के येशूले पापरहित जीवन जिउनुभयो ? १० जनाको गवाही

येशूले आफ्नो जीवन दुष्ट र भ्रष्ट पुस्ताको बिचमा बिताउनुभयो । तथापि मानव चोलामा उहाँले जुन अनुकरणीय जीवन जिउनुभयो त्यो उच्चतम प्रशंसाको लायक छ । यस मानव धरतीमा येशू मात्रै एक यस्तो अनुपम व्यक्तित्व हुनुहुन्छ जसले पापरहित जीवन जिउनुभयो । यो कुनै कथन मात्रै होइन तर गवाहीहरूमा आधारित उचित निष्कर्ष हो । उहाँका मित्रहरूले मात्र उहाँले सिद्ध जीवन जिउनुभयो भनेर गवाही दिएका छैनन् तर उहाँका शत्रुहरूले पनि उहाँमा कुनै खोट देखाउन सकेनन् । उहाँले मात्र यसको दाबी गर्नुभएन तर उहाँको जाँचपडताल गर्ने अधिकारीहरू पनि उही निचोडमा पुगे । हामी यहाँ दस जनाको गवाहीलाई हेर्नेछौँ ।  

१. येशूको गवाही

येशूको मृत्युको चाहना गर्ने उहाँका चिरपरिचित प्रतिद्वन्द्वीहरूको सामना गर्नुहुँदा उहाँले तिनीहरूलाई प्रश्न गर्नुभयो, “तिमीहरूमध्ये कसले मलाई पापको दोष लाउन सक्छ” (यूहन्ना ८:४६) ? कसैले पनि उत्तर दिने आँट गर्न सकेन । किन ? किनकि उहाँलाई पापको दोष लगाउने तिनीहरूसँग कुनै प्रमाण नै थिएन । 

२. पन्तियस पिलातसको गवाही

पिलातस रोमी प्रान्त यहूदामाथि ख्रीष्टाब्द २६–३६ सम्म बडाहाकिम थिए । रोमीहरू र यहूदीहरूको बिचमा वैमनस्य थियो । येशू यहूदी हुनुहुन्थ्यो भने पिलातस रोमी । बडाहाकिम भएकोले येशूको जाँचपडताल गर्ने जिम्मा तिनको काँधसम्म आइपुगेको थियो । अनुसन्धानपश्चात् तिनले येशूको बारेमा उचित निष्कर्ष निकाले, “तिमीहरूकै सामुन्ने केरकार गर्दा तिमीहरूले यिनमाथि लाएका अभियोगको दोषी भेट्टाइनँ” (लूका २३:१४) ।

३. पिलातसकी पत्नीको गवाही

पिलातसकी पत्नीको नाउँ उल्लेख नभए तापनि उनले येशूको बारेमा जे गवाही दिएका छन् त्यो उल्लेखनीय छ । पिलातस न्याय–आसनमा बसिरहेको बेलामा तिनकी पत्नीले तिनलाई एउटा खबर पठाइन्, “त्यस निर्दोष मानिसलाई केही नगर्नुहोस्” (मत्ती २७:१९) । सायद, निर्दोष मानिसलाई दण्डाज्ञा दिएको खण्डमा उनका पति र परिवारमाथि परमेश्वरको न्याय आइपर्नेथियो भनी डराएका थिए पिलातसकी पत्नी ।

४. रोमी कप्तानको गवाही

लूकाको विवरणअनुसार जब येशूले क्रूसमा प्राण त्याग गर्नुभयो त्यहाँ केही असाधारण घटनाहरू घटे— सारा देशलाई अन्धकारले ढाक्यो; सूर्यको तेज कम भयो अनि मन्दिरको पर्दा च्यातियो । यी अनौठा घटनाहरू देखेपछि क्रूसको छेउमा उभिएका रोमी कप्तानले भने, “निश्चय नै यिनी धार्मिक मानिस थिए” (लूका २३:४७) ।

