यसरी सुन्नुभयो परमेश्वरले महिलाको प्रार्थना

उन्नाइसौँ शताब्दीमा जन्मेका एफ. बी. मेएर इङ्गल्यान्डका पास्टरसाथै प्रचारक थिए । पानी जहाजले एटलान्टिक महासागर पार गर्दै थियो । जहाजका कप्तानले मेएरलाई पहिलो तहका यात्रुहरूको बिचमा एउटा वचन तोड्न आग्रह गर्‍यो । कप्तानको अनुरोधनमा पास्टरले “उत्तर प्राप्त प्रार्थना” शीर्षकमा वचन बोले ।

स्रोताको रूपमा एक जना अज्ञेयवादी पनि उपस्थित थियो । परमेश्वर हुनुहुन्छ या हुनुहुन्न भनी थाहा छैन भन्ने दृष्टिकोणलाई अङ्गाल्ने व्यक्तिलाई अज्ञेयवादी भनिन्छ । उसका साथीहरूले उसलाई सोध्यो, “डा. मेएरको प्रवचनको विषयमा तपाईंको के राय छ ?” अज्ञेयवादीले जवाफ दियो, “उहाँले भन्नुभएको एउटै वचनमा पनि मेरो विश्वास छैन ।”   

त्यही दिन दिउँसो डा. मेएर चौथो तहका यात्रुहरूको बिचमा पनि वचन बाँड्न गए । बिहान सुन्नेहरूमध्ये धेरैले तिनलाई पछ्याएका थिए । त्यो अज्ञेयवादी पनि पास्टरको वचन सुन्नलाई पछि लाग्दै थियो जसले वक्तालाई बकबकेको संज्ञा दिएको थियो ।

सेवाको थालनीअगि अज्ञेयवादीले आफ्नो गोजीमा दुई ओटा सुन्तला हाल्यो । जाँदै गर्दा उसले बाटोमा एक जना महिलालाई सुतिरहेको भेट्टायो जसका हत्केलाहरू खुला थिए । ठट्टा गर्ने उद्देश्यले उसले महिलाको हत्केलामा ती दुई ओटै सुन्तला राखिदियो । सङ्गति सकिएपछि महिलाले एउटा सुन्तलालाई मजाले खाइरहेको भेट्टायो उसले । मुस्कुराउँदै उसले महिलालाई भन्यो, “तपाईंले निकै मिठो मान्दै सुन्तला खाँदै हुनुहुन्छ जस्तो छ ।”

“हो नि”, महिलाले उत्तर दिई, “मेरा पिता मप्रति निकै जाती हुनुहुन्छ ।”

“तपाईंका पिता ? पक्कै पनि तपाईंका पिता जीवित भएको हुन सक्दैन”,  छक्क पर्दै उसले प्रतिक्रिया जनायो ।

“परमेश्वरको महिमा भएको होस् । उहाँ जीवित हुनुहुन्छ”, महिलाले जवाफ दिई ।

“तपाईंको भनाइको मतलब के हो ?” अज्ञेयवादीले जान्न चाह्यो ।

त्यसपछि महिलाले व्याख्या गरी, “यो सामुद्रिक यात्रामा मलाई कैयौँ दिनसम्म वाकवाकी लागिरहेको थियो । मलाई सुन्तला पठाइदिनुस् भनी मैले परमेश्वरलाई बिन्ती चढाएको थिएँ । मलाई लाग्छ, प्रार्थना गर्दागर्दै म निदाएँ । जब म ब्युँझेँ, मलाई उहाँले एउटा मात्र नभएर दुई ओटा सुन्तला पठाइदिनुभएछ  !”

अज्ञेयवादी अवाक् भयो । पछि उसले येशू ख्रीष्टमाथि विश्वास गर्‍यो ।

Leave Your Comments Here.