दाऊदले परमेश्वरलाई चढाइएको रोटी खाँदा को प्रधान पूजाहारी थिए— अबियाथार (मर्कूस २:२६) वा अहीमेलेक (१ शमूएल २१:१–६) ?

अबियाथार प्रधान पूजाहारीको पालामा दाऊदले परमेश्वरलाई चढाइएको रोटी खाए भनी प्रभु येशूले बताउनुभयो, “प्रधान पूजाहारी अबियाथारको पालोमा परमेश्वरको भवनमा तिनी [दाऊद] पसे, र परमेश्वरलाई चढाइएको रोटी खाए” (मर्कूस २:२६) । तर १ शमूएल २१:१–६ लाई पढ्दा प्रस्ट हुन्छ कि त्यसबेला अहीमेलेक प्रधान पूजाहारी थिए । वास्तवमा कोचाहिँ प्रधान पूजाहारी थिए— अबियाथार वा अहीमेलेक ? यो सुस्पष्ट विरोधाभासको व्याख्या के हुन सक्छ ?

ऐतिहासिक विवरणहरूबाट यो प्रस्ट छ कि त्यो समयमा अबियाथार नभई अहीमेलेक प्रधान पूजाहारी थिए जस्तो १ शमूएल २१:१–६ मा वर्णन गरिएको छ ।

अहीमेलेकले दाऊदसित मतियारी गरेको कारण देखाई राजा शाऊलले एदोमी दोएगको हातबाट अहीमेलेकसाथै नोबका सबै पूजाहारीहरूलाई मार्न लगाए (१ शमूएल २२:१८–१९) । अहीमेलेकका छोरा अबियाथार मात्रै दाऊदकहाँ भागेर जान सफल भए (पद २०) र बुबाको मृत्युपश्चात् राजा दाऊदद्वारा तिनी प्रधान पूजाहारीमा नियुक्त गरिए ।  

वास्तवमा अहीमेलेक प्रधान पूजाहारी हुँदा दाऊदले परमेश्वरलाई चढाइएको रोटी खाएको भए तापनि तिनको हत्यापश्चात् तिनका छोरा अबियाथार प्रधान पूजाहारी बने जो बुबाभन्दा विशिष्ट साबित् भए । “प्रधान पूजाहारी अबियाथारको पालोमा” भन्ने वाक्यांशले दाऊदले रोटी खाँदा तिनी वास्तवमै प्रधान पूजाहारीको ओहोदामा थिए भनी बताउँदैन । दाऊदले रोटी खाएपछि तिनी प्रधान पूजाहारी बने पनि यस्तो खालको अभिव्यक्ति अझै सही हुन्छ । दाऊदले उक्त रोटी खाँदा अबियाथार जीवितै थिए र यो अबियाथारको समयमा घटेको घटना थियो, तिनले वास्तवमै प्रधान पूजाहारीको सेवा–कार्य सम्हाल्दा होइन ।                

Leave Your Comments Here.