्वतन्त्रताको लागि साँचो हो ।

हन्नाह अरेन्ड

क्षमा वीरहरूको सद्गुण हो ।

इन्दिरा गान्धी, राजनीतिज्ञ

रिसले तपाईंलाई झन् सानो बनाउँछ जब कि क्षमाले तपाईंलाई बढ्न बाध्य गराउँछ ।

चेरी कार्टर स्कट, लेखिका

क्षमा विश्वासजस्तै हो । तपाईंले यसलाई जागृत तुल्याइरहनुपर्छ ।

मासोन कुली

कसरी क्षमा दिने भनी निर्भीकहरूले मात्र जान्दछन् । ... डरछेरुवाले कहिल्यै क्षमा दिँदैन । यो उसको स्वभावमा छैन ।

लाउरेन स्टर्न, उपन्यासकारसाथै सेवक

क्षमा दिनुस्, तिनीहरू क्षमाको लागि योग्य भएको कारणले गर्दा होइन तर तपाईं शान्तिको लागि योग्य भएको कारणले गर्दा ।

अज्ञात

हामीले क्षमा दिने क्षमतालाई विकास गरी यसलाई कायम राख्नुपर्छ । जससँग क्षमा दिने शक्ति छैन उसँग प्रेम गर्ने शक्ति पनि हुँदैन ।

मार्टिन लुथर किङ्ग जुनियर, पास्टर, अभियन्तासाथै मानवतावादी 

तपाईंका शत्रुहरूलाई क्षमा दिनुस् तर तिनीहरूका नाउँ भने कहिल्यै नबिर्सनुस् ।

जोन एफ. केनेडी, पैँतिसौँ अमेरिकी राष्ट्रपति 

गल्ती गर्नु मानवीय हो भने क्षमा दिनु ईश्वरीय हो ।

अलेक्ज्यान्डर पोप, कवि

परमेश्वरले हामीलाई क्षमा दिनुहुन्छ । ... क्षमा नदिने म को हुँ र ?

अलान पाटोन, लेखकसाथै अभियन्ता

क्षमा रोजाइ हो तर यो विकल्प भने होइन ।

जोएल अस्टिन, प्रचारक, लेखकसाथै पास्टर

९३ वर्षका वृद्धले येशूमाथि विश्वास गरे

येशू ख्रीष्टमाथि विश्वास गर्न कुनै पनि उमेर उपयुक्त छ । जुनसुकै उमेरको वृद्ध वा वृद्धाले पनि उहाँमाथि भरोसा गर्न सक्छ । येशूको दायाँ र बायाँ टाँगिएका दुई जना अपराधीहरूमध्ये एक जनाले भनेका थिए, “हे येशू, तपाईं आफ्नो राज्यमा आउनुहुँदा मलाई सम्झनुहोस् ।” यो तिनको जीवनको आखिरी घडी थियो । तरै पनि येशूमाथि भरोसा गर्न ढिलो भएको थिएन । त्यसैले, येशूले तिनलाई भन्नुभयो, “साँच्चै म तिमीलाई भन्दछु, आजै तिमी मसित स्वर्गलोकमा हुनेछौ” (लूका २३:४३) । यहाँ एक जना यस्तै मानिसको कथा छ । 

जेफ स्ट्राटोनले अमेरिकाको इन्डियाना प्रान्तमा पर्ने इभान्सभाइल नाम गरेको सहरमा पास्टरको सेवा गर्दै थिए ।

९३ वर्ष पुगेका वृद्ध मानिसलाई भेट गर्न पास्टर जेफलाई बोलाइयो । ती पाका मानिसको नाउँ अडोल्फ अल्लेन थियो जसलाई क्यान्सर लागेको थियो । तिनी जँडयाहा थिए । पहिलो भेटघाटमा ती वृद्धले पास्टर जेफलाई हेरेर सोधे, “आफ्नो जीवन एक किसिमले गुजारेर मर्ने बेलामा स्वर्ग लैजानुहोस् भनी परमेश्वरलाई बिन्ती गर्नु न्यायोचित हुन्छ र ?”

झण्डै एक मिनेट सोच विचार गरेपछि पास्टरले भने, “अडोल्फ, यो न्यायोचित हुँदैन । तर हाम्रो सौभाग्य नै हो कि तपाईं र मेरो लागि परमेश्वर न्यायोचित हुनुहुन्न ।”

पास्टर जेफले ती पाका मानिसलाई उद्धारको योजनाबारे बताए अनि ९३ वर्षका ती वृद्ध मानिसले आफ्नो शिर झुकाई आफ्नो ह्दयमा येशू ख्रीष्टलाई निमन्त्रणा दिए ।

Leave Your Comments Here.