ख्रीष्टको जीवनी, मृत्यु र पुनरुत्थानको लागि साक्षी निकै मजबुत छ

ख्रीष्टाब्द १७९५ मा जन्मेका थोमस अर्नोल्ड इङ्गल्यान्डका परिचित शिक्षा विशेषज्ञसाथै इतिहासकार थिए । अक्सफोर्ड विश्वविद्यालयमा प्राध्यापकसमेत रहेका अर्नोल्ड लेखक पनि थिए । तिनकाअनुसार येशू ख्रीष्टको जीवनी, मृत्यु र पुनरुत्थानको लागि साक्षी निकै मजबुत छ । तिनले भनेका छन्:    

हाम्रा प्रभुको जीवनी, मृत्यु र पुनरुत्थानको लागि साक्षी सन्तुष्टप्रद छ भनी देखाउन सकिन्छ र प्राय: देखाइएको पनि छ । सामान्य नियमहरूमुताबिक असल साक्षीबाट खराब साक्षीलाई छुट्टयाउँदा यो असल छ । हरेक न्यायाधीशले आफ्नो मुद्दालाई निकै महत्त्वपूर्ण ठानेझैँ हजारौ र दसौँ हजार मानिसले यसलाई होसियारीपूर्वक एक एक गरी केलाएका छन् । म आफैले पनि धेरै पटक त्यसो गरेको छु, अरूलाई मनाउन होइन तर आफैलाई सन्तुष्ट पार्न । ... र मानव–जातिको इतिहासमा एउटा निष्पक्ष खोजकर्ताको लागि ख्रीष्ट मर्नुभयो र मृतकहरूबाट बौरी उठ्नुभयो भन्ने सत्यताको निम्ति जति असल र पर्याप्त साक्षी छ त्यति साक्षी अर्को कुनै सत्यताको लागि भएको मलाई थाहा छैन ।

Leave Your Comments Here.

वाटरगेट प्रकरणले ख्रीष्टको पुनरुत्थानको पुष्टि गर्दछ— चाल्र्स कोलसन

चाल्र्स कोलसन अमेरिकाका सैँतिसौँ राष्ट्रपति रिचार्ड निक्सोनका कानुनी सल्लाहकार थिए । कोलसन वाटरगेट प्रकरणका एक जिम्मेवार व्यक्ति थिए जुन प्रकरणले गर्दा तिनले बदनामी मात्र कमाएनन् तर सात महिने जेल जीवन पनि गुजार्नुपर्‍यो । बिसौँ शताब्दीका अति नै प्रभावशाली रक्षाशास्त्री सी. एस. लेविसद्वारा लिखित मेएर क्रिस्चियानिटी नामक पुस्तक पढेपछि ख्रीष्टाब्द १९७३ मा तिनी ख्रीष्टियान बनेका थिए । नयाँ जन्मपश्चात् तिनले आफ्नो अद्भूत खुबीलाई खराबीको निम्ति नभई भलाइको निम्ति प्रयोग गर्न थाले । तिनको भनाइअनुसार वाटरगेट प्रकरणले येशू ख्रीष्टको पुनरुत्थानको पुष्टि गर्दछ । तिनले व्यक्त गरेका छन् ।  

“पुनरुत्थान एउटा सत्यता हो भनी म जान्दछु र वाटरगेट काण्डले यसलाई प्रमाणित गरिदिएको छ । कसरी ? किनकि मृतकहरूबाट बौरी उठ्नुभएको येशूलाई देखेका छन् भनी १२ जना मानिसले गवाही दिए । त्यसपछि एक पटक पनि त्यसलाई इन्कार नगरी तिनीहरूले त्यस सत्यतालाई ४० वर्षसम्म घोषणा गरे । प्रत्येकलाई कुटियो; यातना दिइयो; ढुङ्गाले हानियो अनि झ्यालखानामा थुनियो । यो साँचो थिएन भने तिनीहरूले यस्ता दु:खहरू सहँदैनथ्ये । वाटरगेट प्रकरणमा संसारका सबैभन्दा शक्तिशाली १२ जना मानिसहरूलाई छानियो जसले एउटा झुटलाई तिन हप्तासम्म पनि जोगाइराख्न सकेनन् । १२ जना प्रेरितहरूले एउटा झुटलाई ४० वर्षसम्म जोगाउँदै छन् भनी तपाईं भन्दै हुनुहुन्छ जुन बिलकुलै असम्भव छ ।”

वाटरगेट प्रकरण एउटा मुख्य राजनीतिक काण्ड थियो जुन अमेरिकामा ख्रीष्टाब्द १९७० को दसकमा घटेको थियो । “वाटरगेट” शब्दले वासिङ्गटन डी. सी. स्थित वाटरगेट होटललाई उल्लेख गर्दछ जुन होटेल डेमोक्रेटिक पार्टीको नेसनल हेडक्वार्टर थियो, ख्रीष्टाब्द १९७२ मा । हेडक्वार्टरमा चोरी गर्ने क्रममा धेरै मानिसहरू समातिए र त्यसलाई तत्कालीन अमेरिकी राष्ट्रपति निक्सोनले लुकाउने कोसिस गरे । उक्त कुरो पछि सार्वजनिक भएपछि तिनले राजीनामा दिए र सर्वोच्च अदालतको फैसलामुताबिक कति जना जेलमा कोचिए ।

यस प्रकरणलाई येशूको पुनरुत्थानसँग जोड्नुको कारण यही हो कि यदि येशूका चेलाहरूले काल्पनिक कथाको रचना गरी त्यसलाई यथार्थ बनाउन खोजेका थिए भने त्यो पर्दाफास हुन्थ्यो जस्तो वाटरगेट काण्डमा भयो । तर येशूका चेलाहरूले त्यही लेखे र भने जे तिनीहरूले देखेका थिए र अनुभव गरेका थिए र त्यसैको निम्ति तिनीहरू सहिद पनि भए ।

Leave Your Comments Here.

