विभिन्न धर्महरूको दृष्टिकोणमा येशू

यस ब्लगमार्फत विगत पाँच दिनमा विभिन्न धर्महरूले येशूप्रति कस्तो दृष्टिकोण बनाएका छन् भनी हामीले सरसरती हेर्‍यौँ । खास गरी हामीले पाँच ओटा धर्मले येशूप्रति बनाएको तिनीहरूको दृष्टिकोणलाई हेरेका छौँ । ती धर्म हुन्— इस्लाम, हिन्दु, बुद्ध, यहूदी र बहाइ । त्यसको निरन्तरतालाई यस आलेखमार्फत बिट मार्न चाहन्छौँ हामी ।  

संसारको दोस्रो ठुलो धर्म इस्लामको दृष्टिकोणमा येशू साँचो अगमवक्ता, मसीह, आश्चर्यकर्म गर्नुहुने जन, बुद्धिमान् शिक्षक र पापरहित व्यक्तित्व हुनुहुन्छ । उहाँ कन्याबाट जन्मनुभयो, उहाँको बारेमा भविष्यावाणी गरिएको थियो र उहाँ फेरि आउनुहुनेछ ।

तेस्रो ठुलो धर्म भनेर चिनिने हिन्दु धर्मअनुसार येशू साधु वा पवित्र मानिस, बुद्धिमान् शिक्षक, नैतिकवान् व्यक्तित्व र “ईश्वर” हुनुहुन्छ ।

नेपालमा जन्मेका गौतम बुद्धद्वारा स्थापित बुद्ध धर्मको दृष्टिमा येशू ज्ञानोदय प्राप्त व्यक्ति, बुद्धिमान् शिक्षक र पवित्र मान्छे हुनुहुन्छ ।

ख्रीष्टियमतलाई जन्म दिने यहूदी धर्मको हेराइमा येशू मरियमका पुत्र, लोकप्रिय शिक्षक, आदरणीय व्यक्तित्व र आश्चर्यकर्म गर्नुहुने जन हुनुहुन्छ । उहाँले आफू मसीह भनी हुँ भनी दाबी गर्नुभयो; उहाँ क्रूसमा टाँगिनुभयो; उहाँका चेलाहरूले उहाँ मृतकहरूबाट बौरी उठ्नुभयो भनी प्रचार गरे भन्ने कुरामा तिनीहरू विश्वास गर्छन् ।

उन्नाइसौँ शताब्दीमा आरम्भ भएको बहाइ धर्मअनुसार येशू परमेश्वरको अवतार र आश्चर्यकर्म गर्नुहुने जन हुनुहुन्छ । उहाँमा मानवीय र ईश्वरीय दुवै स्वभाव थियो र उहाँ कन्याबाट जन्मनुभयो अनि उहाँ पापको निम्ति क्रूसमा मर्नुभयो अनि बौरी उठ्नुभयो ।

येशूप्रति यी धार्मिक दृष्टिकोणहरूलाई नियाल्दा प्रस्ट छ कि येशूका अनुयायीहरूले मात्र उहाँलाई पुजेका छैनन् तर अन्य धर्मका अनुयायीहरूले पनि उहाँलाई निकै आदर व्यक्त गर्दछन् । संसारका झण्डै साँढे पाँच अरब मानिसहरूले उहाँको बारेमा केही न केही सकारात्मक दृष्टिकोण बनाएका छन् । उहाँ मात्र यस्तो धार्मिक संस्थापक हुनुहुन्छ जसलाई संसारका अन्य मुख्य धर्महरूले उच्च स्थान दिएका छन् । संसारका अन्य कुनै धार्मिक, राजनीतिकसाथै सामाजिक अगुवाहरूप्रति यति ठुलो श्रद्धा व्यक्ति गरिएको इतिहास छैन । येशू फरक हुनुहुन्छ । किन ? किनकि यस ग्रहमा बाँच्ने सारा मानिसहरूमध्ये उहाँ मात्रै यस्तो व्यक्तित्व हुनुहुन्छ जसले आफू परमेश्वरको पुत्र हुँ भनी संसारका अधिकांश मानिसहरूलाई विश्वास दिलाउनुभयो । परमेश्वर हुँ भन्ने आफ्नो दाबीलाई पापरहित जीवन, पुरा भएका भविष्यवाणीहरू र आफ्नो शारीरिक पुनरुत्थानबाट पुष्टि पनि  गरिदिनुभयो ।

               

               

Leave Your Comments Here.