विश्व कीर्तिमानी धावकले भने, “परमेश्वरको सहायताद्वारा मैले झनै बेसी दौडेँ”

एरिक लिड्डेल समर्पित ख्रीष्टियानका अतिरिक्त परिचित धावक पनि थिए । ख्रीष्टाब्द १९२४ मा फ्रान्सको राजधानी पेरिसमा आयोजित ग्रिष्म ओलम्पिक्समा तिनले १०० मिटरको दौड दौडन इन्कार गरे । कारण थियो— उक्त दिन आइतबार परेको थियो जुन दिन पश्चिमा जगत्मा ख्रीष्टियानहरू सामूहिक आराधनाको लागि मण्डलीमा भेला हुन्छन् ।

विकल्पको रूपमा तिनले ४०० मिटर दौड प्रतियोगिताको लागि आफ्नो नाउँ दर्ता गरे । दौडनुभन्दा केही समयअगि एक जना अमेरिकनले तिनको हातमा एउटा कागजको टुक्रा थमाइदिए जसमा १ शमूएल २:३० को अंश लेखिएको थियो, “मलाई आदर गर्नेलाई म आदर गर्नेछु ।” त्यस वचनलाई आफ्नो हातमा लिएर एरिक दौडे । तिनले स्वर्ण पदक मात्र जितेनन् तर ४७.६ सेकेन्डमा दौड पुरा गरी विश्व कीर्तिमान पनि रचे ।

तिनको दौडको योजनालाई तिनले यसरी व्याख्या गरेका थिए, “४०० मिटर दौडमा मैले हात पारेको सफलताको रहस्य यही हो कि पहिलो २०० मिटर मैले जतिसक्दो चाँडो दौडेँ । त्यसपछि, दोस्रो २०० मिटर परमेश्वरको सहायताद्वारा मैले झनै बेसी दौडेँ ।”   

१०० मिटर दौडमा भाग नलिएकोले कतिले तिनलाई सन्काहा भने । तर अरूहरू तिनको दृढ विश्वास देखेर प्रेरित भए । तिनको निर्णयले तिनका सहकर्मीहरूलाई मात्र प्रभाव पारेन तर वर्षौंपछि ओस्कार पुरस्कार जित्न सफल अग्निका रथहरू नामक चलचित्रले तिनको कथा बतायो जसले पछिल्लो पुस्तालाई इमान्दार जीवन जिउन प्रेरणा दिएको थियो ।   

Leave Your Comments Here.