सडके वक्ताको प्रवचनबाट प्रभावित भएका टोजर परिचित लेखक बने

ख्रीष्टाब्द १८९७ मा अमेरिकामा जन्मेका ए. डब्लु. टोजर पास्टर, प्रचारक, लेखकसाथै पत्रिकाका सम्पादक थिए । तिनको कामको कदर गर्दै तिनलाई दुई ओटा मानार्थी विद्यावारिधि प्रदान गरिएको थियो । कुनै औपचारिक ईश्वरशास्त्रीय तालिमविना नै पास्टरिय सेवामा होमिएका टोजरको नाउँ धारण गर्ने ६० ओटाभन्दा बेसी पुस्तकहरूमध्ये द परसुइट अफ गड र द नलेज अफ द होली उच्चस्तरीय ख्रीष्टियान कृतिहरू हुन् । टोजरको गवाही यस प्रकार रहेको छ । 

गरिब परिवारमा जन्मेका ए. डब्लु. टोजरले १७ वर्षको उमेरमा रबर कारखानामा काम गर्थे । एक दिन तिनी हलम्यान नाउँ गरेका ख्रीष्टियान छिमेकीसँग बाटोमा हिँड्दै थिए । तिनको काँधमा हात राख्दै ती छिमेकीले भने, “तपाईं ख्रीष्टियान हुनुहुन्छ कि हुनुहुन्न भन्ने विषयमा म छक्क परिरहेको छु । म यस विषयमा तपाईंसित कुरा गर्ने मौका खोज्दै थिएँ ।”

जवान टोजरले जवाफ दिए, “मिस्टर हलम्यान, म ख्रीष्टियान होइनँ तर मलाई यसो भन्नुभएकोमा म तपाईंलाई धन्यवाद व्यक्त गर्दछु । यस विषयमा म गम्भीर रूपमा सोच्नेछु ।”

यो ख्रीष्टाब्द १९१५ को कुरो हो । टोजर बाटोमा हिँडिरहँदा तिनले एक जना मानिसको आवाज सुने जसको आवाजले तिनलाई रोकिन बाध्य पार्‍यो । ती मानिस सडके प्रचारक रहेछन् । ती प्रचारकले भन्दै थिए, “कसरी उद्धार पाउने भनी तपाईंलाई थाहा छैन भने यसो भनी परमेश्वरलाई पुकारा गर्नुस्, ‘हे परमेश्वर, म पापीप्रति कृपालु हुनुस्’ अनि परमेश्वरले सुन्नुहुनेछ ।”

यी वचनहरूले टोजरको ह्दयमा काम गर्न सुरु गरे । तिनले यी वचनहरूलाई आफ्नो ह्दयबाट हटाउन सकेनन् । तिनी बिस्तारै घर जाँदै गर्दा तिनी प्रचारकले भनेका वचनहरूबारे सोच्दै अगाडि बढे । तिनले पहिले यस्तो वचन कहिल्यै सुनेका थिएनन् । 

टोजर घर गए अनि कोठाभित्र प्रवेश गरे र आफूले सुनेको विषयमा तिनले सङ्घर्ष गर्न थाले । तिनी कोठाबाट नयाँ सृष्टि बनेर निस्के ।

Leave Your Comments Here.