बाइबलमा जम्माजम्मी १,८१७ ओटा भविष्यवाणी पाइन्छन्

बाइबल के हो ?

यो ख्रीष्टियानहरूको धर्मग्रन्थ हो ।

बाइबलभित्र के छ ?

परमेश्वरले सारा विश्वको सृष्टि गर्नुभयो जुन सुरुमा असल थियो तर आदम र हव्वाले पाप गरेपछि संसारमा पापको प्रवेश भयो । पापको महासागरबाट बाँच्नको लागि मानिस आफैसित कुनै उपाय नभएकोले परमेश्वरले आफ्नो एक मात्र पुत्र पठाउनुभयो जो येशू ख्रीष्ट हुनुहुन्छ । उहाँ मानव–जातिको पापको लागि क्रूसमा मर्नुभयो । उहाँमाथि विश्वास गर्नेहरूले अनन्त जीवन पाउँछन् अर्थात् तिनीहरू पापको महासागरबाट उम्कन सक्छन् । यही कुरोलाई पूर्णता दिन उहाँ एक दिन फर्कंदै हुनुहुन्छ ।

बाइबल कहिले लेखियो ?

बाइबल केवल एउटा पुस्तक नभई यो पुस्तकहरूको सङ्ग्रह हो । यसलाई मुख्य दुई भागमा वर्गीकरण गरिएको छ: पुरानो करार र नयाँ करार । पुरानो करारमा ३९ ओटा पुस्तक छन् भने नयाँ करारमा २७ ओटा । बाइबलको पहिलो पुस्तक उत्पत्ति हो भने अन्तिम पुस्तक प्रकाश । बाइबलको पहिलो पुस्तक लगभग १,४४० ख्रीष्टपूर्व अर्थात् आजभन्दा ३,५०० वर्षअगि लेखिएको थियो भने यसको अन्तिम पुस्तक ख्रीष्टाब्द ९५ तिर लेखियो अर्थात् १,९०० वर्षअगि ।

बाइबलका सबै पुस्तकहरू लेख्न कति समय लाग्यो ?

लगभग १,६०० वर्षको अवधि (१,४४० ख्रीष्टपूर्व–ख्रीष्टाब्द ९५) मा बाइबलका सबै पुस्तकहरू लेखिए ।

कहाँ लेखियो बाइबललाई ?

एसिया, अफ्रिका र युरोप गरी तिन ओटा महादेशमा ।

कुन भाषामा लेखियो ?

पुरानो करारको अधिकांश भागलाई हिब्रू भाषामा र केही भागलाई आरमेइक भाषामा लेखियो भने नयाँ करारलाई ग्रिक भाषामा ।

कसले लेख्यो बाइबललाई ?

यसको रचनाको लागि झण्डै ४० जना मानवीय लेखकहरू चलाइए । तर अदृश्य लेखक पवित्र आत्मा नै हुनुहुन्थ्यो ।

को–को थिए ती मानवीय लेखकहरू ?

मोशा, दाऊद, सोलोमन, यर्मियाजस्ता मानिसहरू पुरानो करारका केही लेखकहरू थिए भने पावल, यूहन्ना, पत्रुस, मत्तीजस्ता मानिसहरू नयाँ करारका केही लेखकहरू थिए ।

बाइबल कुन विद्याअन्तर्गत पर्दछ ?

यहाँभित्र इतिहास, कविता, संस्मरण, जीवनी, दृष्टान्त, भविष्यवाणी आदिजस्ता विभिन्न साहित्यिक शैलीहरू पाइन्छन् ।

अन्य पुस्तकहरूभन्दा बाइबल कसरी फरक छ ?

बुँदागत रूपमा भन्नुपर्दा यसलाई यसरी व्यक्त गर्न सकिन्छ:

• बाइबलको एकत्वले हरेक पाठकलाई छक्क पार्नुपर्छ । यो भनेको बाइबलमा पृथक्ताको नदी बगेको भए तापनि यसको मुख्य विषयवस्तु एउटै छ: मानव–जातिको लागि परमेश्वरको छुटकाराको योजना ।
• बाइबल मात्र एउटा यस्तो धर्मशास्त्र हो जसमा सयौँ भविष्यवाणीहरू पाइन्छन् जसमध्ये कैयौँ पुरा भइसकेका छन् । एक जना लेखकको गणनाअनुसार बाइबलमा जम्माजम्मी १,८१७ ओटा भविष्यवाणी पाइन्छन् ।
• बाइबलमा आधुनिक विज्ञानले प्रमाणित गरेका कतिपय भनाइहरू पाइन्छन् । जस्तै: पृथ्वीमा शून्यतामा झुण्डिएको छ ।
• बाइबलको विवरणलाई एकपछि अर्को गर्दै पुष्टि गर्ने कैयौँ पुरातात्त्विक खोजहरू पत्ता लागेका छन् ।
• बाइबल संसारमा सबैभन्दा बेसी बिक्री–वितरण हुन सफल पुस्तक हो ।

किन बाइबल पढ्नुपर्छ ?

यो संसारमा सबैभन्दा प्रभावशाली पुस्तक हो । यसले व्यक्ति, समाज र राष्ट्रलाई सही मार्गमा डोर्‍याएका उदाहरणहरू मनग्गे छन् । संसारका राष्ट्र प्रमुखसाथै उच्च ओहोदामा हुनेहरूले आफ्ना भाषणहरूमा बाइबलका वचनहरूलाई बारम्बार उद्धृत गर्थे । तपाईंले बाइबललाई गम्भीर रूपमा अध्ययन गर्नुभयो भने तपाईंले आफ्नो संसारलाई बदल्नुहुनेछ भन्दा अत्युक्ति नहोला ।  

      

Leave Your Comments Here.