५. क्रूसमा टाँगिएको अपराधीको गवाही 

येशूको दायाँबायाँ दुई जना अपराधी येशूसँगै क्रूसमा टाँगिएका थिए । आफूहरूको दण्डलाई न्यायोचित मान्दै येशूको बारेमाचाहिँ एक जनाले गवाही दियो, “यी मानिसले त केही अनुचित काम गरेका छैनन्” (लूका २३:४१) । 

६. यूहन्नाको गवाही 

मछुवाबाट येशूको प्रेरित बनेका यूहन्ना नयाँ करारका पाँच ओटा पुस्तकका लेखक हुन् । चेलाहरूमध्येमा तिनी सबैभन्दा नजिकका चेला थिए । सम्भवत: तिनले येशूलाई साँढे तिन वर्षसम्म दिनप्रतिदिन बिहानदेखि बेलुकासम्म राम्ररी अवलोकन गरेका थिए । तिनले येशूको बारेमा लेखे, “पाप हरण गर्नलाई नै उहाँ प्रकट हुनुभएको हो भन्ने कुरा तिमीहरू जान्दछौ । र उहाँमा कुनै पाप छैन” (१ यूहन्ना ३:५) ।

७. पत्रुसको गवाही

पत्रुस नयाँ करारका दुई ओटा पुस्तकका लेखक हुन् । यूहन्नाजस्तै तिनी पनि जालाहारीबाट येशूको चेला बनेका थिए । येशूका तिन जना नजिकका चेलामध्ये पत्रुस एक थिए । येशूको साँढे तिन वर्षे सेवा–कार्यमा तिनी पनि येशूसँगै हिँडे । कुनै समय आफ्ना मालिक येशूलाई इन्कार गरेको भए तापनि आफ्नो विश्वासको निम्ति सहिद बनेका पत्रुसले येशूले पापरहित जीवन जिउनुभयो भनी लेखेका छन्, “उहाँले कुनै पाप गर्नुभएन, र उहाँको मुखमा कुनै छलको कुरा पाइएन” (१ पत्रुस २:२२) । 

८. पावलको गवाही

नयाँ करारमा पावलले १३ ओटा पत्रहरू लेखेका छन् । आदि मण्डलीलाई उग्र रूपमा सतावट गर्ने पावल पुनरुत्थान हुनुभएका येशूलाई भेटेपछि नाटकीय रूपमा परिवर्तन भए । तिनले कसरी युरोपलाई सुसमाचारले सिँचित गरे र यरूशलेमदेखि रोमसम्म सुसमाचारलाई पुर्‍याए भनी प्रेरितको पुस्तकमा पढ्न पाइन्छ । येशूलाई ग्रहण गरेपछि कुटाइ–पिटाइ, हुलदङ्गा, भोक, कैद आदिजस्ता सबै किसिमका आपद्–विपद् भोगेका पावल सहिद बनी यस धरतीबाट बिदा भएका थिए । निस्सन्देह, तिनको गवाही वजनदार छ, “किनकि हामी उहाँमा परमेश्वरको धार्मिकता बन्न सकौं भनेर पाप नचिन्नुहुनेलाई परमेश्वरले हाम्रा खातिर पाप बनाउनुभयो” (२ कोरिन्थी ५:२१) ।  

९. यहूदा इस्करियोतको गवाही

इस्करियोत येशूका १२ जना चेलामध्ये एक थियो जसले येशूलाई धोका दियो । ऊ येशूप्रति बफादार भएन । तथापि येशू निर्दोष हुनुहुन्थ्यो भन्ने सत्यता बताउनबाट भने ऊ चुकेन, “मैले निर्दोष मानिसलाई धोका दिएर पाप गरेको छु” (मत्ती २७:४) ।

१०. हिब्रूका लेखकको गवाही

हिब्रूहरूलाई लेखिएको पत्रको लेखक अज्ञात छ । येशूले सिद्ध जीवन जिउनुभयो भनेर चाहिँ तिनले गवाही दिएका छन् “हामीजस्तै उहाँ सबै कुरामा परीक्षित हुनुभयो, र पनि पापरहित हुनुहुन्थ्यो” (हिब्रू ४:१५) ।

Leave Your Comments Here.