येशू ख्रीष्ट: संसारको मुक्तिदाता

येशू ख्रीष्ट ख्रीष्टियमतका संस्थापक हुनुहुन्छ । ख्रीष्टियमत संसारको सबैभन्दा ठुलो धर्म (वा मार्ग) हो । हाल झण्डै साँढे दुई अरब मानिसहरू यसका अनुयायी छन् । येशूले मानवीय चोला धारण गर्नुभन्दा पहिले पनि उहाँ अस्तित्वमा हुनुहुन्थ्यो । उहाँ सदाकालदेखि रहिआउनुभएको छ । वास्तवमा उहाँको कुनै आदि छैन न त अन्त्य नै । येशू आजभन्दा लगभग दुई हजार वर्षअगि एसिया महादेशको प्राचीन प्यालेस्टाइनको बेथलेहेम नामक गाउँमा जन्मनुभयो । उहाँ जन्मनुभएको समयमा रोमको उपनिवेशको रूपमा रहेको प्यालेस्टाइनमाथि हेरोद महान्ले शासन गरिरहेका थिए ।

उहाँ अलौकिक नियमबाट जन्मनुभएको थियो । उहाँले आफ्नै शक्तिले विभिन्न आश्चर्यकर्महरू गर्नुभयो: लङ्गडोलाई हिँड्न सक्षम तुल्याउनुभयो; बैरोलाई सुन्ने तुल्याउनुभयो; दृष्टिविहीनलाई दृष्टि प्रदान गर्नुभयो; आँधीलाई शान्त पार्नुभयो; पाँच ओटा रोटी र दुई ओटा माछाले पाँच हजारलाई खुवाउनुभयो । उहाँमा दुई ओटा स्वभाव थिए— मानवीय र ईश्वरीय । उहाँको मानवीय स्वभावमा उहाँ थाक्नुभयो; रिसाउनुभयो; भोकाउनुभयो; रुनुभयो अनि मर्नुभयो । उहाँको ईश्वरीय स्वभावमा उहाँले मानिसको गोप्य कुरो थाहा पाउनुभयो र आश्चर्यकर्महरू गर्नुभयो ।

उहाँ दुष्ट पुस्ताको बिचमा बाँच्नुभए तापनि उहाँले सिद्ध जीवन जिउनुभयो । उहाँ पटक–पटक परीक्षामा पर्नुभए तापनि उहाँले कुनै पाप गर्नुभएन । मानव–जातिको पापको लागि येशू क्रूसमा मर्नुभयो । उहाँको मृत्युमा आश्चर्यपूर्ण घटनाहरू भए: अन्धकार छायो; मन्दिरको पर्दा च्यातियो; भूकम्प गयो आदि । उहाँ मर्नुभएकै दिन अर्थात् शुक्रबार उहाँलाई चिहानमा दफन गरियो । उहाँको मृत्यु भएको तेस्रो दिन अर्थात् आइतबारको दिन उहाँ मृतकहरूबाट बौरी उठ्नुभयो । ४० दिनको अवधिमा यस पृथ्वीमा उहाँ विभिन्न मानिसहरूकहाँ देखा पर्नुभयो अनि महिमित शरीरमा जैतुन पर्वतबाट स्वर्गारोहण हुनुभयो ।

उहाँ न्यायको लागि फेरि यस पृथ्वीमा आउँदै हुनुहुन्छ । उहाँको दोस्रो आगमनको वास्तविक समय अज्ञात छ । उहाँ धार्मिक न्यायाधीश हुनुभएकोले उहाँलाई प्रभु र मुक्तिदाताको रूपमा पछ्याउनेहरूलाई उहाँले आफ्नो अनन्त वासस्थानमा लैजानुहुनेछ भने अरू त्यसबाट वञ्चित हुनेछन् ।  येशू ख्रीष्ट यस ग्रहमा बाँच्नुहुने सर्वाधिक प्रभाविशाली व्यक्तित्व हुनुहुन्छ । उहाँको आगमनले संसारमा मनग्गे सकारात्मक परिवर्तनहरू लाएका छन् । उहाँले संसारका कुनै पनि विख्यात अगुवाहरूले भन्दा बेसी मानिसहरू आफ्नो पक्षमा जित्नुभएको छ । निस्सन्देह, उहाँ संसारको मुक्तिदाता हुनुहुन्छ ।  

Leave Your Comments Here.