सन चु किल: कोरियाई मण्डलीका पिता

“येशू साँचो मुक्तिदाता हुनुहुन्छ कि हुनुहुन्न भनी मैले बिहानै प्रार्थना गर्दा मैले बाँसुरीको प्रस्ट आवाज र बन्दुक पड्केको ठुलो आवाज सुनेँ जसले कोठा नै हल्लाइदिए । मैले माथिबाट मलाई तिन पटक बोलाइएको आवाज सुनेँ, ‘सन चु किल, सन चु किल, सन चु किल !’ म थर्थर काँपेँ र मेरो शिर नै नउठाई मैले भनेँ, ‘पिता परमेश्वर जसले मलाई प्रेम गर्नुहुन्छ, मेरा पाप क्षमा गरिदिनुहोस् र मलाई बचाउनुहोस् ।’ आँसु झार्दै म ठुलो स्वरमा चिच्च्याएँ । मेरो शरीर तातो भयो र मैले जोशकासाथ प्रार्थना गरेँ ।”

ख्रीष्टाब्द १८९६ मा २७ वर्षको उमेरमा सन चु किलले अनुभव गरेको आत्मिक परिवर्तनको बयान हो यो । ख्रीष्टियान हुनुअगि तिनी ताओ धर्मावलम्बी थिए ।

कोरियाई ख्रीष्टियान इतिहासमा सन चु किलको नाउँ अग्रपङ्क्तिमा आउँछ । तिनी नै पहिलो अभिषिक्त पास्टर थिए । कोरियाई मण्डलीको स्वरूपको स्थापना गर्ने ख्रीष्टाब्द १९०७ को महान् जागृतिका हिमायती सनलाई प्रायश: “कोरियाई मण्डलीका पिता” भनिएको छ ।

१५ मार्च १८६९ मा सन चु किलको जन्म कोरियामा भएको थियो । तिन वर्षको उमेरदेखि नै तिनले चिनियाँ साहित्यमा दख्खल प्राप्त तिनकी आमाबाट चिनियाँ वर्णमाला सिक्न थालेका थिए । सात वर्षको उमेरमा तिनी स्कुलमा प्रवेश गरे । एघार वर्षको उमेरमा बिहे गरेका सन वर्तमान संसारदेखि वाक्क भएर धार्मिक जगत्मा प्रवेश गरेका थिए ।

प्योङयोङमा सन ताओ धर्मका ख्यातिप्राप्त अगुवाको रूपमा चिनिए । दस वर्षको तालिमपश्चात् तिनले अलौकिक शक्तिहरू प्राप्त गरे । तथापि ताओ धर्मले तिनको आत्मिक भोकलाई तृप्त पार्न भने सकेन ।

अमेरिकी मिसनरी समुएल ए. मोफेटसँगको भेटले सनको जीवनमा उल्लेखनीय परिवर्तन ल्यायो । ती मिसनरीले प्योङ्योङमा सुसमाचार प्रचार गर्न थाले जसले सनको ध्यान पनि खिँच्यो । तिनी ख्रीष्टियान विश्वासबारे जान्न उत्सुक भए । सन नयाँ धर्मदेखि डराएका थिए यद्यपि तिनी यसबारे उत्सुक थिए । तिनले बाइबल पढ्न थाले तर बाइबलले तिनलाई छोएन । त्यसैले, तिनी ताओ धर्ममा नै केन्द्रित हुन थाले ।

सनका घनिष्ठ मित्र किम जो पहिले नै ख्रीष्टियान बनिसकेका थिए तिनले सनको हातमा दुई ओटा पुस्तक थमाइदिए: पिलग्रिम्स प्रोग्रेस र मोफेटद्वारा अनूदित क्याटेकिज्म । सनले ख्रीष्टियान विश्वासलाई अङ्गाल्नुमा यी दुई ओटा पुस्तकले उल्लेखनीय प्रभाव पारेका थिए ।

आफ्नो  जीवन प्रभु येशूमा समर्पित गरेपछि तिनी प्योङयोङस्थित सेन्ट्रल प्रेसबिटेरिएन चर्चमा गए र १५ अगस्ट १८९६ तिनले पानीको बप्तिस्मा लिए । अन्तत: तिनी त्यही मण्डलीको पास्टर बने । मण्डली भवन बनाउनको लागि तिनले आफ्नो जग्गा योगदान गरे र तिनको जग्गामा नयाँ मण्डली भवन खडा गरियो ।

२५ नोभेम्बर १९३५ मा सनले जागृति सभालाई अगुवाई गरिरहँदा तिनले आघातको महसुस गरे र त्यसको भोलिपल्ट तिनी प्रभुमा सुते ।     

   

Leave Your Comments Here.