डी. एल. मुडी: लाखौँ मानिसहरूलाई प्रभु येशूमा जित्ने प्रखर वक्ता

२१ अप्रिल १८५५ मा एक जना बाइबल शिक्षक जुत्ता गोदामभित्र प्रवेश गरे जहाँ एक जना जवान केटोले जुत्ताहरू पोको पार्ने काम गर्दै थिए । शिक्षकले भने, “ख्रीष्टले तपाईंलाई कति धेरै माया गर्नुहुन्छ भनी म तपाईंलाई बताउन चाहन्छु ।”

परमेश्वरले आफूलाई प्रेम गर्नुभएको सत्यतालाई बुझेपछि तिनले घुँडा टेके र येशूलाई मुक्तिदाताको रूपमा स्वीकार गरे । वर्षौंपछि तिनले यस अनुभवलाई व्यक्त गरे, “म नयाँ संसारमा थिएँ । चराचुरुङ्गीहरूले अझै मिठो गाए; सूर्यको तेज अझै चम्किलो भयो । मैले यस्तो शान्तिको बोध कहिल्यै गरेको थिइनँ ।” ती ठिटा अरू कोही नभएर डी. एल. मुडी थिए ।

मुडीको बारेमा सुसमाचार प्रचारक हेन्री भार्लेले भनेका थिए, “परमेश्वरको निम्ति पूर्ण रूपमा समर्पित यस मानिसद्वारा ... उहाँले कस्तो काम गर्नुहुनेछ भनी संसारले अझै देख्न बाँकी नै छ ।” तिनले भनेजस्तै पछिल्ला वर्षहरूमा परमेश्वरले मुडीलाई अद्भूत रूपमा चलाउनुभयो ।

डी. एल. मुडीको पुरा नाउँ हो, ड्विट लेम्यान मुडी । तिनी उन्नाइसौँ शताब्दीका एक महान् वक्ता हुन् । ह्वाइटफिल्डपश्चात् परमेश्वरको निम्ति दुई ओटा महादेश हल्लाउने पहिलो सुसमाचार प्रचारक थिए मुडी । तिनी सुसमाचार प्रचारकसाथै प्रकाशक थिए । तिनले मण्डली, बाइबल स्कुल र प्रकाशनको स्थापना गरेका थिए ।

बुबा एडविन जे. मुडी र आमा बेत्सी मुडीबाट ५ फेब्रुअरी १८३७ मा डी. एल. मुडीको जन्म अमेरिकामा भएको थियो । एडविन र बेत्सीबाट जन्मेका ९ जना सन्तानमध्ये मुडी छैटौँ सन्तान थिए । मुडी केवल ४ वर्षको हुँदा तिनका पिताको मृत्यु भएको थियो । पतिको मृत्यु भएपछि त्यति ठुलो परिवारलाई पाल्न बेत्सीलाई हम्मेहम्मे परेको थियो । सानै उमेरदेखि बाँच्नको लागि कमाउनुपरेको थियो मुडीले । तिनले केवल सात कक्षा बराबरको शिक्षा हासिल गरे ।

डी. एल. मुडी १७ वर्ष पुगेपछि तिनी बोस्टनमा भएका आफ्ना नातेदार (अङ्कल) को जुत्ता पसलमा गए, काम गर्नको लागि । परमेश्वरले तिनलाई कति धेरै माया गर्नुहुन्छ भन्ने वचन सुनेपछि १८ वर्षको उमेरमा मुडीले आफ्नो जीवन प्रभु येशूमा सुम्पे । त्यसको केही समय बितेपछि तिनी सिकागो प्रस्थान गरे जहाँ तिनले पैसा कमाउने उद्देश्यले जुत्ता बेच्ने काम गरे । व्यापारमा तिनी निकै मिहिनेती भए तापनि तिनी धार्मिक कामको लागि आकर्षित थिए । तिनका मित्रहरूको भनाइअनुसार यदि तिनी व्यापारमा नै लागिरहेका भए तिनी करोडपति हुन्थे ।

ख्रीष्टाब्द १८५८ मा सिकागोमा तिनले मिसन सन्डे स्कुल खोले जुन छिट्टै मण्डलीमा परिणत भयो । सामाजिक र सुसमाचारीय काममा केन्द्रित हुन सकोस् भन्ने हेतुले १८६१ सम्म आइपुग्दा तिनले आफ्नो व्यापारको कामलाई छाडिदिए ।

१८६२ मा मुडी इम्मा सी. रेभेलसित वैवाहिक बन्धनमा बाँधिए जुन बेला तिनी २५ वर्ष पुगेका थिए भने रेभेल १९ वर्षकी थिइन् । परमेश्वरले यी दम्पतीलाई तिन सन्तान दिनुभयो: इम्मा, विलियम र पावल ।  

ख्रीष्टाब्द १८७२ मा मुडी इङ्गल्यान्ड जाँदा तिनले मण्डलीका कैयौँ सभाहरूमा बोले । तिनी प्रसिद्ध वक्ता बनिसकेका थिए । मुडी बाइबल इन्स्टिच्युटद्वारा प्रकाशित पत्र–पत्रिकाहरूले मुडीलाई उन्नाइसौँ शताब्दीकै महानतम प्रचारकको रूपमा उल्लेख गर्थे । तिनका प्रवचनहरू सुन्न हजारौँ मानिसहरूको भिड लाग्थे । तिनका प्रवचनहरू किताबहरूमा छापिन्थे; पत्र–पत्रिकाहरूमा छापिन्थे र पर्चाहरूमा छापिन्थे ।

१६ नोभेम्बर १८९९ मा तिनले लूका १४:१६–२६ बाट आफ्नो अन्तिम प्रवचन तोडे । त्यस उपदेशलाई सुनेर उक्त रात सैयौँ मानिसहरूले आफ्नो जीवन येशूमा सुम्पे । त्यसपछि तिनी निकै बिरामी परे अनि ६२ वर्षको उमेरमा २२ डिसेम्बर १८९९ मा तिनी सदाको लागि प्रभुको घरमा प्रस्थान गरे । भनिन्छ, मृत्युको क्षणमा तिनले यी वचनहरू बोलेका थिए, “म पृथ्वी पछिल्तिर हटिरहेको देख्दै छु; स्वर्ग नजिकिँदै छ । परमेश्वरले मलाई डाक्दै हुनुहुन्छ । यो मेरो विजय हो । यो मेरो राज्याभिषेकको दिन हो । यो महिमित छ । परमेश्वर डाक्दै हुनुहुन्छ र म जानैपर्छ ।”

मुडी आफैले कुनै कृति नलेखेको भए तापनि तिनका प्रवचनहरूसाथै तिनका अध्ययनहरूलाई पछि सङ्कलन गरिएको थियो । तिनका प्रवचनहरू सुनेर दस लाख मानिसहरूले प्रभु येशूलाई स्वीकार गरेको अनुमान गरिएको छ ।

डी. एल. मुडी परमेश्वरमा पूर्णत: समर्पित सेवक थिए; तिनी प्रार्थनाको योद्धा थिए; परमेश्वरको वचनका विद्यार्थी थिए; विनम्र व्यक्ति थिए; रुपियाँ–पैसाको मोहबाट टाढा थिए र हराएकाहरूका निम्ति जोसिला थिए ।