के सतावटले ख्रीष्टियान विश्वासको फैलावटलाई कम गर्न सक्छ ? इतिहासले भन्छ, सक्दैन

धेरै रोमी सम्राट्हरूले ख्रीष्टियमतलाई निमिट्यान्न पार्ने कोसिस गरे । तीमध्ये एक थिए— डायोक्लिसन । तिनले ख्रीष्टाब्द २८४–३०५ सम्म शासन गरेका थिए । ख्रीष्टियान विश्वासलाई निर्मूलन पार्न तिनले घातक आक्रमण गरे । तिनले क्रूरतापूर्वक कैयौँ ख्रीष्टियानहरूको ज्यान लिए; कैयौँ बाइबल धर्मशास्त्र नष्ट पारे; मण्डली भवनहरू भत्काइदिए; धेरै ख्रीष्टियानहरूलाई जबरजस्ती खानीहरूमा काम गर्न बाध्य पारे र स्त्रीहरूलाई वेश्यागमनमा होमिदिए । तिनले निकालेको घोषणामुबताबिक ख्रीष्टियानहरू सेवाको लागि जम्मा हुन नमिल्ने भयो । धेरै विश्वासीहरू भूमिगत बने । सम्राट्लाई लाग्यो कि सतावटको कारणले ख्रीष्टियानहरू मासिए । त्यसैले तिनले एउटा पदक निकाले जसमा लेखिएको थियो, “ख्रीष्टियान विश्वास नष्ट भएको छ र रोमी देवताहरूको पूजाको पुनस्थापना गरिएको छ ।”

तर केही वर्षपछि कन्स्टेन्टाइन रोमको सम्राट् बने जसले ख्रीष्टियमतलाई राष्ट्रिय धर्मको रूपमा उभ्याइदिए । कन्स्टेन्टाइन महान्लाई रोमको पहिलो ख्रीष्टियान सम्राट्को रूपमा उल्लेख गरिएको पाइन्छ ।

यसरी केही वर्षअगि मात्रै ख्रीष्टियमतलाई विनाश गरिएको दाबी गरिएको भए तापनि त्यस दाबीको केही वर्ष बित्न नपाउँदै ख्रीष्टियान विश्वास राष्ट्रिय धर्मको रूपमा स्थापित भएको थियो । न ख्रीष्टियान विश्वासलाई निमिट्यान्न पार्न सकियो न यसको धर्मशास्त्रलाई जस्तो बाइबलमा लेखिएको छ, “घाँस ओइलाउँछ, फूलहरू झरिहाल्छ, तर हाम्रा परमेश्वरको वचन सधैँभरि अटल रहनेछ” (यशैया ४०:८) ।     

Leave Your Comments Here.