उनको नाउँ हो, भर्जिनिया प्रोडान । युरोपको दक्षिण-पूर्वमा अवस्थित साम्यवादी मुलुक रोमानियामा उनको जन्म भएको थियो । रोमानियाका प्रथम राष्ट्रपति निकोलाई चाउसेस्कुको तानाशाही शासनकाल (ख्रीष्टाब्द १९७४-१९८९) मा जन्मेका भर्जिनिया वकिल बनिन् । उनी लेखिकासाथै मानव अधिकारको पक्षमा वकालत गर्ने वकिल हुन् ।
भर्जिनियाले प्रभु येशूलाई ह्दयदेखि अङ्गालेपछि उनी साम्यवादी सरकारको कठपुतली बन्न छाडिन् । जस्तोसुकै मूल्य चुकाउनु परे तापनि सत्यताको पक्षमा अडिग रहने निर्णय लिइन् उनले । परिणामतः उनी चाँडै नै सरकारको तारो बन्न पुगिन् ।
एक रातको कुरो हो । अदालतमा लामो समय बिताएपछि भर्जिनियाकी कानुनी सहयोगी मिरुनाले भनिन्, “एक जना ठुलो जिउ भएका मानिस तपाईंसित एउटा मुद्दाको बारेमा छलफल गर्न तपाईंलाई पर्खंदै छन् ।”
ती मानिस भर्जिनियाको टेबुल अगाडि बसे । तिनले बिस्तारै आफूले लुकाएर ल्याएको बन्दुक निकाले र भने, “तपाईंलाई दिइएका चेताउनीहरूलाई ख्याल गर्नबाट तपाईं चुक्नुभएको छ । म त्यस विषयलाई सधैँको लागि एकै पटकमा खत्तम पार्न यहाँ आएको हुँ ।” तिनले जारी राखे, “म यहाँ तपाईंलाई मार्न आएको हुँ ।”
भर्जिनियाका हात काँप्न थाले । चिउँडो थरथर भयो । उनको मनमा एउटा तस्बिर नाच्न थाल्योः भोलिपल्ट बिहान उनका सहयोगी आएर उनको मृत शरीरलाई अफिसको भुइँमा पस्रिरहेको देखिन् ।
कोठामा भर्जिनिया र उनलाई मार्न आउने व्यक्ति मात्र थिए । तथापि त्यहाँ अरू कोही पनि हुनुहुन्थ्योः उनले विश्वास गरेका परमेश्वर । परमेश्वरका प्रतिज्ञाहरूलाई स्मरण गर्दै उनले मनमनै प्रार्थना गर्न थालिन् । उहाँका आत्माले उनको आतङ्कित ह्दयमा शान्तिको सास फुकिदिनुभयो । त्यसपछि उनले एउटा सन्देश प्राप्त गरेको अनुभूति गरिन्ः सुसमाचार सुनाऊ ।
घृणाले भरिपूर्ण ती मानिसको आँखापछाडि भर्जिनियाले परमेश्वरको सृष्टि देखिन् । तिनमा अमरणशील आत्मा थियो र येशू ख्रीष्टमा प्रदर्शित परमेश्वरको प्रेमलाई तिनले पनि जान्नु आवश्यक थियो । उनले भनिन्, “परमेश्वरले तपाईंलाई यहाँ राख्नुभएकोले तपाईं यहाँ हुनुहुन्छ र परमेश्वरले तपाईंलाई जाँच गर्नुभएको छ । तपाईं परमेश्वरमा रहनुहुन्छ कि मानिसको इच्छा अर्थात् पूजा गरेको चाहने तपाईंका मालिक राष्ट्रपति चाउसेस्कुको इच्छामा ? परमेश्वरले तपाईंलाई छनौट गर्ने स्वतन्त्र इच्छा दिनुभएको छ ।”
ती मानिसका आँखामा सकारात्मक परिवर्तन देखा पर्यो भने भर्जिनियामा निश्चयता बढ्यो । उनले जारी राखिन्, “सत्यता यही हो, कि हामी सबै भ्रष्ट भएका छौँ र परमेश्वरबाट तर्केर गएका छौँ ।” तिनले टाउको हल्लाए । “हामी सबै पापी हौँ र हाम्रो पापले हाम्रो भविष्यको निधो गरेको छ”, उनी भन्दै गइन्, “तर शुभ खबर यो हो, कि क्रुसमा येशू ख्रीष्टको बलिदानद्वारा परमेश्वरले हामी हरेकको लागि एउटा मार्ग तयार पार्नुभएको छ ।”
उनले भन्दै गइन् । अन्ततः, ती मानिसले आफ्नो निधारमा हात पुर्याउँदै भने, “तपाईं सही हुनुहुन्छ । मलाई यहाँ पठाउने मानिसहरू सन्काहा छन् । निश्चय नै मलाई ख्रीष्टको खाँचो छ ।” तिनले प्रतिज्ञा गरे, “ख्रीष्टमा गुप्त भाइको रूपमा म तपाईंको मण्डलीमा आउनेछु । म तपाईंका शक्तिशाली परमेश्वरलाई पुज्नेछु ।”
सुसमाचारको शक्तिले हत्या गर्न आउने ती मानिसको ह्दयमा १८० डिग्रीको बद्लाउ ल्यायो । हत्यारा हुन आएका तिनी सन्त बनी त्यहाँबाट बिदा भए । पछि तिनी सेमिनारीमा भर्ना भए । तिनले सत्यतालाई पत्ता लगाए जसको बारेमा बताउन तिनी फेरि कहिल्यै डराएनन् ।
