रक्षाशास्त्र (अपोलोजेटिक्स) बारे १५ ओटा भनाइहरू (भाग २)

बाइबलले मानिसहरूलाई तिनीहरूको विश्वास परमेश्वरमाथि राख्न उत्साह दिन्छ । अभाग्यवश: धेरै मानिसहरूले विश्वासलाई अन्धविश्वास वा मनको चाहको समान ठान्छन् । तर बाइबलले अपेक्षा गरेको विश्वास त बौद्धिक विश्वास हो । यो न अन्धो छ न त अबौद्धिक । बाइबलिय विश्वास कसै (परमेश्वर) माथि गरिने भरोसा हो जो हाम्रो विश्वासको योग्य हुनुहुन्छ । कसैले बाइबलको परमेश्वरमाथि विश्वास गर्दा उसले आफ्नो तर्कशक्तिलाई त्याग गर्नुपर्छ भनी उसलाई बिन्ती गरिएको छैन ।

डन स्टेवार्ट  

हामीलाई विश्वासको इमान्दार प्रतिस्पर्धीहरू हुन बोलावट भएको छ । वादविवादमा अल्झने, खराब विचार राख्ने या तर्क वितर्कको खोजी गर्नको लागि हाम्रो बोलावट भएको होइन । “प्रभुको सेवक झगडालु हुनुहुँदैन, तर हरेकको लागि दयालु, योग्य शिक्षक, सहनशील, र नम्रतासाथ आफ्ना विरोधीहरूलाई सुधार्ने हुनुपर्दछ, र शायद परमेश्वरले तिनीहरूलाई पश्चात्ताप गर्ने, सत्यतालाई बुझ्ने मन दिनुहुनेछ” (२ तिमोथी २:२४–२५) । हामीले प्रेमसाथ सत्यता बोल्नुपर्छ (एफिसी ४:१५) । परमेश्वरको सत्यतालाई कठोरसाथै प्रेम नदेखाईकन प्रयोग गर्नाले कुनै पनि व्यक्तिलाई सुसज्जित पार्दैन न त त्यसले परमेश्वरको महिमा गर्दछ ।

बोब होक्स्ट्रा   

असल दर्शनशास्त्र अस्तित्वमा हुनैपर्छ, कुनै कारणले गर्दा होइन भने पनि खराब दर्शनशास्त्रलाई जवाफ दिनुपर्नै भएकोले गर्दा हो ।

सी. एस. लेविस, साहित्यकारसाथै ख्रीष्टियान रक्षाशास्त्री

आज ख्रीष्टियमत सङ्घर्षमा छ । यसले सेकुलर संसारको विरुद्धमा सङ्घर्ष गरिरहेको छ; हाम्रो विरुद्धमा शत्रुतापूर्ण व्यवहार गर्ने संसारका धर्महरूको विरुद्धमा सङ्घर्ष गरिरहेको छ; झुटा शिक्षा र रहस्यमय धर्महरूको विरुद्धमा सङ्घर्ष गरिरहेको छ; हाम्रा ईश्वरशास्त्रीय सेमिनारीहरूमा भएका भ्रष्ट ईश्वरशास्त्रको विरुद्धमा सङ्घर्ष गरिरहेको छ; र प्रायश: पुल्पिटमा सङ्घर्ष गरिरहेको छ; हाम्रा सबै किनाराहरूमा वरिपरि भएका दुष्टका सबै रूपहरूको विरुद्धमा सङ्घर्ष गरिरहेको छ । मण्डली सङ्घर्षमा नै जन्म्यो; यो सङ्घर्षमा नै जिउँछ र यसले सङ्घर्षमा नै विजय हासिल गर्छ भन्ने कुरालाई महसुस नगर्ने व्यक्ति वास्तवमा मूर्ख हो । हामीलाई क्रूसका सिपाहीहरू हुन डाकिएको छ । र, यदि हामी क्रूसका सिपाहीहरू बन्छौँ भने यसको अर्थ हुन्छ कि हामीले युद्धका पोशाकहरू धारण गर्नुपर्छ । त्यसकारण २ तिमोथी ४ अध्यायमा पावलले भन्न सके, “मैले उत्तम लडाइँ लडेको छु” (पद ७) । तिनले यसो भनेनन्, “मैले लामो छुट्टी लिएको छु ।” मैले उत्तम लडाइँ लडेको छु; मैले दौड सिद्ध्याएको छु; मैले विश्वासलाई बचाइराखेको छु । तर आज ख्रीष्टियमतमा हामीले सामना गरिरहेको समस्या (र यो सङ्कष्टमय परिस्थितिमा पर्नुको कारण) यो हो कि ख्रीष्टियान मण्डलीको ठुलो हिस्साले संसारसित सङ्घर्ष गर्दैन । र, त्यो हाम्रो एउटा महानतम कमजोरी हो ।

वाल्टर मार्टिन, ख्रीष्टियान रक्षाशास्त्रीसाथै लेखक

ख्रीष्टियमतका सिमाभन्दा बाहिर रहेकाहरूले यसलाई विरलै बुझ्छन् । वास्तवमा ख्रीष्टियमतलाई गलत बुझाइबाट जोगाउनु सम्भवत: रक्षाशास्त्रीले सामना गरेको एउटा महानतम काम हो ।

