चन्द्र लिला: ब्राम्हण परिवारमा जन्मेर सुसमाचारको राजदूत बनेकी नेपाली चेली

दु:खै दुखले भरिएको भारी जीवन लिएर एक जना केटी शान्तिको खोजीमा भौतारिँदै थिइन् । एक दिन बाइबल बोकेको अर्को जवान केटीसित उनको भेट भयो । ती खोजकर्ताले आफै बाइबल पढ्न थालिन् । उनलाई बाइबलको वचन अति रुचि लाग्न थाल्यो । उनले सुसमाचारको सन्देशलाई निलिन् । आफ्नो स्वअध्ययनद्वारा उनले आफ्नो  जीवन प्रभु येशूमा समर्पित गरिन् । बाँकी जीवनभरि उनी ख्रीष्टको भक्त रहिन् । वर्षौंसम्म आफूले परिश्रमसाथ खोजी गरेको शान्ति आफूले कहिल्यै अपेक्षा नगरेको स्रोतबाट प्राप्त गर्न सफल भइन् उनी । उनको नाउँ हो— चन्द्र लिला ।

चन्द्र लिलाको जन्म ख्रीष्टाब्द १८४० मा राजकीय पूजाहारीको छोरीको रूपमा नेपालको काठमाडौँमा भएको थियो । विवाहको महत्त्व नै थाहा नपाईकन उनी सात वर्षको कलिलो उमेरमा वैवाहिक बन्धनमा बाँधिन पुगिन् । तर दुई वर्षपश्चात् नौ वर्ष पुग्दा उनी विधवा हुन पुगिन् । हिन्दु धर्मशास्त्रअनुसार उनका पतिको मृत्युको कारण उनी नै थिइन् भन्ने उनको बुझाइ रहेको थियो । यसरी तात्कालीन रीतिरिवाजअनुसार उनको कपाल खौरियो; उनको दुब्लो शरीरबाट उनको शरीरलाई सिँगार्ने गरगहनाहरू फुकालिए र रङ्गीचङ्गी वस्त्रलाई सेतो वस्त्रले प्रतिस्थापन गर्‍यो ।

अर्को वर्ष उनले आफ्नी आमा गुमाइन् । उनको दर्दको घाउ झनै गहिरियो । तर दयालु पिताले मलहम पट्टी लगाउने कोसिस गरे । बुबाले उनलाई संस्कृत भाषा पढ्न र लेख्न सिकाए यद्यपि त्यस बेलाको चलनअनुसार त्यो बिल्कुलै अनौठो अभ्यास थियो ।

केही वर्षपश्चात् उनी बुबासँगै भारतका भूमिहरूमा तीर्थयात्रामा सामेल भइन्, शान्तिको खोजीमा । तर ती सबै व्यर्थ ठहरिए । यात्राबाट आएको केही समयपछि उनका पिता बिरामी परे र तिनी परलोक भए । यसरी चौध वर्षको उमेरमा चन्द्र लिलाले आफ्ना भन्नेहरू सबैलाई गुमाए र उनले बाँकी जीवन एकलै गुमाउनुपर्‍यो । 

बुबाका ती पवित्र भन्ने किताबहरू पढेर उनले पत्ता लगाइन् कि भारतको चार धामसाथै बनारसमा तीर्थ यात्रा गएको खण्डमा उनले खोजेको शान्ति फेला पार्नेथिइन् । शान्तिको खोजीमा उनी पछिल्लो १७ वर्ष भारतको विभिन्न पवित्र स्थलहरू चाहारिन् तर हात लाग्यो शून्य । उनले शान्तिको खोजीको लागि केचाहिँ गरिनन् ? सन्यासी बनिन्; व्रत बसिन्; शरीर र शिरमा खरानी धसिन्; आगोको रापमा बसिन्; तातो घाममा आफ्नो शरीरलाई डढाइन्; जाडो महिनामा दिनरात पानीमा बसिन् । उनले तिन वर्षसम्म यस्तो खालको जीवन जिइन् तर सबै प्रयास निरर्थक ठहरिए ।

अन्तत: चन्द्र लिलाले खोजेको शान्ति बाइबल पढेर पाइन् । अब उनी ख्रीष्टियान भक्त बनिन्; सुसमाचारको योद्धा बनिन् । यसरी चन्द्र लिला ब्राम्हण परिवारमा जन्मेर सुसमाचारको राजदूत बनेकी नेपाली चेली हुन् । 

(नोट: यहाँ उल्लिखित सबै जानकारी डा. सिन्डी पेरीद्वारा लिखित पुस्तक A Biographical History of the Church in Nepal बाट लिइएको हो ।)

  

Leave Your Comments Here.