बाइबलीय भविष्यवाणीमुताबिक नै एदोमको पतन भएको थियो

एदोमको पतनको विषयमा यर्मियाले लेखे, “‘तैंले प्रेरणा दिएको त्रास र तेरो ह्दयको घमण्डले तँलाई धोका दिएको छ । हे चट्टानका चिराहरूमा बस्ने, हे डाँडाका टाकुराहरू ओगटेर बस्ने, तैंले आफ्नो गुँड गरुडको झैँ अल्गोमा बनाए तापनि म तँलाई त्यहाँबाट तल झार्नेछु’ परमप्रभु भन्नुहुन्छ । ‘एदोम अति त्रासको पात्र हुनेछ । त्यसका सबै चोटहरू देखेर त्यहाँबाट जाने सबै तर्सनेछन् र त्यसको गिल्ला गर्नेछन्” (यर्मिया ४९:१६–१७) । यर्मियाले करिब ६२७–५८६ ख्रीष्टपूर्वको बीचमा भविष्यवाणी गरेका थिए । अम्मोन, मिश्र र मोआबजस्तै (यर्मिया ४६:२६; ४८:४७; ४९:६) एदोमको पुनस्थापनाको बारेमा कुनै भविष्यवाणी गरिएको हामी पाउँदैनौं । अगमवक्ताको भनाइअनुसार एदोम एकपटक पतन भएपछि सदाको लागि उजाड हुने थियो । एदोमको पतनको विषयमा अन्य अगमवक्ताहरूले पनि भविष्यवाणी गरेका छन् (यशैया ३४:५–८; इजकिएल २५:१३–१४; ओबदिया ८–१० आदि) ।

मृत सागरको पूर्वमा अवस्थित एदोम मानवीय दृष्टिकोणबाट दुर्जेय देखिन्थ्यो । यसको लमाइ करिब ११० माइल थियो भने चौडाइ ६० माइल थियो । यस आयतकार राज्यको क्षेत्रफल ६,६०० वर्ग माइल थियो । इस्राएलको चिरस्थायी शत्रुको रूपमा चिनिने एदोमले भौगोलिक रूपले प्राय: अभेद्य अवस्थामा देखिने आफ्नो राज्यबारे घमण्ड गथ्र्यो । तर अगमवक्ताले भविष्यमा हुने यसको पतनको ठोकुवा गरे ।

करिब १२५ ख्रीष्टपूर्वमा एदोमीहरू यहूदी मकाबी जोन हर्कानसद्वारा आक्रमण गरिए । ख्रीष्टाब्द ७० मा भएको यरूशलेमको पतनसँगै एदोमीहरूले छुट्टै जातिय समूहको रूपमा आफ्नो अस्तित्व गुमाए । पछि ख्रीष्टाब्द ६३६ मा यो भूमि मुसलमानहरूद्वारा कब्जा गरिए अनि यो उजाडस्थानमा परिणत भयो । एदोमको पतनको विषयमा गरिएको पत्याउनै नसकिने भविष्यवाणी कसरी पुरा भयो भनी डेभिड हिगिङ्गसले वर्णन गरेका छन्, “एदोमको निर्जनताको विषयमा पटक–पटक भविष्यवाणी गरिएको छ । अगमवक्ताहरूका समयमा यस्तो भविष्यवाणी बिलकुल पूरा हुँदैन जस्तो देखिन्थ्यो । एदोमीहरूलाई धपाएपछि पनि नबाती कुलका मानिसहरूले त्यहाँ समृद्ध सभ्यताको विकास गरे, जुन शताब्दीऔंसम्म जारी रहयो । तर परमेश्वरले भन्नुभएको छ, ‘म त्यसलाई उजाड पार्नेछु ।’ आज यो भूमि मरुभूमिमा परिणत भएको छ । परमेश्वरको साँचो वचनको लागि यो मूक साक्षी हो । पेट्रा [एदोमको राजधानी] यस भविष्यवाणीको अक्षरश: समाप्तिको उल्लेखनीय उदाहरण हो । ४००० मानिस अटाउने रङ्गशाला, मन्दिरहरू, वेदीहरू र स्मारकहरू भएको यो भव्य प्राचीन राजधानी अहिले मौन र एक्लो छ । समयको वेगसँगै यी नष्ट हुँदै आएका छन् ।”

(नोट: यो लेखांश कमल अधिकारीद्वारा लिखित प्राचीन बाइबलका लागि आधुनिक साक्षीहरू नामक पुस्तकको पाठ आठ: पुरा भएका भविष्यवाणीहरूबाट साभार गरिएको हो ।)

Leave Your Comments Here.