हामीले विश्वासद्वारा (एफिसी २:८–९) मुक्ति पाउँछौँ कि कामद्वारा (याकूब २:२४) ?

पावलले झ्यालखानाबाट एफिससको मण्डलीलाई पठाएको पत्रमा तिनी लेख्छन्, “किनभने अनुग्रहबाट विश्वासद्वारा तिमीहरूले उद्धार पाएका छौ— र यो तिमीहरू आफैबाट होइन, यो त परमेश्वरको वरदान हो— कर्महरूद्वारा होइन, नत्रता मानिसले घमण्ड गर्नेछ” (एफिसी २:८–९) । तर याकूबले आफ्नो पत्रमा लेखेका छन्, “तिमीहरू देख्तछौ कि कामद्वारा मानिस धर्मी ठहरिँदोरहेछ, विश्वासद्वारा मात्र होइन” (याकूब २:२४) । यी दुई ओटा खण्डलाई सरसरती पढ्दा सुस्पष्ट विरोधाभास देखिन्छ । मानिस कसरी धर्मी ठहरिन्छ— विश्वासद्वारा (एफिसी २:८–९) वा कामद्वारा (याकूब २:२४) ?

पवित्र धर्मशास्त्र बाइबलले प्रस्टसित सिकाउँछ कि मानिस केवल विश्वासद्वारा धर्मी ठहरिन्छ कामद्वारा होइन । येशू ख्रीष्ट र उहाँले क्रूसमा गर्नुभएको काममाथि विश्वास गरेर मानिसले उद्धार पाउँछ । हामीलाई केवल विश्वासले बचाउँदछ । उद्धार पाउनको लागि मानिसले काम गर्नुपर्दैन । धर्मशास्त्रले हाम्रो उद्धारको माध्यमको रूपमा कामको कुनै पनि रूपलाई निषेध गर्दछ । पावलले एफिसीहरूलाई लेखेको पत्रमा मात्र नभएर रोमीहरूसाथै गलातीहरूलाई लेखेको पत्रमा पनि यस शिक्षालाई स्पष्ट रूपमा सिकाएका छन् । रोमको मण्डलीलाई प्रेरित पावल लेख्छन्, “यसकारण व्यवस्थाका कर्महरूको पालनविना विश्वासद्वारा नै मानिस धर्मी ठहरिन्छ भनी हामी ठान्छौं” (रोमी ३:२८) । गलातीका विश्वासीहरूलाई पावल लेख्छन्, “... व्यवस्थाका कामद्वारा मानिस धर्मी ठहरिँदैन, तर येशू ख्रीष्टमाथिको विश्वासद्वारा धर्मी ठहरिन्छ । यसकारण हामीले पनि हाम्रो विश्वास ख्रीष्ट येशूमा राख्यौं, ताकि हामी व्यवस्थाका कामद्वारा होइन तर ख्रीष्टमा राखिएको विश्वासद्वारा धर्मी ठहरिन सकौं, किनकि व्यवस्थाका कामद्वारा कोही पनि धर्मी ठहरिँदैन” (गलाती २:१६) ।

यदि मानिस विश्वासद्वारा मात्र धर्मी ठहरिन्छ भने याकूबको भनाइको अर्थ के हो त ? “कामद्वारा मानिस धर्मी ठहरिँदोरहेछ, विश्वासद्वारा मात्र होइन” (याकूब २:२४) भन्ने याकूबको भनाइको अर्थ के हो त ?

खण्डमा अभिलिखित वचनको अर्थलाई राम्ररी बुझ्ने एउटा तरिका हो, सन्दर्भ । लेखकले कुन प्रसङ्गमा उक्त अभिव्यक्ति दिइरहेका छन् भनी जान्नु अपरिहार्य हुन्छ । याकूब २ अध्यायलाई अध्ययन गर्दा हामी पाउँछौँ कि लेखकले धर्मीकरणको बेग्लै पक्षलाई सम्बोधन गर्दै छन् । पावलले रोमीहरूलाई, गलातीहरूलाई र एफिसीहरूलाई लेखेको पत्रमा तिनले परमेश्वरको सामु हुने धर्मीकरणबारे सम्बोधन गर्दै छन् जब कि याकूबले आफ्नो पत्रको दोस्रो अध्यायमा मानिसको सामु हुने धर्मीकरणबारे सम्बोधन गर्दै छन् । कसरी मुक्ति प्राप्त गर्ने भन्ने विषयलाई पावल बताउँदै छन् भने मुक्तिलाई कसरी देखाउने भन्ने विषयलाई याकूब बताउँदै छन् । पावलले मुक्ति पाउनको लागि के गर्नुपर्छ भनी उल्लेख गर्दै छन् भने याकूबले मुक्ति पाइसकेपछि के गर्नुपर्छ भनी उल्लेख गर्दै छन् । पावलले मुक्तिको माध्यमको चर्चा गर्दै छन् भने याकूबले मुक्तिको फलको चर्चा गर्दै छन् ।  

यसरी मुक्ति कसरी पाइन्छ भन्ने सवालमा पावल र याकूबको शिक्षामा अन्तर्विरोध छैन । केवल येशूमाथिको विश्वासद्वारा उद्धार पाइन्छ भनी बाइबलले प्रस्टसित सिकाउँदछ । दुई जना लेखकले धर्मीकरणका दुई ओटा पक्षलाई फरक–फरक दृष्टिकोणबाट सम्बोधन गर्दै छन् ।  

Leave Your Comments Here.