बाइबलको वचनले एउटा कैदीलाई पास्टरमा रूपान्तरण गर्‍यो

तिनी अमेरिकामा जन्मेका थिए । ११ वर्ष पुगेपछि तिनले चुरोट तान्न थाले र रक्सी पिउन सुरु गरे । तिनी विश्वविद्यालयबाट निष्कासित गरिए । खराबभन्दा खराब मानिसहरूसित तिनको सङ्गत हुन पुगेको थियो ।

किशोर अवस्था नाघेपछि तिनको जीवनले दुव्र्यसनी, निराशा र हिंसाको टाकुरा छोएको थियो । तिनले आफूलाई मात्र घृणा गर्थेनन् तर तिनीभन्दा राम्रो देखिने जोसुकैलाई पनि । बारम्बार झगडामा सामेल हुनु तिनको आदत नै बनेको थियो । जीवनदेखि निराश भएर धेरै पटक तिनले आत्महत्या गर्ने कोसिस नगरेका पनि होइनन् तर ती सबै प्रयास असफल बने ।

हत्याको आरोप लागेका तिनी पक्रिए र झ्यालखानामा हालिए । थुनामा पर्दा तिनी केवल २१ वर्षका थिए । तिनमा कुनै आशा थिएन न त तिनका सङ्गीहरू थिए न त तिनको परिवार नै ।

कारागारमा दिनहरू बित्दै थिए । एक दिन तिनले झ्यालखानामा नै एउटा बाइबल फेला पारे । तिनले पहिले कहिल्यै बाइबल पढेका थिएनन् । तिनले बाइबल पढ्न सुरु गरे र येशू र उहाँको प्रेमको विषयमा सिके ।

मत्ती ५:४ मा येशूले भन्नुभएका वचनहरू (धन्य शोक गर्नेहरू, किनभने तिनीहरूले सान्त्वना पाउनेछन्) ले तिनलाई सान्त्वना दिए । तिनले आफ्नो जीवनमा पहिले कहिल्यै त्यस्तो सान्त्वना, शान्ति र साँचो प्रेमको महसुस गरेका थिएनन् । तिनले जीवनमा पहिलो पटक प्रार्थना गरे र परमेश्वरलाई आफ्नो जीवनमा आउन निमन्त्रणा दिए ।

तिनले पिता परमेश्वरको यस्तो प्रेमको महसुस गर्न पाएका थिए कि तिनी आत्माको गहिराइबाट रुन थाले । तिनी सदाको लागि बद्लिए । तिनले परमेश्वरलाई पछयाउने सङ्कल्प गरे । तिनले बाँकी जीवन उहाँको चरणमा सुम्पिदिए ।

परमेश्वरको अनुग्रहद्वारा पछि तिनी जेलमुक्त भए । तिनी शारीरिक रूपमा मात्रै फुक्क भएनन् तर आत्मिक रूपमा पनि ।

तिनी विश्वासी बनेर मात्र रहेनन् । परमेश्वरको बोलावटलाई आदर गर्दै तिनी पास्टर बने । तिनले बिहे गरे । केही वर्षभित्रमा नै तिनको दर्द र दु:खकष्टको जीवन आनन्द र शान्तिको जीवनमा रूपान्तरण भयो । तिनको नाउँ हो— जोन क्रेनर । 

यसरी बाइबलले एउटा कैदीलाई पास्टरमा रूपान्तरण गरिदियो ।

Leave Your Comments Here.

चिन्ह मागेका मछुवाले विमानबाट खसालिएको बाइबल हात पारे

नेनेट्स रुसको उत्तरी भागमा बसोबास गर्ने एक आदिवासी जातिको नाउँ हो । यी आदिवासीहरूले सिकार गर्नुकासाथै माछा मार्ने काम गर्थे । यो एक जना आदिवासीले अनुभव गरेको अनौठो घटना हो ।

यो वर्षौंअगिको कुरो हो । रुसको साइबेरियामा नेनेट्स आदिवासी जातिको एक जना मछुवा थिए । तिनी खानाको खोजीमा गएका थिए । कुनै ईश्वरले तिनको आवाज सुनून् भनी तिनले ईश्वरको पुकारा गरे । तिनले जवाफ स्वरूप एउटा चिन्ह पनि मागे ।

