“पिता र म एक हौं” (यूहन्ना १०:३०) भन्ने येशूको भनाइको अर्थ के हो ?

येशू पृथ्वीमा हुनुहुँदा उहाँले केही कठिन भनाइहरू व्यक्त गर्नुभयो जसलाई बुझ्नको लागि कहिलेकाहीँ हामी मौलिक भाषासम्म पुग्नु पर्ने हुन्छ । यसका अतिरिक्त, खण्डको सन्दर्भलाई बुझ्न पनि नितान्त आवश्यक हुन्छ । 

हिउँदको समय थियो । यहूदीहरू मन्दिर समर्पणको चाडको लागि यरूशलेममा भेला भएका थिए । तिनीहरू येशूको पहिचानको बारेमा प्रस्ट भइसकेका थिएनन् अर्थात् येशू पुरानो करारमा प्रतिज्ञा गरिनुभएको मसीह अर्थात् ख्रीष्ट हुनुहुन्थ्यो वा हुनुहुन्थेन भन्ने विषयमा तिनीहरू अन्योलमा नै थिए । तसर्थ, तिनीहरूले येशूलाई प्रश्न गरे, “कहिलेसम्म तपाईं हामीलाई दोधारमा राख्नुहुन्छ ? तपाईं ख्रीष्ट हुनुहुन्छ भने हामीलाई स्पष्ट भनिदिनुहोस्” (यूहन्ना १०:२४) । आफ्नो व्याख्याको अन्त्यमा येशूले जवाफ दिनुभयो, “पिता र म एक हौं” (यूहन्ना १०:३०) । यस कठिन भनाइको अर्थ के हो त ?

एउटा सम्भावना यो हो कि पिता परमेश्वर र पुत्र परमेश्वर “एक र उही” हुनुहुन्छ । सरल भाषामा भन्नुपर्दा, पिता नै येशू हुनुहुन्छ र येशू नै पिता हुनुहुन्छ । यसको अर्थ यो पनि हुन्छ कि येशूले पृथ्वीमा सेवा–कार्य गर्नुहुँदा यो सारा विश्वको रेखदेख गर्न स्वर्गमा कोही हुनुहुन्थेन । नयाँ करारलाई ग्रिक भाषामा लेखिएकोले ग्रिक भाषाको व्याकरणलाई हेर्नु उपयुक्त हुन्छ । यदि येशूले यस्तो अर्थ दिन चाहनुभएको थियो भने शब्द “एक” पुलिङ्गमा हुनुपथ्र्यो । तर यो शब्द (ग्रिक व्याकरणमा) नपुंसकलिङ्गमा छ । तसर्थ, यो अवधारणा बेठिक छ ।

दोस्रो विकल्पलाई हेरौँ । नपुंसकलिङ्गको अर्थ “सहमतीमा” वा “एकतामा” पनि हुन सक्छ । अर्थात् येशूले पिताको इच्छामुताबिक काम गर्दै हुनुहुन्थ्यो भन्ने भनाइसित यो केही हदसम्म मेल खान्छ । तर यो व्याख्या खण्डको सन्दर्भको विपरीत छ । यदि येशूको भनाइको अर्थ यस्तो थियो भने तिनीहरूले उहाँलाई ढुङ्गाले हान्ने प्रयास गर्दैनथ्ये किनकि पिता परमेश्वरको सहमतीमा हुनु तिनीहरू आफैले चाहेको कुरो थियो । तसर्थ, सन्दर्भको आधारमा यो दोस्रो सम्भावना पनि उपयुक्त देखिँदैन ।

जब येशूले “पिता र म एक हौं” भन्नुभयो यहूदीहरू कति धेरै रिसाएका थिए भनी ठिक पछिल्लो पदले अभिलिखित गर्दछ, “यहूदीहरूले उहाँलाई हानौं भनी फेरि ढुङ्गा उठाए” (यूहन्ना १०:३१) । यहूदीहरूको यस्तो प्रतिक्रियाबाट हामी सजिलैसित बुझ्दछौँ कि तिनीहरूको दृष्टिकोणमा येशूले ईश्वर–निन्दा गर्दै हुनुहुन्थ्यो । त्यसैले तिनीहरूले जवाफ दिए, “असल कामको लागि हामी तिमीलाई ढुङ्गाले हान्दैनौं, तर ईश्वर–निन्दा गरेको कारणले, किनकि तिमी मानिस भएर पनि आफैलाई परमेश्वर तुल्याउँछौँ” (यूहन्ना १०:३३) । पुरानो करारको व्यवस्थाअनुसार ईश्वर–निन्दा गर्ने मानिसलाई ढुङ्गाले हानेर मार्ने आदेश दिइएको थियो (लेवी २४:१६) । येशूको उक्त भनाइबाट उहाँले आफैलाई परमेश्वर तुल्याउँदै हुनुहुन्थ्यो भनी यहूदीहरूले प्रस्ट रूपमा बुझे । त्यसकारण, यहाँ उल्लिखित “एक” को अर्थ हुन्छ, “सार” अर्थात् येशू र पिता बराबरीमा हुनुहुन्छ । पितासित भएका सबै गुणहरू येशूसित छ । येशू मानव चोलामा आउनुभएको परमेश्वर हुनुहुन्छ । 

  

Leave Your Comments Here.