बाइबलीय इतिहासको पुष्टि गर्ने अर्को महत्त्वपूर्ण खोज

प्राचीन यहूदाका सहरहरूमध्ये लाकीश दोस्रो महत्त्वपूर्ण सहर थियो । पहिलो राजधानी यरूशलेम थियो । ७०१ ख्रीष्टपूर्वमा अश्शूरका राजा सनहेरीबले लाकीशलाई घेराबन्दी गरी यसमाथि विजय हासिल गरेका थिए । यस घेराबन्दीबारे बाइबलमा यसरी लेखिएको छ, “हिजकिया राजाको चौधौँ वर्षमा अश्शूरका राजा सनहेरीबले यहूदाको सारा पर्खाल लगाएका सहरहरूलाई आक्रमण गरेर तिनलाई कब्जा गरे । अनि अश्शूरका राजाले युद्धका एकजना सेनापतिलाई ठूलो सेनासमेत लाकीशबाट यरूशलेममा हिजकिया राजाकहाँ पठाए” (यशैया ३६:१–२) । २ राजा १८ र २ इतिहास ३२ अध्यायमा पनि यस आक्रमणबारे उल्लेख गरिएको छ ।

सनहेरीब अश्शूरका राजा थिए जसले ७०४–६८१ ख्रीष्टपूर्वसम्म शासन गरेका थिए । तिनले निनवेलाई अश्शूरी साम्राज्यको राजधानी बनाए । पहिले दुर–सरुकिन राजधानी सहर थियो । राजाले निनवेमा वैभवशाली महल ठडयाए । तर झण्डै २,५०० वर्षसम्म त्यो दरबारको बारेमा केही थाहा पाइएन ।

ख्रीष्टाब्द १८४७ मा पुरातत्त्वविद् अस्टिन हेन्री लेयार्डद्वारा निनवेमा अश्शूरी राजा सनहेरीबको महल पत्ता लगाइयो । लेयार्डको खोजले संसारको ध्यान खिँच्यो । महलको भित्तामा कुँदिएका लेखहरूमा लाकीशको घेराबन्दीबारे पनि उल्लेख गरिएको छ । यस खोजले बाइबलमा अभिलिखित घटनालाई पुष्टि गरेकोले इङ्गल्यान्डमा आश्चर्यको तरङ्ग प्रवाह भएको थियो । लाकीशको घेराबन्दीबारे उल्लेख गर्ने शिलालेखलाई अहिले लन्डनस्थित ब्रिटिस सङ्ग्रहालयमा राखिएको छ ।

यसरी यस खोजले फेरि एक पटक बाइबलीय विवरणको पुष्टि गरेको छ ।        

     

Leave Your Comments Here.