पुरानो करारमा उल्लेख नभएको भविष्यवाणीलाई उद्धृत गरी के मत्तीले भुल गरेका हुन् त ?

योसेफको परिवार नासरतमा आएर बसे भन्ने अभिव्यक्तिसँगै मत्ती २ अध्यायको अन्त्य हुन्छ, “तिनी गएर नासरत भन्ने नगरमा बसे । यसरी अगमवक्ताहरूद्वारा बोलिएको वचन पूरा भयो: ‘उहाँ [येशू] लाई नासरी भनिनेछ’” (मत्ती २:२३) । तर ‘उहाँलाई नासरी भनिनेछ’ भन्ने भविष्यवाणी पुरानो करारमा कत्तै पनि पाईंदैन । यही कारणले गर्दा बाइबलका आलोचकहरूले यसलाई त्रुटि भन्ने सम्मको दुस्साहस गरेका छन् ।

पुरानो करारको कुनै एक खास अगमवक्ता (एकवचन) ले यसो भने भनी मत्तीले बताएका छैनन् । तर ‘उहाँलाई नासरी भनिनेछ’ भन्ने भविष्यवाणी पुरानो करारका अगमवक्ताहरू (बहुवचन) द्वारा बोलिएको थियो भनी लेखकले प्रस्ट पारेका छन् । तसर्थ, कुनै एउटा अगमवक्ताको पुस्तकमा उक्त भविष्यवाणीलाई खोज्नु निरर्थक हुन्छ । बरु, लेखकले अगमवक्ताका पुस्तकहरूमा व्यक्त सामान्य सत्यतालाई उल्लेख गरेका छन् ।

बाइबलको समयमा नासरत एउटा नगण्य र तिरस्कृत सहर थियो । फिलिपले मसीहलाई भेट्टाएको खबर नथानेललाई बताउँदा तिनले जवाफ दिएका थिए, “के नासरतबाट केही असल कुरो आउन सक्छ र ?” (यूहन्ना १:४६) । तसर्थ, “नासरी” एउटा हेलासाथै तिरस्कार व्यक्त गर्ने शब्द थियो । मसीहलाई घृणा गरिनेथियो र उहाँलाई तिरस्कार गरिनेथियो भनी पुरानो करारका अगमवक्ताहरूले स्पष्टसँग भविष्यवाणी गरेका थिए (यशैया ५३:२–३ लाई भजनसंग्रह २२:६–७ सित तुलना गर्नुस्) ।        

Leave Your Comments Here.