नवनिर्वाचित अमेरिकी राष्ट्रपति ट्रम्पलाई सबैभन्दा मनपर्ने पुस्तक हो— बाइबल

संयुक्त राज्य अमेरिकाका नवनिर्वाचित राष्ट्रपति डोनाल्ड जोन ट्रम्पको जन्म १४ जुन १९४६ मा अमेरिकाको न्युयोर्क सहरमा भएको थियो । 

परिचित व्यापारी, टेलिभिजन व्यक्तित्व र द ट्रम्प अर्गनाइजेसन नामक संस्थाका मुख्य व्यक्तिसमेत रहेका तिनी धार्मिक दृष्टिकोणबाट ख्रीष्टियान हुन् । बाल्यकालमा तिनी मण्डलीमा जन्थे र बाल सङ्गतिमा उपस्थित हुन्थे । ख्रीष्टाब्द २०११ मा लिइएको एउटा अन्तर्वार्तामा तिनले भनेका छन्, “म प्रोटेस्टेन्ट हुँ । म प्रेसबिटेरिएन हुँ । तपाईंहरूलाई थाहै छ, कि विगतका वर्षहरूमा मण्डलीसित मेरो राम्रो सम्बन्ध रहेको छ । मेरो विचारमा धर्म एउटा राम्रो कुरो हो । मेरो विचारमा मेरो धर्म एउटा राम्रो धर्म हो ।” 

ट्रम्पका अनुसार तिनी न्युयोर्कस्थित मार्बल कोलेजिएट चर्चमा जान्छन् । १९७७ मा यहीँ नै तिनले आफ्नो पहिलो विवाह गरेका थिए । तिनी प्रभु-भोजमा सहभागी हुन्छन् । 

ट्रम्पले आफ्नो कृति द आर्ट अफ् द डिल लाई आफूलाई मनपर्ने दोस्रो पुस्तक भनेका छन् । तिनको मनपर्ने पहिलो पुस्तक हो, बाइबल । तिनले भनेका छन्, “तपाईंहरूलाई थाहा छ [मलाई मनपर्ने] पहिलो पुस्तकचाहिँ कुन हो ? बाइबल । कुनैले पनि बाइबललाई पराजित गर्न सक्दैन ।”

टोनी पार्किन्स र राल्फ ए. रिडजस्ता परिचित इभान्जलिकल प्रोटेस्टेन्ट अगुवाहरूसित ट्रम्पको राम्रो सम्बन्ध रहेको छ । चुनावको प्रचार प्रसारको दौडानमा तिनले पास्टर इम्मानुएल लेमेलसनबाट आशिष् थापेका थिए ।

स्रोतः https://en.wikipedia.org/wiki/Donald_Trump  

Leave Your Comments Here.

मिसनरीको सुसमाचारद्वारा डरलाग्दो हत्याराको परिवर्तन

रोबर्ट मोफाट उन्नाइसौँ शताब्दीमा अफ्रिकामा मिसनरी भएर जाने प्रभुका साहसिला सेवक हुन् । तिनी विश्वविख्यात मिसनरी डेभिड लिभिङ्गस्टोनका ससुरा थिए । दक्षिण अफ्रिकामा ५० वर्षभन्दा बेसी समय बिताएका मोफाटले उक्त देशको बेखुनास नामक आदिवासीको भाषामा बाइबललाई अनुवाद गरेका थिए ।  

तिनले जुन ठाउँमा सुसमाचार लिएर गएका थिए, त्यहाँ अफ्रिकानर नाउँ गरेको एक डरलाग्दो हत्यारा थियो । ऊ यति हिंसक थियो कि दक्षिण अफ्रिकी सहर केप टाउनका गभर्नरले उसलाई जीवित वा मृत फेला पारेको खण्डमा झन्डै पचार हजार नेपाली रुपियाँ बराबरको धनराशी उपहार दिने घोषणा गरेका थिए । अफ्रिकानर र त्यसका मानिसहरू दक्षिण अफ्रिकाको त्रास बनेका थिए । 

जब रोबर्ट मोफाट अफ्रिकानरको जातिको लागि मिसनरी भई गए, केप टाउनका मानिसहरूले तिनी जिउँदै फर्केर आउँछन् भनी कहिल्यै अपेक्षा गरेनन् । त्यसले मोफाटको खप्परलाई चिया पिउने भाँडो बनाउनेछ भनी सहरका मानिसहरूले बताए । 