ती मछुवाले प्रार्थना सकेको केही समय बित्न नपाउँदै आकाशबाट तिनको नजिकै एउटा बाइबल खस्यो । तिनी परमेश्वरको वचनको प्रति लिएर आफ्नो गाउँमा फर्के र तिनको भनाइ थियो, “मैले चिन्ह पाएँ ।” ती मछुवा एउटा मण्डलीमा उपस्थित भए जहाँ नेनेट्स जातिका ३० जना ख्रीष्टियान सङ्गति गर्थे । 

त्यो बाइबल आकाशबाट कसरी खसेको रहेछ त ? ती मछुवाले चिन्ह प्राप्त गरेको दिनमा रुसको सलेकहार्ड नामक सहरबाट एउटा हेलिकप्टर उडेको कुरा ती गाउँलेहरूलाई थाहा थिएन । त्यस विमानमा दुई जना सरकारी कर्मचारीहरूले खाँचोमा परेका ती गाउँलेहरूलाई केही राहत ल्याएका थिए । तिनीहरू आकाशमा उड्दै गर्दा तिनीहरूले विमानभित्र भएका सामानहरू बन्दोवस्त गरे । एक जनाले अर्कोलाई भन्यो, “यी खानाका बाकसहरू त ठिकै छन् तर हामीलाई यी पुस्तकहरूको के खाँचो ?” त्यसैले, एक जना अधिकारीले झ्यालबाट केही बाइबलहरू फ्याँक्न थाले । ती खसालिएका बाइबलहरूमध्ये एक प्रति ती मछुवाको नजिकै खस्न पुगेको थियो । 

  

Leave Your Comments Here.

आत्महत्या गर्न कोसिस गरेका १७ वर्षका किशोर बाइबलको वचनद्वारा बद्लिए

१७ वर्षका ती किशोर नास्तिक थिए । तिनी अस्पतालको बेडमा पस्रिरहेका थिए । तिनले विष सेवन गरेर आत्महत्या गर्ने प्रयास गरेको भए तापनि भाग्यवश: नमरेर तिनलाई त्यहाँ ल्याइएको रहेछ । तिनी कुराकानी गर्ने अवस्थामा थिएन यद्यपि तिनले सुन्न भने सन्थे । कोही एक जनाले तिनकी आमाको हातमा बाइबल थमाइदियो । छोरोको लागि आमाले चर्को सोरमा यूहन्ना १४:१९ को वचनलाई पढिन्, “म जीवित भएको हुनाले, तिमीहरू पनि जीवित रहनेछौ ।” जीवित भन्ने शब्दले किशोरको ह्दयलाई छोयो । तत्काल तिनले आफ्नो जीवन येशूमा समर्पित गरे, “हे येशू, यदि तपाईंले नै यो जीवन दिनुहुन्छ भने म यो चाहन्छु । मलाई यो अस्पतालको शैय्याबाट कुशलसाथ बाहिर लैजानुस् । सत्यताको खोजीमा म हर सम्भाव्य प्रयास गर्नेछु भनी म प्रतिज्ञा गर्दछु ।”

येशूले तिनलाई अस्पतालबाहिर मात्र ल्याउनुभएन तर तिनी त संसारभरि नै परिचित प्रचारकसाथै लेखक कहलाइएका छन् । तिनको नाउँ हो— रबी जकरिया ।

ख्रीष्टाब्द १९४६ मा छिमेकी मुलुक भारतमा जन्मेका रबी वर्तमान समयका प्रखर ख्रीष्टियान प्रचारकसाथै रक्षाशास्त्री (अपोलोजिस्ट) हुन् । २० वर्षको उमेरमा तिनी आफ्नो परिवारसँगै क्यानडा बसाइँ सरे । ७० वर्ष पुगिसकेका रबी सुसमाचार सुनाउँदै ७० भन्दा बेसी मुलुकहरू पुगिसकेका छन् । झण्डै साँढे दुई दर्जन कृतिका लेखक तिनी प्रभु येशू ख्रीष्टका पक्का भक्त हुन् ।

Leave Your Comments Here.