जोन वेस्ली: मेथोडिज्मका संस्थापक

यो ९ फेबु्रअरी १७०९ मा भएको घटना हो जुनबेला तिनी केवल ५ वर्षका थिए । रातको ११ बजिसकेको थियो तिनी बसेको घरमा आगलागी भयो । तिनी दोस्रो तलामा छाडिए । कोही एक जनाको सहायतामा झ्यालबाट तिनको उद्धार गरियो । पछि तिनकी आमाले तिनलाई “आगोबाट निकालिएको अगुल्टो” (जकरिया ३:२) को रूपमा उल्लेख गरिन् । यो अविस्मरणीय घटनाले ती बालकको मनमा अमिट छाप छाड्यो । ती बालक पछि जोन वेस्लीको नाउँले संसारैभरि प्रसिद्ध भए ।

मेथोडिज्मका संस्थापक जोन वेस्ली अठारौँ शताब्दीका एक प्रखर वक्ता थिए । पवित्रताको अभियान र पेन्टिकोस्टलवादको विकासमा तिनका रचनाहरूले महत्त्वपूर्ण भूमिका खेलेका छन् । तिनले आफ्नो  जीवन कालमा झण्डै ४०,००० ओटा प्रवचन तोडे । तिनले कैयौँ रचनाहरू छाडेर गएका छन् ।      

पिता समुएल वेस्ली र माता सुसन्ना वेस्लीबाट २८ जुन १७०३ मा जोन वेस्लीको जन्म इङ्गल्यान्डमा भएको थियो । समुएल र सुसन्नाबाट जन्मेका उन्नाइस जना सन्तानमध्ये जोन पन्ध्रौँ सन्तान थिए । जोनका पिता ख्रीष्टियान पूजाहारी थिए भने तिनकी आमा सुसन्नाले आफ्नो हरेक सन्तानलाई बाइबल सिकाउनलाई हरेक दिन समय निकाल्ने गर्थिन् । उनको पालन पोषणले जोनको आचरण र शैक्षिक निर्माणमा उल्लेखनीय भूमिका निर्वाह गरेको थियो ।

२४ मे १७३८ मा लन्डनमा जम्मा भएको एउटा सानो धार्मिक सभामा जोन वेस्लीले एउटा पृथक् अनुभव गरे जसमा तिनको ह्दयले अनौठो तवरले न्यानोपनको महसुस गरे । तिनको यस आत्मिक रूपान्तरणपश्चात् तिनले आफ्नो  जीवन सुसमाचार प्रचारमा समर्पित गरे । केवल विश्वासद्वारा ख्रीष्ट येशूमा प्राप्त हुने उद्धारको अनुभव नै आत्मिक रूपान्तरण हो । ख्रीष्टाब्द १९३९ बाट तिनले देशैभरि मेथोडिस्ट समाजहरूको स्थापना गरे । तिनको समयमा पैदल, घोडा वा रथबाट स्थल मार्गको यात्रा गर्ने चलन थियो । तिनी प्रचारको लागि औधी यात्रा गर्थे— वार्षिक रूपमा ४,००० माइल । 

अक्सफोर्डमा पढेका जोनले आफूलाई विद्वान्को रूपमा साबित गरे । तिनी चाँडै नै सेवकको रूपमा अभिषेक गरिएका थिए । अक्सफोर्डमा छँदा तिनी एउटा समूहको सदस्य बने जसले पवित्र जीवन जिउने शपथ हालेको हुन्थ्यो । त्यस समूहका सदस्यहरूले दैनिक प्रार्थना गर्थे; प्रभु–भोजमा नियमित रूपमा सहभागी हुन्थे अनि झ्यालखानाहरूमा बारम्बार भेट्न जान्थे । बाइबल र अन्य आराधनायुक्त पुस्तकहरू पढ्न पनि तिनीहरूले उल्लेखनीय समय लगानी गर्थे ।

आफ्नो सेवा–कार्यको पछिल्लो घडिमा जोन दास प्रथाको विरुद्धमा खरो रूपमा उत्रे । तिनले यस अमानवीय प्रथाको विरुद्धमा प्रवचन दिए अनि लेख रचनाहरू प्रकाशित गरे । ख्रीष्टाब्द १७७४ मा तिनले दास प्रथाको विरुद्धमा पर्चा नै निकालेका थिए । तिनी जोन न्युटन र विलियम विल्बरफोर्सका मित्र थिए जसको पहलमा ख्रीष्टाब्द १८०७ मा इङ्गल्यान्डबाट दास प्रथा कानुनत: निर्मूलन भएको थियो ।

बीबीसीले ख्रीष्टाब्द २००२ मा प्रसारण गरेको इङ्गल्यान्डको इतिहासमा १०० जना महानतम ब्रिटिस नागरिकहरूको सूचीमा जोन वेस्लीको नाउँ पचासौँ स्थानमा परेको थियो ।  

तिनी २ मार्च १७९१ मा सधैँको लागि आफ्नो अनन्त घरमा प्रस्थान गरे ।  

     

Leave Your Comments Here.