दुनियाँ रमाऊ र ग्रहण गर ख्रीष्ट प्रभु राजालाई

हाम्रो देशको उत्तरपट्टि रहेको छिमेकी मुलुक चीनको एउटा सानो नगरमा एक जना ख्रीष्टियान मिसनरी आइपुगिन् । लुटेराहरूको एउटा समूहले त्यस नगर र त्यसमा भएको हरेक कुरोलाई भर्खरै नष्ट पारेको रहेछ । त्यसपछि एक जना स्थानीय ख्रीष्टियानले भग्नावशेषमा परिणत भएको आफ्नो घरलाई देखाए ।

छत जलेर नष्ट भएको थियो; घरका काठपातहरू खरानी भएका थिए; सग्लो वस्तु मुश्किलैले फेला पर्न सकिन्थ्यो । आफ्ना बाइबल र भजन किताबलाई देखाउँदै ती ख्रीष्टियानले भने, “तिनीहरूले मेरा बाइबल र भजन किताबलाई पनि जलाइदिए !”

ती स्थानीय ख्रीष्टियानले भग्नावशेषबाट आफ्नो चिनियाँ भाषाको भजन किताबबाट एउटा पानालाई टिपे । आगोले नजलाएको पाना त्यही मात्र रहेछ । मिसनरीले आफ्नो हातमा लिएर त्यसलाई पढे, “दुनियाँ रमाऊ र ग्रहण गर ख्रीष्ट प्रभु राजालाई” (ख्रीष्टीय भजन ३८) ।

यो ख्रीष्टमससम्बन्धी लोकप्रिय भजन हो । भजनसंग्रह ९८ को दोस्रो आधा भागका वचनहरूमा आधारित रहेर प्रसिद्ध भजन लेखकसाथै ईश्वरशास्त्री आइज्याक वाट्सद्वारा रचित यो भजन पहिलो पटक ख्रीष्टाब्द १७१९ मा प्रकाशनमा आएको थियो ।

के यो प्रभुको उपस्थिति हुँदा पूर्ण विनाशको बिचमा पनि रमाउन सकिन्छ भन्ने प्रस्ट सन्देश होइन र ? त्यो नजलेको पानाले ती लुटेराहरूलाई यही सन्देश दिँदै थियो कि प्रभु येशू ख्रीष्ट यस संसारमा आउनुभएकोले दुनियाँ रमाओस् ।  

Leave Your Comments Here.