येशू अनन्त हुनुहुन्छ भनी पुष्टि गर्ने १० ओटा सन्दर्भहरू

येशूको अनन्तताको अर्थ हुन्छ कि बेथलेहेममा उहाँको जन्मअगि मात्र उहाँ अस्तित्वमा हुनुहुन्थेन तर सृष्टिभन्दा अगि पनि उहाँको अस्तित्व थियो । उहाँको कुनै सुरु छैन न त अन्त्य नै । उहाँ सधैँ अस्तित्वमा रहिआउनुभएको छ । यस्तो कुनै समय थिएन जुन बेला उहाँ अस्तित्वमा हुनुहुन्थेन । यहाँ १० ओटा सन्दर्भहरू पेस गरिएका छन् जसले येशू अनन्त हुनुहुन्छ भनी पुष्टि गर्छन् ।  

१. यूहन्ना १:१

“आदिमा वचन हुनुहुन्थ्यो, वचन परमेश्वरसँग हुनुहुन्थ्यो, अनि वचन परमेश्वर हुनुहुन्थ्यो” (यूहन्ना १:१) । यो वचन येशू ख्रीष्ट हुनुहुन्थ्यो भनी यूहन्ना १:१४ ले प्रस्ट पार्छ, “अनि वचन देहधारी हुनुभयो ।” उहाँ बेथलेहेममा जन्मनुभन्दा पहिले वचन हुनुहुन्थ्यो । “आदिमा वचन हुनुहुन्थ्यो” भन्ने वाक्यांशमा उल्लिखित क्रियापद “हुनुहुन्थ्यो” (पद १) लाई ग्रिक भाषामा हेन भनिन्छ । नेपाली भाषामा यो सामान्य भूतकालमा भए तापनि ग्रिक भाषामा यो अपूर्ण काल हो जसले विगतमा भएको अविच्छिन्न अस्तित्वलाई जोड दिन्छ । त्यसैले, यसलाई यसरी अनुवाद गर्न सकिन्छ, “आदिमा वचन निरन्तर रूपमा अस्तित्वमा हुनुहुन्थ्यो ।” 

२. यूहन्ना ८:५८

यहूदीहरूसँगको विवादमा तिनीहरूले येशूलाई प्रश्न गरे, “तिमी अझै पचास वर्ष पुगेका छैनौ त के तिमीले अब्राहामलाई देखेका छौ ?” (यूहन्ना ८:५७) । उहाँको जवाफ थियो, “साँच्चै म तिमीहरूलाई भन्दछु, अब्राहाम हुनुभन्दा अघिबाटै म छँदैछु” (यूहन्ना ८:५८) । येशू बेथलेहेममा जन्मनुभए तापनि २,००० वर्षअगि बाँचेका अब्राहामभन्दा उहाँ पहिले अस्तित्वमा हुनुहुन्थ्यो भनी उहाँले दाबी गर्नुभयो । फेरि एक पटक येशूको जवाफमा भएको काललाई ध्यान दिनुस् । यो (म छँदैछु) वर्तमान कालमा छ । यसले ख्रीष्टको निरन्तरको अस्तित्वलाई जोड दिन्छ । यहाँ ख्रीष्टले आफ्नो अनन्ततालाई जोड दिई आफू परमेश्वर भएको दाबी गर्दै हुनुहुन्छ । 

३. हिब्रू १:८

हिब्रूका लेखकले १ अध्यायको पद ८ बाट पुरानो करारका खण्डहरूलाई उद्धृत गर्न थालेका छन् । पद ८ पुत्र अर्थात् येशू ख्रीष्टको विषयमा व्यक्त सन्दर्भ हो, “तर पुत्रको विषयमा चाहिँ उहाँ भन्नुहुन्छ, ‘हे परमेश्वर, तपाईंको सिंहासन सदासर्वदाको निम्ति रहिरहन्छ, र न्यायको राजदण्ड तपाईंका राज्यको राजदण्ड हो’ ।” यो पिता परमेश्वले पुत्र परमेश्वरको विषयमा दिनुभएको गवाही हो जहाँ येशूको अनन्तता छर्लङ्ग छ ।  

