जोन ख्रिसोस्टोम: आफ्नो अडानको निम्ति सहिद बनेका निडर वक्ता

प्रवचनको क्षेत्रमा आफ्नो अद्वितीय वाक्पटुता र जोसको कारणले जोनले ख्रिसोस्टोम भन्ने नाउँ पाएका थिए । यस नाउँको अर्थ हुन्छ: सुनौलो मुख । प्रवचनको लागि ख्यातिप्राप्त तिनी कन्स्टेनटिनोपलका प्रधान बिशपसाथै आदि मण्डलीका पिता थिए । तिनले पुरै पुरानो करार र नयाँ करारलाई कण्ठस्थ पारेका थिए । ख्रीष्टियान विश्वासका नैतिक पक्षहरूलाई जोड दिने प्रचारक थिए जोन । तिनी आफ्नो समयका एक महानतम वक्ता थिए ।   

 

जोनको जन्म करिब ख्रीष्टाब्द ३४९ मा एन्टिओखिया (हाल टर्कीमा पर्ने) मा भएको थियो । यो त्यही ठाउँ हो जहाँ ख्रीष्टका अनुयायीहरूलाई पहिलो पटक ख्रीष्टियान भनिएको थियो (प्रेरित ११:२६) । जोनका पिता उच्च तहका सैनिक अधिकारी थिए । तर तिनी जन्मेको केही समय बित्न नपाउँदै बुबाको मृत्यु भएपछि तिनलाई हुर्काउने जिम्मा आमाको काँधमा परेको थियो । 

जोनले एन्टिओखियामा उत्कृष्ट शिक्षा हासिल गरे । बिस वर्षको उमेरमा येशूलाई विश्वास गरेका र तेइस वर्षको उमेरमा पानीको बप्तिस्मा लिएका जोनले वकिल पेसालाई अङ्गाल्ने आफ्नो उद्देश्यलाई त्यागी आफ्नो पुरै समय मण्डलीको निम्ति समर्पित गरे । परमेश्वरले तिनमा भएको वाक्पटुताको क्षमतालाई उहाँको राज्य बिस्तारको निम्ति तयार पार्दै हुनुहुन्थ्यो ।

तिनले बाह् वर्षसम्म एन्टिओखियाको मण्डलीमा प्रचार गरे । एउटै विषयमा वा एउटै पुस्तकबाट श्रृङ्खलाबद्ध रूपमा प्रचार गर्नु तिनको आदत थियो । तिनको प्रवचन सुन्न मानिसहरूको भिड लाग्ने गथ्र्यो ।    

जोन प्रचारको निम्ति यति प्रसिद्ध भए कि कन्स्टेनटिनोपलकी सम्राज्ञीले तिनी दरबारको निम्ति प्रचारक बनेको चाहिन् र तिनलाई अपहरण गराएर दरबारमा ल्याइन् । निडर प्रचारक जोनले धर्मशास्त्रको यथार्थतालाई निर्भिकतासाथ प्रस्तुत गर्थे ।

भोग विलास, भ्रष्टता, अनैतिकताले भरिएको एउटा विशाल सहर थियो कन्स्टेनटिनोपल । यी सबै दुष्टयाईंहरूको विरुद्धमा जोनले जोडदार रूपमा प्रचार गर्थे । तिनको प्रवचनबाट ठेस पुर्‍याइएका धेरै मानिसहरूमध्ये एक थिइन्— सम्राज्ञी इयुडोसिया ।

प्रचारक जोनदेखि सम्राज्ञी निकै बेखुसी भइन् र उनले तिनलाई निर्वासनमा पठाइदिइन् । छोटो समय निर्वासनमा बिताएर फर्केपछि जोन झनै पापको विरुद्धमा उर्लिन थाले । तिनले खुलमखुला सम्राज्ञीको विरोध गरे । सम्राट्ले तिनलाई अपदस्थ गरे तर जोन त्यसलाई स्वीकार गर्न राजी भएनन् । बप्तिस्माको विधि जारी भइरहेको मण्डलीमा सम्राट्ले सेना पठाए र आराधकहरूको रगत बप्तिस्माको पानीसितै मिसियो । जोनलाई पुन: निर्वासनमा पठाइयो ।

जोन निर्वासनमा छँदा पनि तिनको प्रभाव जारी नै थियो किनकि विभिन्न ठाउँका मानिसहरू तिनलाई भेट्न त्यहीँ पुग्थे । सम्राज्ञीलाई तिनको प्रभाव असह्य भएको थियो । त्यसैले उनले प्रचारकलाई अर्कै ठाउँमा पठाउने निधो गरिन् । सिपाहीहरूले बाटोमा तिनीसँग निर्ममतापूर्वक व्यवहार गरे । फलस्वरूप ख्रीष्टाब्द ४०७ मा यात्रामा नै तिनको निधन भयो ।

तिनको शवलाई अनिश्चित ठाउँमा दफन गरिएको भए तापनि पछि मण्डलीले तिनको आदर गर्दै त्यहाँबाट तिनको लासलाई झिकी कन्स्टेनटिनोपलमा लग्यो । सतावटको बिगबिगी नभएको अवस्थामा तिनी आफ्नो विश्वासको निम्ति सहिद भएर बिदा भएका थिए ।

   

Leave Your Comments Here.