खासमा हारूनको मृत्यु कहाँ भयो ? गन्ती २०:२८ र ३३:३८–३९ अनुसार तिनी होर पर्वतमा मरे भने व्यवस्था १०:६ मुताबिक तिनको देहान्त मोसेरामा भयो ।

मिश्रीहरूको चार सय वर्षे दासत्वबाट छुटकारा पाई इस्राएलीहरू प्रतिज्ञाको मुलुक कनानतर्फ अगाडि बढ्ने क्रममा तिनीहरू होर पर्वतमा आइपुगे “र त्यहीँ नै पर्वतको टाकुरामा हारूनको देहान्त भयो” (गन्ती २०:२८) । “होर पर्वतमा तिनको मृत्यु हुँदा हारून एक सय तेईस वर्ष पुगेका थिए” (गन्ती ३३:३९) । तर व्यवस्थाको विवरणमुताबिक तिनी मोसेरामा मरे, “इस्राएलीहरू याकानीहरूका इनारहरूबाट हिँडेर मोसेरामा आए । त्यहाँ हारून मरे, र गाडिए । अनि तिनका छोरा एलाजारले तिनको स्थानमा पूजाहारीको काम गर्न लागे” (व्यवस्था १०:६) । वास्तवमा हारून कहाँ मरे— होर पर्वत वा मोसेरा ?

तात्कालीन भूगोललाई अध्ययन गर्दा दुवै ठिक देखा पर्छन् । इस्राएलीहरू मिश्रदेखि प्रतिज्ञात मुलुकतर्फ यात्रा गर्दा तिनीहरूले मोसेरामा शिविर हालेका थिए । सम्भवत: मोसेरा एदोमको सिमाना नजिकैको क्षेत्र थियो । मोसेरा जिल्लाको नाउँ थियो जहाँ होर पर्वत अवस्थित थियो भनी निष्कर्ष निकाल्नु न्यायसङ्गत हुन्छ ।

यी दुवै विवरणहरू अन्तर्विरोधी नभई एक अर्काका परिपूरक देखिन्छन् । व्यवस्थाको विवरणले हामीलाई ठुलो क्षेत्रको नाउँ दिन्छ भने गन्तीको विवरणले सानो क्षेत्रको । निष्कर्षमा, हारून मोसेरा जिल्लामा अवस्थित होर पर्वतको टाकुरामा मरे ।        

Leave Your Comments Here.