४. कलस्सी १:१६–१७

प्रेरित पावल लेख्छन्, “किनकि उहाँ [येशू ख्रीष्ट] मा नै सबै थोक सृष्टि भएका थिए । स्वर्गमा र पृथ्वीमाथि भएका दृश्य र अदृश्य थोकहरू, चाहे सिंहासनहरू, चाहे प्रभुत्वहरू, चाहे प्रधानताहरू, चाहे अधिकारहरू, सबै थोक उहाँद्वारै र उहाँकै निम्ति सृजिएका हुन् । उहाँ नै सबै कुराभन्दा अगाडि हुनुहुन्छ, र उहाँमा नै सबै कुरा बाँधिएर रहेका छन् ।” ख्रीष्टको अनन्ततालाई प्रमाणित गर्ने यो एउटा मजबुत खण्ड हो । सृष्टिकर्ता परमेश्वरको रूपमा येशूले सबै थोक सृजनुभएकोले सृष्टिअगि उहाँ अस्तित्वमा हुनुहुन्थ्यो जुन तथ्यलाई पद १० मा जोड दिइएको छ, “उहाँ नै सबै कुराभन्दा अगाडि हुनुहुन्छ ।” 

५. प्रकाश १:८

यूहन्ना लेख्छन्, “‘अल्फा र ओमेगा म नै हुँ,’ सर्वशक्तिमान् परमप्रभु परमेश्वर भन्नुहुन्छ, जो हुनुहुन्छ, जो हुनुहुन्थ्यो र जो आउनुहुनेछ” (प्रकाश १:८) । यस पदमा ख्रीष्टको अनन्ततालाई पुष्टि गर्ने दुई ओटा वाक्यांशहरू छन्: (१) ‘अल्फा र ओमेगा म नै हुँ ।’ यो ख्रीष्टको भनाइ हो । अल्फा ग्रिक वर्णमालाको पहिलो अक्षर हो भने ओमेगा अन्तिम अक्षर । यसले उहाँ आदि र अन्त्य हुनुहुन्छ भनी प्रस्ट पार्छ । (२) जो हुनुहुन्छ, जो हुनुहुन्थ्यो र जो आउनुहुनेछ । ख्रीष्टको बारेमा प्रयोग गरिएको यस अभिव्यक्तिले उहाँको अनन्ततालाई जोड दिन्छ । 

६. यशैया ९:६

यो अपेक्षा गरिएको मसीह अर्थात् येशू ख्रीष्टको बारेमा व्यक्त गरिएको खण्ड हो । “किनभने हाम्रा निम्ति एक जना बालकको जन्म भएको छ । हाम्रा निम्ति एक जना छोरो दिइएको छ । शासन उहाँको काँधमा हुनेछ । उहाँ अचम्मका सल्लाहकार, शक्तिशाली परमेश्वर, अनन्तका पिता, शान्तिका राजकुमार कहलाइनुहुनेछ” (यशैया ९:६) । यहाँ येशूलाई “अनन्तका पिता” भनिएको छ । यसको अर्थ येशू ख्रीष्ट पिता परमेश्वर हुनुहुन्छ भन्न खोजिएको होइन । किनभने त्रिएकताभित्र पिता परमेश्वर र पुत्र परमेश्वर बेग्ला–बेग्लै व्यक्तित्वहरू हुन् । तात्कालीन प्रयोग शैलीअनुसार कुनै पनि थोक अधिकार गरेको व्यक्तिलाई त्यस थोकको पिता भनिन्थ्यो । जस्तै: शक्तिको पिताको अर्थ हुन्छ, मजबुत; ज्ञानको पिताको अर्थ हुन्छ, बुद्धिमान्; महिमाको पिताको अर्थ हुन्छ, महिमित । येशू ख्रीष्ट “अनन्तका पिता” हुनुहुन्छ भन्नुको मतलब उहाँ अनन्त अस्तित्व हुनुहुन्छ भन्न खोजिएको हो ।  

