चाल्र्स स्परजिन: प्रचारकहरूका राजकुमार

तिनी केवल १५ वर्ष पुगेका थिए । पापले कायल भएर क्षमाको लागि तिनी एउटा मण्डलीमा पुगे । स्थानीय प्रचारकले बाइबललाई मुश्किलैले पढ्न सक्थे । वक्ताको खण्ड थियो, “मतिर फर्क, र उद्धार पाओ, हे पृथ्वीका सबै पल्लो छेउका हो, किनकि म परमेश्वर हुँ र अरू कोही छैन” (यशैया ४५:२२) । वचन साधारण र सङ्क्षिप्त भए तापनि बाइबलको वचनले ठिटोको ह्दयलाई छोयो । त्यही दिन अर्थात् ६ जनवरी १८५० को दिन तिनले आफ्नो जीवन प्रभुमा सुम्पे र बाँकी जीवन उहाँकै निम्ति बिताए । तिनको नाउँ हो— चाल्र्स स्परजिन ।

उन्नाइसौँ शताब्दीको उत्तराद्र्धमा इङ्गल्यान्डका सर्वोत्तम प्रचारक थिए, स्परजिन । “प्रचारकहरूका राजकुमार” भनेर चिनिने स्परजिनले जीवनमा अनुमानित एक करोड मानिसहरूलाई प्रचार गरे । तिनले लन्डनस्थित मेट्रोपोलिटन टेबरनेकलमा ३८ वर्षसम्म पास्टर भई प्रभुको सेवा गरे । तिनका हजारौँ प्रवचनहरू संसारको चारैतिर पुगेका छन् । तिनका रचनाहरू मनग्गे भाषाहरूमा अनुवाद गरिएका छन् । अनाथालय खोली सामाजिक सेवामा पनि होमिएका स्परजिन पत्रिकाका सम्पादक पनि थिए । प्रवचन, आत्मचरित्र, टिप्पणीसाथै विभिन्न साहित्यिक कृतिहरूमा कलम चलाएका स्परजिनले कविता, भजनसाथै प्रार्थनाको विषयमा पनि लेखेका छन् । स्रोताहरूले मन्त्रमुग्ध भएर तिनका प्रवचनहरू सुन्थे । धेरै ख्रीष्टियानहरूका लागि तिनका लिखित प्रवचनहरू सर्वोत्तम ख्रीष्टियान साहित्य बनेका छन् ।

१९ जुन १८३४ मा स्परजिनको जन्म इङ्गल्यान्डमा भएको थियो । ३ मे १८५० मा बप्तिस्मा लिएका स्परजिनले १६ वर्षको उमेरमा आफ्नो जीवनको पहिलो सुसमाचारिय प्रवचन तोडे । १९ वर्षको उमेरमा लन्डनस्थित न्यु पार्क स्ट्रिट च्यापलमा पास्टरको भूमिका निभाउन तिनलाई निमन्त्रणा गरियो । त्यसबेला यो नै सबैभन्दा ठुलो ब्याप्टिस्ट मण्डली थियो । तिनको प्रचारको असाधारण खुबीको कारणले केही महिनाभित्रमा नै तिनी प्रसिद्ध प्रचारक कहलाइए । हरेक हप्ता तिनका प्रवचनहरू पत्रिकामा छापिन्थे र व्यापक रूपमा प्रचार–प्रसार हुन्थे । आफू स्वर्गीय घरमा प्रस्थान नगरुञ्जेलसम्म तिनले झण्डै ३,६०० ओटा प्रवचन तोडे र ४९ ओटा ठेली प्रकाशित गरे । ईश्वरशास्त्रको अध्ययनको लागि कहिल्यै स्कुल नगएको भए तापनि २२ वर्षकै उमेरमा तिनी लन्डनकै सर्वाधिक लोकप्रिय प्रचारक बनिसकेका थिए । 

८ जनवरी १८५६ मा स्परजिन वैवाहिक बन्धनमा बाँधिए, सुसन्नासँग । तिनीहरूबाट जुम्ल्याहा छोरा जन्मे— चाल्र्स र थोमस । 

हरेक हप्ता ५,००० को भिडलाई प्रचार गर्ने स्परजिनले एक पटक २३,००० को भिडलाई सम्बोधन गरेका थिए । तिनले आफ्नो प्रवचनलाई पुरै लेख्ने गर्थे यद्यपि पुल्पिटमा तिनले रूपरेखा मात्र लैजाने गर्थे । तिनले स्रोताहरूलाई कहिल्यै वेदीमा बोलाउँदैनथ्ये तर कोही तिनको वचनबाट प्रभावित भई येशू ख्रीष्टको बारेमा थप जान्न चाहेको खण्डमा भोलिपल्ट बिहान तिनको घरमा गई तिनलाई भेट्न सक्थ्यो । अर्को दिन सधैँ कोही न कोही तिनको ढोकामा हुन्थ्यो ।

नियमित प्रचारका अतिरिक्त तिनले मण्डलीहरू स्थापना गरे; अनाथालय खोले, पास्टरर्स कलेजको सुरुआत गरे । तिनले मासिक ख्रीष्टियान पत्रिकाको सम्पादन गरे र ख्रीष्टियान साहित्यको विकासमा उल्लेखनीय भूमिका निभाए ।

३१ जनवरी १८९२ मा तिनी प्रभुको घरमा गए ।

    

Leave Your Comments Here.