जोस म्याकडोल: ख्रीष्टियमतलाई झुटो साबित गर्न तम्सेका व्यक्ति ख्रीष्टियान विश्वासको रक्षकमा परिवर्तित

कुनै एक दिन बातचितको क्रममा जोस म्याकडोलले एक जना केटीलाई सोधे, “तपाईंको जीवन केले परिवर्तन गर्‍यो ? किन तपाईंको जीवन अन्य विद्यार्थी र शिक्षकहरूको भन्दा फरक छ ?”

तिनले जीवनमा कहिल्यै कल्पना नगरेको उत्तर आयो, “येशू ख्रीष्ट ।”

म्याकडोलले तुरुन्तै जवाफ फर्काए, “येशू ख्रीष्ट ! त्यो फोहोरको पोको मलाई नदिनुस् । धर्म, बाइबल र मण्डलीदेखि म वाक्क भइसकेको छु ।”

ढिलो नगरी केटीले जवाफ दिइन्, “महासय, मैले ‘धर्म’ भनिनँ, तर येशू ख्रीष्ट ।” केटीको उत्साह र दृढ निश्चयतादेखि म्याकडोलले आफ्नो धारणाप्रति खेद प्रकट गरे ।

पछि म्याकडोलका मित्रहरूले तिनलाई ख्रीष्टियमतका दाबीहरूलाई जाँच गर्न चुनौती दिए । सुरुमा तिनले यस चुनौतीलाई ठट्टामा लिए पनि तिनीहरूको जोडले गर्दा तिनले यसलाई स्वीकार गरे । बौद्धिक वृत्तमा ख्रीष्टियमत कुनै पनि हालतमा टिक्दैन भन्ने तिनको ठम्याइ थियो । बौद्धिक रूपमा ख्रीष्टियान धर्म झुटो छ भनी पुष्टि गरेर दिखाइदिन एउटा गतिलो किताब लेख्ने अठोट गरे तिनले । ख्रीष्टियमत एउटा छल हो भनी भरपर्दा स्रोतहरू जुटाई प्रमाणित गर्न तिनी अमेरिका र युरोपभरि चाहारे ।

तर परिणाम तिनले अपेक्षा गरेजस्तो भएन । तिनले जुटाएका स्रोतहरूले येशू परमेश्वरका पुत्र हुनुहुन्थ्यो भनी तिनलाई देखाइरहेका थिए । तिनी तार्किक रूपमा बेइमान हुन सकेनन् । अन्ततोगत्वा, ख्रीष्टाब्द १९५९ डिसेम्बर १८ तारिखका दिन राती ८:३० बजे तिनले आफ्नो जीवन येशूमा समर्पण गरे । तिनी ख्रीष्टका एक सच्चा अनुयायी बने । त्यसपछिका दिनहरूमा तिनको जीवनमा आमूल परिवर्तनका रेखाहरू देखिन थाले ।

जोस म्याकडोलको जन्म १७ अगस्ट १९३९ मा अमेरिकामा भएको थियो । अज्ञेयतावादबाट ख्रीष्टका अनुयायी बनेका जोस म्याकडोल विश्वप्रसिद्ध ख्रीष्टियान रक्षाशास्त्री, प्रचारसाथै लेखक हुन् । तिनी १३८ ओटा पुस्तकका लेखकसाथै सहलेखक हुन् । प्रस्ट वक्ताको रूपमा तिनले १२५ ओटा मुलुकमा २ करोड ५० लाखभन्दा बेसी मानिसहरूलाई सम्बोधन गरिसकेका छन् । क्रिस्चियानिटी टुडे नामक पत्रिकाले प्रकाशित गरेको दोस्रो विश्वयुद्धपश्चात् सर्वाधिक प्रभावशाली इमान्जलिकल पुस्तकहरूको सूचीमा तिनको कृति (एभिडेन्स द्याट डिमान्ड अ भर्डिक्ट) तेर्‍हौँ श्रेणीमा परेको थियो । मोर देन अ कार्पेन्टर नामक तिनको कृति ८५ ओटा भाषामा अनुवाद भइसकेका छन् भने १ करोड ५० लाख प्रति छापिएका छन् ।  

Leave Your Comments Here.