जस्टिन मार्टर: दोस्रो शताब्दीका सर्वाधिक महत्त्वपूर्ण रक्षाशास्त्री

जस्टिन मार्टर दोस्रो शताब्दीका सर्वाधिक महत्त्वपूर्ण रक्षाशास्त्री (अपोलोजिस्ट) थिए । ख्रीष्टियान विश्वासलाई व्यवस्थित र तर्कसङ्गत रूपमा प्रस्तुत गर्ने व्यक्तिलाई रक्षाशास्त्री भनिन्छ । आफ्ना केही शिष्यहरूसँगै सहिद भएका जस्टिनलाई ख्रीष्टियान जगत्ले सन्तको रूपमा श्रद्धा गर्छ । तिनका अधिकांश कृतिहरू हराएर गएका छन्, केवल तिन ओटा सुरक्षित छन् । जस्टिन रक्षाशास्त्री, दार्शनिक र लेखक थिए जो सहिद बने ।   

जस्टिनको जन्म प्यालेस्टाइनको सामरियामा भएको थियो, अन्यजाति परिवारमा । बाल्यकालमा राम्रै शिक्षा हासिल गरेका जस्टिन दार्शनिक प्लेटोको दर्शनशास्त्रबाट प्रभावित थिए । तिनी एफिससमा छँदा एक जना प्रौढ ख्रीष्टियान व्यक्तिबाट निकै प्रभावित भए जसलाई तिनले समद्रीतटमा संयोगवश: भेटेका थिए । पुरानो करारका यहूदी अगमवक्ताहरूले मसीहको बारेमा बताएका भविष्यवाणीहरू येशूको जीवनमा पुरा भएका छन् भनी ती वृद्धले बताउँदा जस्टिन छक्क परे । ख्रीष्टाब्द १३२ मा तिनले आफ्नो जीवन येशूमा सुम्पे अर्थात् तिनी ख्रीष्टियान भए । तर तिनी प्लेटोवादबाट पूर्णत: मुक्त हुन भने सकेनन् ।

तिनका तिन ओटा कृतिहरू यस प्रकार छन्:

• फस्ट अपोलोजी: रोमी सम्राट् एन्टोनियस र धर्मपुत्रको रूपमा पालिएका तिनका सन्तानहरूलाई सम्बोधन गरिएको यस कृतिमा जस्टिनले ख्रीष्टियान दर्शनको वकालत गरेका छन् । तिनको पहिलो र दोस्रो अपोलोजी ख्रीष्टियान रक्षाशास्त्रका प्रारम्भिक कृतिहरूमध्येमा पर्छन् । 
• सेकेन्ड अपोलोजी अफ जस्टिन मार्टर: प्राचीन रोमको राष्ट्रिय परिषद्लाई सम्बोधन गरिएको यस कृतिमा लेखकले ख्रीष्टियानहरूका विरुद्धमा लगाइएका अभियोगहरूको खण्डन गरेका छन् ।
• डायलग विथ ट्राइफो: जस्टिन र ट्राइफो नाउँ गरेको यहूदी रब्बीबिच भएको संवाद हो यो । ख्रीष्टियमत सबै मानिसहरूका लागि एउटा नयाँ व्यवस्था हो र येशू नै यहूदीहरूले अपेक्षा गरेको मसीह हुनुहुन्छ भनी प्रमाणित गर्न कोसिस गरिएको छ यसमा ।

करिब ख्रीष्टाब्द १०० मा जन्मेका जस्टिन १६५ मा सधैँका लागि येशूको काखमा पुगेका थिए । 

Leave Your Comments Here!