आफ्नो परिवारको हत्यारलाई क्षमा दिइन् इलिबागिजाले

६ अप्रिल १९९४ मा पूर्वी अफ्रिकी मुलुक रुवान्डाका राष्ट्रपति सवार विमानलाई खसालियो । परिणामत: विमानमा सवार सबै नै मरे । राष्ट्रपति हुटु जातिका थिए । त्यसपछि टुट्सी जातिलाई लक्षित नरसंहार सुरु भयो । विकिपिडियाअनुसार झण्डै १०० दिन लम्बिएको उक्त जातिय नरसंहारमा रुवान्डाका पाँच लाखदेखि दस लाख मानिसहरू मरेको अनुमान गरिएको छ ।

इम्माक्युली इलिबागिजा एक जना स्त्रीको नाउँ हो जो उक्त नरसंहारमा बाँच्न सफल भइन् । उक्त अनपेक्षित नरसंहार हुँदा उनी केवल २२ वर्षकी थिइन् ।  अन्य केही स्त्रीहरूसँगै १२ फिट क्षेत्रफल भएको सानो कोठामा उनी ९१ दिनसम्म लुकेकी थिइन् । उनको शरीरको तौल २२ किलो घटेको थियो । लडाईंको बेलामा हुटु लडाकाहरूले इलिबागिजाका प्राय: सबै आफन्तहरूलाई मारिदिएका थिए । उनले आफ्ना बुबाआमासाथै परिवारका अन्य सदस्यहरू गुमाएकी थिइन् । उनी र विदेशमा अध्ययन गरिरहेका उनका जेठा दाजु एम्बल मात्र बाँचे ।

हाम्रो मानवीय स्वभाव बदलातिर लक्षित भए तापनि इलिबागिजाले आफ्ना परिवारका हत्याराहरूलाई क्षमा दिने छनौट गरिन् । आफ्नो जीवनलाई घृणाले शासन गर्न दिइननन् उनले । सजिलो नभए तापनि उनले क्षमालाई नै रोजिन् । उनले एक जना हत्यारालाई व्यक्तिगत रूपमा आमनेसामने भेट गरिन् र आफूले त्यस हत्यारालाई क्षमा दिएको कुरो प्रत्यक्ष रूपमा व्यक्त गरिन् ।

हाल इलिबागिजा अमेरिकामा बस्छिन्, आफ्ना सन्तानका साथ । उनले आफ्नो अनुभवबारे एउटा उत्कृष्ट पुस्तक लेखेकी छन्— ले फ्ट टु टेल: डिसकभरिङ्ग गड अमिड्स्ट द रुवान्डन होलोकास्ट । उनी आज प्रेरणादायी वक्ता कहलाइएकी छन् ।

परमेश्वरको कृपाको सन्देशलाई फैलाउन उनी कटिबद्ध छन् । क्षमाको विषयमा येशूको नमुनासाथै ख्रीष्टियान शिक्षाले उनले पालेको बदलाको भावनालाई मात्र पगालेनन् बरु उनी आज क्षमाको नमुना बन्न सफल भएकी छन् ।            

Leave Your Comments Here.