अलिस्टर ई. म्याकग्रेथ, ख्रीष्टियान रक्षाशास्त्री, ईश्वरशास्त्रीसाथै वैज्ञानिक

साधारणतया तर्क गर्न तयार नहुने व्यक्तिले उपहासमा उडाउने काम गर्दछ ।

जी. के. खेस्टर्टोन, ख्रीष्टियान रक्षाशास्त्री, दार्शनिकसाथै ईश्वरशास्त्री 

ख्रीष्टियान विश्वासले हाम्रो समझलाई तासीमा थन्काउनुपर्छ वा सामान्य बुद्धिसाथै इतिहासलाई खुल्लमखुल्ला अपमान गर्नुपर्छ वा अन्धो रूपमा विश्वास गर्नुपर्छ भनी आग्रह गर्दैन । तर्कसङ्गत, साक्षीबारे पूर्णत: सूचित व्यक्तिले निश्चयतासाथ विश्वास गर्न सक्छ ।

विलियम लेन क्रेग, ख्रीष्टियान रक्षाशास्त्री, दार्शनिकसाथै लेखक

मानिसको लागि सबैभन्दा व्यावहारिक र महत्त्वपूर्ण कुरो अझै पनि विश्वबारे उसको दृष्टिकोण नै हो ।

जी. के. खेस्टर्टोन, ख्रीष्टियान रक्षाशास्त्री, दार्शनिकसाथै ईश्वरशास्त्री 

ख्रीष्टियमत साँचो हो भनी विश्वस्त भएको खण्डमा मात्रै मानिसहरू ख्रीष्टियान बन्नेछन् । यदि मानिसहरूले ख्रीष्टियमत साँचो हो भनी विश्वास गरे मात्रै तिनीहरू ख्रीष्टियान भइरहन्छन् । रक्षाशास्त्रीको काम ख्रीष्टियमत साँचो हो भनी प्रमाणित गर्नु हो । उद्धार एउटा अलौकिक कार्य हो । तर कसैले कुनै व्यक्ति ख्रीष्टियान भएको छ भनेर सुन्दा उसले पहिले यो साँचो थियो भनी विश्वास गरेको थिएन । अनन्त जीवन सित्तैँको वरदान हो जुन येशू ख्रीष्टमाथिको विश्वासद्वारा मात्र प्राप्त हुन्छ भनी ऊ कुनै तरिकाले विश्वस्त हुन पुग्यो ।

रिक सेँक

सबै धर्महरू उही होइनन् । सबै धर्महरूले परमेश्वरलाई देखाउँदैनन् । सबै धर्महरू उही हुन् भनी सबै धर्महरूले बताउँदैनन् । हरेक धर्ममा परमेश्वर को हुनुहुन्छ वा को हुनुहुन्न र जीवनको उद्देश्य के हो भनी खास तवरले परिभाषित गर्ने सम्झौता नगर्ने प्रतिबद्धता हुन्छ ।

रबि जकरिया, ख्रीष्टियान रक्षाशास्त्री, लेखकसाथै प्रचारक

मानिसले सोच्नुपर्छ; उसले आफ्ना सबै इन्द्रियहरूलाई प्रयोग गर्नुपर्छ; उसले जाँच गर्नुपर्छ; उसले तर्क गर्नुपर्छ; सोच्न नसक्ने मानिस मानिसभन्दा कम हुन्छ; नसोच्ने मानिसले आफैलाई धोका दिन्छ; सोच्न डराउने मानिस अन्धविश्वासको दास हो ।

रोबर्ट ग्रिन इङ्गरसोल, वकिलसाथै राजनीतिज्ञ

ख्रीष्टियानहरूमा भएको आशाको लागि कारण दिन सक्षम हुनु यी दिनमा तिनीहरूका लागि खास गरी महत्त्वपूर्ण छ । ... अविश्वासी र गैरविश्वासीहरूबाट आएका चुनौतिहरू हाम्रा वरिपरि छन् । ख्रीष्टियान भएको नाताले हामी अवतार हुनुभएका वचन [लोगोस] अर्थात् परमेश्वरको तर्कलाई पुज्छौँ । तसर्थ, हाम्रा आधारभूत विश्वासहरूप्रति खुला रूपमा जडवादी हुनेहरूलाई [हाम्रो विश्वास] बताउन हामी तयार हुनुपर्छ । हामी मौन रह्यौँ भने हामीले परमेश्वरको विरुद्धमा पाप गरेका हुन्छौँ ।

डी. जेम्स केनेडी, पास्टरसाथै प्रचारक

ख्रीष्टियानहरूका लागि रक्षाशास्त्र ऐच्छिक होइन । ... हामीले के विश्वास गर्छौं र किन विश्वास गर्छौं भनेर जान्न हामीलाई आज्ञा दिइएको छ ।

फ्र्याङ्क टुरिक, लेखक, वक्तासाथै ख्रीष्टियान रक्षाशास्त्री

सुसमाचारहरूमा तपाईंलाई मन परेका कुराहरूलाई विश्वास गरी मन नपरेका कुराहरूलाई इन्कार गर्नुभयो भने तपाईंले विश्वास गर्नुभएको कुरो सुसमाचार होइन, त्यो त तपाईं आफै नै हुनुहुन्छ ।

अगस्टिन, ख्रीष्टियान ईश्वरशास्त्रीसाथै दार्शनिक 

यदि सत्यताले चोट पुर्‍याउँछ भने पुर्‍याओस् । परमेश्वरलाई चोट पुर्‍याउँदै मानिसहरूले आफ्नो सम्पूर्ण जीवन गुजार्दै आएका छन् । केही क्षणको लागि तिनीहरूलाई चोट लागोस् ।

जोन माकार्थुर, पास्टर, प्रचारकसाथै लेखक

Leave Your Comments Here.