के येशूका जीवनीकारहरू प्रत्यक्षदर्शीहरू हुन् ?

येशू ख्रीष्ट परमेश्वरका अद्वितीय पुत्र हुनुहुन्छ वा हुनुहुन्न भन्नेजस्ता ऐतिहासिक विषयहरूको लागि पनि प्रत्यक्षदर्शीको गवाही अत्यधिक महत्त्वपूर्ण हुन्छ । के हामीसँग येशूको बारेमा बताउने प्रत्यक्षदर्शीका विवरणहरू छन् त ? येशूलाई व्यक्तिगत रूपमा भेट्ने, उहाँका शिक्षाहरू सुन्ने, उहाँका आश्चर्यकर्महरूलाई देख्ने, उहाँको मृत्युको साक्षी बन्ने र मृत्युपश्चात् उहाँलाई देखेको दाबी गर्ने मान्छेहरूले लेखेका कागजातहरू हामीसँग छन् त ? छन् भने येशूको वास्तविक चिनारीको लागि ती अमूल्य छन् ।

बाइबलका दुई ओटा मुख्य भागमध्ये पछिल्लो भागलाई नयाँ करार भनेर चिनिन्छ । नयाँ करारका अगिल्ला चार ओटा पुस्तकका लेखकहरू क्रमश: मत्ती, मर्कूस, लूका र यूहन्ना हुन् भनिएको छ । यी चार जना लेखक येशूका जीवनीकारहरू हुन् । पृथ्वीमा भएको उहाँको सेवा–कार्य र मानव–जातिको पापको निम्ति उहाँको स्थानापन्न मृत्युलाई उल्लेख गरेका छन् तिनीहरूले । अगिल्ला तिन ओटा सुसमाचारले उहाँको जीवनीलाई झण्डै उही किसिमले प्रस्तुत गरेका छन् । तसर्थ, तिनीहरूलाई “सम्मिलित सुसमाचारहरू” भनेर चिनिन्छ । चौथो सुसमाचारका लेखक आफ्नो प्रस्तुतीकरणमा अलि फरक छन् ।

सुसमाचारहरू कसले लेखे भन्ने विषय अत्यधिक महत्त्वपूर्ण छ । पछिल्लो समयमा आएर येशूका जीवनीकारहरूको चिनारीको सम्बन्धमा प्रश्न उठाइएको छ । येशूको मृत्यु भएको कैयौँ वर्षपछि मत्ती, मर्कूस, लूका र यूहन्नाका नाउँ राखी सुसमाचारहरू लेखिए, यथार्थत: तिनीहरू वास्तविक लेखकहरू होइनन् भनी आरोप लगाइएको छ ।

तर प्रारम्भिक मण्डलीको एकत्रित साक्षीअनुसार येशूका बार्‍ह चेलामध्ये एक मत्ती नामक चेलाले नै पहिलो सुसमाचार लेखे । तिनलाई लेवी पनि भनिएको छ जसले येशूको अनुयायी हुनुअगि महसुल उठाउने काम गर्थे । पत्रुसका मित्र यूहन्ना मर्कूसले दोस्रो सुसमाचार लेखे । पावलका प्रिय वैद्य भनी चिनिने लूकाले तेस्रो सुसमाचार र प्रेरितको पुस्तक लेखे ।

यिनीहरू वास्तविक लेखक नभए पनि यिनीहरूको नाउँमा कसैले लेखेको हो कि भन्ने शङ्का सजिलैसित दूर गर्न सकिन्छ । मर्कूस र लूका बार्‍ह चेलामध्येका थिएनन् । मत्ती बार्‍हमध्ये एक भए पनि तिनी महसुल उठाउने पेसाका थिए जुन पेसालाई घृणित ठानिन्थ्यो । कसैले चालबाजी गर्न खोजेको भए तापिन पत्रुस, मरियम, याकूबजस्ता नामहरू जोड्ने थिए किनकि यी नामहरूमा मत्ती, मर्कूस र लूकाका नामहरूमाभन्दा बढी तौल छ । ज्यादै पछि लेखिएका अपोक्रिफासम्बन्धी सुसमाचारहरूमा यसै गरिएको पाउँछौँ हामी ।

चौथो सुसमाचारका लेखक यूहन्ना हुन् भन्ने कुरामा कुनै शङ्का छैन । तर कुनचाहिँ यूहन्ना (प्रेरित यूहन्ना कि अर्कै यूहन्ना) हुन् भन्ने बारेमाचाहिँ विवाद छ । प्रेरित यूहन्नाद्वारा नै चौथो सुसमाचार लेखिए भन्नेमा नै अधिकतर साक्षी पाइन्छ ।

मत्ती र मर्कूसले नै अगिल्ला दुई ओटा सुसमाचार लेखेका हुन् भनी ख्रीष्टाब्द १२५ मा पपियासले प्रष्ट पारेका छन् । तिनको साक्षी प्राचीनतम र सम्भवत: सर्वाधिक उल्लेखनीय छ । ख्रीष्टाब्द १८० मा आइरेनियसले पनि सो पुष्टि गरे, “मत्तीले हिब्रूहरूको आफ्नै भाषामा तिनीहरूका बिचमा तिनको आफ्नो सुसमाचार प्रकाशित गरे जुन समयमा पत्रुस र पावल रोममा सुसमाचार प्रचार गर्दै र त्यहाँ मण्डली स्थापना गर्दै थिए । तिनीहरूको प्रस्थानपछि चेलासाथै पत्रुसका अनुवादक मर्कूसले पत्रुसका वचनहरूको सारलाई लिपिबद्ध गरी हामीलाई सुम्पिदिए । पावलका अनुयायी लूकाले आफ्ना शिक्षकद्वारा प्रचार गरिएको सुसमाचारलाई लेखे । एसियामा अवस्थित एफिससमा बस्दा प्रभुका चेला यूहन्ना जो उहाँको छातीमा ढल्केर बसेका थिए तिनले आफ्नो सुसमाचारको रचना गरे ।”

तब हामी निश्चयतासाथ भन्न सक्छौँ कि मत्ती, मर्कूस, लूका र यूहन्ना नै वास्तविक लेखकहरू हुन् र तिनीहरूद्वारा अभिलिखित सुसमाचारहरू प्रत्यक्ष वा अप्रत्यक्ष रूपमा प्रत्यक्षदर्शीका गवाहीहरूमा आधारित छन् । पहिलो शताब्दीमा सुसाचारका लेखकहरूको चिनारीको सम्बन्धमा कुनै विवाद थियो भन्ने साक्षी नहुनु उल्लेखनीय पाटो हो ।

Leave Your Comments Here.