तर मोफाटले परमेश्वरमाथि दृढ भरोसा राखे । तिनले उक्त जङ्गली जातिको बिचमा साहसपूर्वक सुसमाचारीय सन्देश बाँडे । उदेकको कुरो के भयो भने त्यही हत्यारा नै पहिलो विश्वासी बन्यो । पछि मोफाटले उसलाई आफूसितै केप टाउनमा लगे । त्यो हिंसक जङ्गली हत्यारालाई नम्र ख्रीष्टियान व्यक्तिमा परिवर्तन भएको देखेर उपनिवेशी शासकले आश्चर्य मान्दै भने, “कस्तो आश्चर्यकर्म ! यो त संसारको आठौँ आश्चर्य हो ।” 

Leave Your Comments Here.

सन्देहवादी अनुसन्धानकर्ताले पत्ता लगाए वास्तविक येशूलाई

 “म जवान ठिटो हुँदा मैले पहिलो पटक ख्रीष्‍टको जीवनीलाई गम्भीरतापूर्वक अध्ययन गर्न थालेँ । उहाँको इतिहास निकै असुरक्षित जगहरूमा निर्मित छ भन्‍ने दृढ निश्‍चयतासाथ अगाडि बढेँ म ।”

अनुसन्धानपश्‍चात् येशूको पुनरुत्थानलाई इतिहासको एउटा वास्तविक घटनाको रूपमा देख्‍ने फ्र्याङ्क मोरिसनले आफ्नो कृति (हु मुभ्ड द स्टोन ?) मा लेखेको अंश हो यो ।

फ्र्याङ्क मोरिसन विज्ञान र “आश्‍चर्यकर्महरू हुँदैनन्” भन्‍ने विकासवादका पक्षपोषक थोमास हक्स्लेको अवधारणका कट्टर अनुयायी थिए । तथापि तिनी येशूको व्यक्‍तित्वका प्रशंसक पनि थिए । येशूको जीवनीका आखिरी दिनहरूको बारेमा तिनले आफ्नै व्यक्‍तिगतसाथै ऐतिहासिक अनुसन्धान गर्ने जमर्को गरे ।

बिसौँ शताब्दीको पूर्वार्द्धमा यी ब्रिटिस लेखकले येशूको पुनरुत्थानसम्बन्धी स्रोतहरूलाई विष्लेषण गरी तिनी जिसस— द लास्ट फेज (येशू— आखरी चरण) नामक शीर्षकमा एउटा सङ्क्षिप्‍त दस्तावेज लेख्‍न कस्सिए । लेख्‍नुको उद्देश्य थियो— येशूको पुनरुत्थानलाई काल्पनिक कथाको रूपमा पुष्‍टि गर्नु । मरेको मान्छे बिउँतेर आउन सक्छ भन्‍ने अन्धविश्‍वासलाई यस कृतिले सधैँका लागि निर्मूलन पार्छ भन्‍ने तिनको विश्‍वास थियो । तिनले आफूलाई चाहिने सामग्रीहरू बटुले अनि लेख्‍न थाले । तर तिनले जे कुरो प्रमाणित गर्न खोजिरहेका थिए, स्रोतहरूले ठिक विपरीत दिशातिर लैजाँदै थिए तिनलाई ।

अन्ततः येशू ख्रीष्‍ट वास्तवमै पुनरुत्थान हुनुभएको थियो भन्‍ने तथ्यमा तिनी विश्‍वस्त हुन पुगे । परिणामस्वरूप तिनले येशूलाई मुक्‍तिदाताको रूपमा अङ्गाले । ती जम्मा भएका स्रोतहरूलाई प्रयोग गरी येशू ख्रीष्‍टको पुनरुत्थानको पक्षमा तिनले तार्किक रूपमा एउटा गतिलो पुस्तक लेखे जसको नाउँ हो— हु मुभ्ड द स्टोन ? लेखकको आफ्नै दाबीअनुसार यो लेख्‍न इन्कार गरिएको पुस्तक थियो । ख्रीष्‍टाब्द १९३० मा पहिलो पटक प्रकाशित र ख्रीष्‍टाब्द २००६ सम्ममा आइपुग्दा दस पटक पुनः मुद्रित यस पुस्तकलाई पढेर धेरै मानिसहरू ख्रीष्‍टियान भएका छन् ।

Leave Your Comments Here.