झ्यालखानामा ख्रीष्टियान बनेका जेरीले हजारौँ मानिसहरूलाई येशूमा डोर्‍याए

ख्रीष्टाब्द १८३९ मा आयरल्यान्डमा जन्मेका जेरी म्याकअली बदमास र सडके चोर थिए ।

आफ्ना बुबा को थिए जेरीलाई थाहा थिएन । आमाले हेरचाह गर्न नसकेर वा नचाहेर हजुरआमाले तिनको हेरचाह गरिन् । परिवारमा उचित हेरचाह नपाएकाले तिनी सानै उमेरदेखि चोरीमा संलग्न भए ।

१३ वर्षको उमेरमा आफ्नो नातेदारसँगै जिउन तिनी अमेरिका पठाइए । तर यो बन्दवस्तले पनि तिनको बानीलाई सुधारेन । अमेरिकामा पनि तिनको मुख्य पेशा नै चोरी बन्यो । लत्ता कपडा किन्न र रक्सी खान तिनी चोरीमा संलग्न हुन्थे ।

जेरी १९ वर्ष पुग्दा चोरीको अभियोगमा तिनलाई १५ वर्षको जेल सजाय तोकियो । तिनलाई सिङ्ग सिङ्ग नामक झ्यालखानामा राखियो । उक्त झ्यालखानामा ५ वर्ष बिताएपछि एउटा आइतबार ओर्भिल गार्डनर नाउँ गरेका ख्रीष्टियानले आफ्नो  गवाही बाँडेको तिनले सुन्ने मौका पाए । गार्डनरको शक्तिशाली गवाहीले जेरीको ह्दय छोयो र तिनले पनि उही परिवर्तनको अपेक्षासहित बाइबल पढ्न थाले । झ्यालखानामा नै तिनले बाइबललाई दुई पटक पढेर सिद्याए ।

८ मार्च १८६४ को रातमा परमेश्वरबाट क्षमा नपाउञ्जेलसम्म तिनले घुँडा टेकिरहे । तिनले क्षमाको महसुस गरेपछि आफ्नो  जीवन प्रभुमा सुम्पे । त्यो नै तिनको आत्मिक जन्मदिन थियो ।

ख्रीष्टियान भएपछि तिनको जीवनमा सुधारका रेखाहरू देख्न थाले । तिनको सुधारिएको जीवन देखेपछि सात वर्षको जेल जीवनपश्चात् २६ वर्षको उमेरमा तिनी जेलमुक्त गरिए ।

ख्रीष्टाब्द १८७२ मा जेरी र तिनकी पत्नी मारियाले न्युयोर्क सहरमा वाटर स्ट्रिट मिसन नामक संस्थाको स्थापना गरे । जेरीको संस्थाले उत्पीडन, समाजमा अपहेलितसाथै जाँडको कुलतमा फसेका मानिसहरूलाई हेरचाह गथ्र्यो र तिनीहरूलाई सुसमाचार सुनाउँथ्यो ।   उक्त संस्थामार्फत हजारौँ मानिसहरूलाई प्रभु येशूमा डोर्‍याउने माध्यम बने जेरी । तिनको सेवाको प्रत्यक्ष वा अप्रत्यक्ष प्रभावमा परेर अन्य सयौँ मिसनहरू स्थापना गरिएका छन् जसमार्फत लाखौँ मानिसहरू प्रभु येशूमा आएका छन् ।          

Leave Your Comments Here.