यहोराम उज्जियाहका पिता नभए तापनि किन मत्तीले “यहोराम उज्जियाहका पिता” थिए भनी अभिलिखित गरे (मत्ती १:८) ?

मत्ती १:८ अनुसार “यहोराम उज्जियाहका पिता” हुन् । तर १ इतिहास ३:११ मुताबिक यहोराम अहज्याहका पिता हुन् । कुनचाहिँ विवरण सही हो त ?

मत्ती १ अध्यायले येशूका वैध पिता योसेफद्वारा उहाँको वंशावलीलाई प्रस्तुत गर्दछ । मत्तीले प्रस्तुत गरेको येशूको वंशावलीको विवरणलाई पुरानो करारको अभिलेखसित तुलना गरेर हेर्दा छर्लङ्ग हुन्छ कि मत्तीले यहोराम र उज्जियाहका बिचमा भएका तिन जना व्यक्तिको नाउँलाई छुटाएका छन् ।

मत्ती १:८                              १ इतिहास ३:११–१२

यहोराम                                   यहोराम

......                                        अहज्याह

......                                        योआश

......                                        अमस्याह

उज्जियाह                             उज्जियाह (जसलाई अजर्याह पनि भनिन्छ)

किन यस्तो त ? के मत्तीले भुल गरेका हुन् त ? कदापि होइन । नेपाल बाइबल सोसाइटीद्वारा प्रकाशित पवित्र बाइबलले मत्ती १ अध्यायमा फलानो फलानोका पिता थिए भनेर अनुवाद गरे तापनि ग्रिक र अङ्ग्रेजी बाइबलले फलानोले फलानोलाई जन्माए अर्थात् फलानो फलानोका छोरा थिए भनी उल्लेख गर्छन् । यसले अर्थमा भिन्नता नपार्ने भए तापनि यहाँ अङ्ग्रेजी अनुवादलाई हेर्नु मुनासिब नै हुन्छ: Joram begot Uzziah.

बाइबलमा जसरी “पुत्र” शब्दको अर्थ “नाति” पनि हुन सक्छ त्यसै गरी “बिगट” (जन्माए) को अर्थ “का पूर्वज बने” भन्ने पनि हुन सक्छ । तब यो प्रस्ट छ कि यहोराम उज्जियाहका पिता थिएनन् बरु पुर्खा थिए । यहूदी वंशावलीहरूमा नाउँ छुटाउनु असामान्य थिएन । मत्तीले ख्रीष्टको पूर्ण वंशावलीलाई उल्लेख गर्दैनन्, तर सङ्क्षिप्त वंशावलीलाई ।

मत्तीले किन तिन जना राजाको नाउँ छुटाएका होलान् भनेर यहाँ मनन गर्नु जायज नै हुन्छ । अहज्याह, योआश र अमस्याह यहूदाका तिन राजाहरू थिए जसले क्रमश: १ वर्ष, ४० वर्ष र २९ वर्ष शासन गरे (२ राजा ८:२६; १२:१; १४:१) । यी तिन राजाले यहोराम र उज्जियाहको बिचमा राज्य गरेका थिए । मत्तीले तिनीहरूका नाउँ वंशावलीको सूचीमा समावेश नगर्नुको कारण तिनीहरूको शासन अवधि हुन सक्दैन न त मत्तीलाई प्रतिलिपि गर्दा दृष्टिभ्रम भयो भन्न नै सकिन्छ । ती राजाहरूको दुष्टताको कारणले गर्दा पनि होइन किनकि तीभन्दा पनि दुष्ट राजाहरू (जस्तै: मनश्शे र अमोन) तिनको सूचीमा अटाएका छन् । पवित्रता झल्काउने वंशावलीलाई प्रस्तुत गर्नु मत्तीको उद्देश्य होइन । अहज्याह तिनकी आमापट्टिबाट दुष्ट रानी ईजेबेलको नाति पथ्र्यो त्यसैले आहाब र ईजेबेललाई दिइएको सराप तेस्रो पुस्तासम्म फैलियो भनी एउटा प्राचीन व्याख्याले बताउँछ । यो विचार घतलाग्दो भए तापनि अपर्याप्त छ किनकि अन्यजाति स्त्रीहरू पनि मसीहको प्रत्यक्ष पुस्ता बनेका छन् । मत्तीले तिन ओटै समूह (अब्राहामदेखि दाऊदसम्म, पदहरू २–६; दाऊददेखि निर्वासनसम्म, पदहरू ६–११ र निर्वासनदेखि येशूसम्म, पदहरू १२–१६) मा १४/१४ ओटा नाउँ प्रस्तुत गर्न चाहेकाले जानाजानी ती तिन अनुक्रमिक राजाहरूको नाउँलाई आफ्नो सूचीमा समावेश नगरेको हुनुपर्छ । तेस्रो समूहमा पनि केही नाउँहरू समावेश नगरी १४ जनाको नाउँ मात्र उल्लेख भएको यथार्थताले यस कारणलाई पुष्टि गर्छ ।    

Leave Your Comments Here!