७. मीका ५:२

मीका ५:२ ख्रीष्टको बारेमा भएको प्रस्ट भविष्यवाणी हो, “तर ए बेथलेहेम एप्राता, तँ यहूदाका कुलहरूमध्ये सानो भए तापनि तँबाट मेरो निम्ति एक जना निस्कनुहुनेछ, जो इस्राएलका शासक हुनुहुनेछ, जसको सुरु पुरानो समयदेखि, अर्थात् प्राचीनकालदेखि नै छ ।” यस पदको अन्त्यतिर उल्लिखित शब्द “प्राचीनकालदेखि” को सट्टामा “अनन्तकालदेखि” भनी अनुवाद गर्नु बढी मुनासिब हुन्छ । यस भविष्यवाणीमा मीकाले ख्रीष्टको अनन्ततालाई प्रस्टसँग व्यक्त गरेका छन् । बेथलेहेममा उहाँको जन्म उहाँको आरम्भ थिएन किनकि उहाँ अनन्तकालदेखि नै अस्तित्वमा हुनुहुन्छ ।

८. यूहन्ना १७:५

येशूले प्रार्थना गर्नुहुँदा उहाँले भन्नुभयो, “हे पिता, संसारको सृष्टि हुन अघि तपाईंको सम्मुख मेरो जुन महिमा थियो, त्यसैले आफ्नो उपस्थितिमा मलाई महिमित पार्नुहोस्” (यूहन्ना १७:५) । पृथ्वीमा मानवीय चोला धारण गर्नुभन्दा पहिले पनि उहाँको अस्तित्व थियो भनी येशूले यहाँ प्रत्यक्ष रूपमा दाबी गर्नुभएको छ । उहाँ महिमामा पितासितै अस्तित्वमा हुनुहुन्थ्यो । 

९. फिलिप्पी २:६–७

ख्रीष्ट विनम्रताको सर्वोच्च नमुना हुनुहुन्छ जुन विषयमा फिलिप्पी २ अध्यायमा बताइएको छ । पावल लेख्छन्, “परमेश्वरको स्वरूपमा भएर पनि उहाँले परमेश्वरको बराबरी हुने कुरालाई एउटा पक्रिराख्ने वस्तुजस्तो ठान्नुभएन । तर आफैलाई रित्त्याईकन कमाराको रूपमा धारण गरेर, तथा मनुष्य भएर जन्मनुभयो” (फिलिप्पी २:६–७) । यस खण्डमा पावलले येशूको ईश्वरत्व र मानवता दुवै सिद्धान्तलाई सठिक ढङ्गमा उल्लेख गरेका छन् । येशू परमेश्वरको स्वरूपमा अनन्तकालदेखि अस्तित्वमा हुनुहुन्छ भनी तिनी बताउँछन् । 

१०. हिब्रू १:२

पुरानो करारमा परमेश्वर विभिन्न मानिसहरूसित विभिन्न किसिमले बोल्नुभयो भन्ने जानकारी गराएपछि १:२ मा लेखक लेख्छन्, “तर यी आखिरी दिनहरूमा उहाँ आफ्ना पुत्रद्वारा हामीसँग बोल्नुभएको छ । पुत्रलाई नै उहाँले सबै कुराका उत्तराधिकारी नियुक्त गर्नुभयो, उहाँद्वारा नै समस्त सृष्टि रच्नु पनि भयो ।” येशू सृष्टिकर्ता हुनुहुन्छ भन्ने तर्क कलस्सी १:१६–१७ सित मेल खान्छ । समस्त सृष्टि अर्थात् विश्व (युनिभर्स) र समयको सृजनामा पुत्र परमेश्वर सामेल हुनुभएको तथ्यले उहाँको अनन्ततालाई प्रस्ट पार्दछ ।

यी केवल १० ओटा सन्दर्भहरू हुन् जसले येशूको अनन्ततालाई प्रमाणित गर्छन् । उहाँ २,००० वर्षअगि बेथलेहेममा जन्मनुभए तापनि त्यो उहाँको सुरुआत थिएन । त्यो त उहाँको मानवीय जीवनको आरम्भ मात्र थियो । आफ्नो ईश्वरत्वमा येशू अनन्तकालदेखि नै अस्तित्वमा हुनुहुन्छ ।

Leave Your Comments Here.