म अझै पनि परमेश्वरमा आशा गर्दछु र उहाँको शक्तिमा अगाडि बढ्नेछु

विलियम केरीको जन्म ख्रीष्टाब्द १७६१ मा इङ्गल्यान्डमा भएको थियो । तर तिनी भारतका मानिसहरूलाई सुसमाचार सुनाई तिनीहरूलाई प्रभु येशूमा जित्न चाहन्थे । त्यसैले, १७९३ मा तिनी भारतमा आए जुन भूमिमा तिनले ४१ वर्ष बिताए । “आधुनिक मिसनका पिता” भनेर चिनिने केरीले हप्तैपिच्छे, महिनैपिच्छे ७ वर्षसम्म निरन्तर रूपमा येशूको सन्देश बाँडे तापनि एक जना भारतीयले पनि येशूमाथि विश्वास गरेन । तिनी वर्षौंसम्म सङ्घर्ष र आशङ्काको भूमरीमा जेलिए र बारम्बार निरुत्साही भए तापनि पराजित भने भएनन् । इङ्गल्यान्डमा भएका तिनका आफन्तहरूलाई तिनले यसरी लेखेका थिए:

एउटा किसानले उसको फसलसित अनुभव गरेजस्तै मैले अनुभव गरेको छु । मलाई कहिलेकाहीँ बिउ उम्रिरहेको जस्तो लाग्दा ममा आशा उत्पन्न हुन्छ । थोरै कुरोले सबै सर्वनाश पारिदिन्छ अनि मेरा सबै आशा बादलजस्तो भएर गायब हुन्छन् । ती देखा परेका केवल झारपात रहेछन् । वा मकैको सानो टुसा देखा पर्छ अनि छिट्टै मरेर जान्छ, झारपातको कारणले गर्दा वा सतावटको रापले गर्दा । तथापि म अझै पनि परमेश्वरमा आशा गर्दछु र उहाँको शक्तिमा अगाडि बढ्नेछु र उहाँको धार्मिकताको मात्र चर्चा गर्नेछु ।

परमेश्वरले तिनको आशालाई मार्नुभएन । दसौँ लाखको भिडमा तिनको सेवा–कार्यबाट केवल ७०० जना प्रभु येशूमा आएको भए तापनि बाइबल अनुवाद, शैक्षिक विकास र सामाजिक सुधारको निम्ति तिनले प्रभावशाली जगको निर्माण गरे । आधुनिक भारत निर्माणमा विलियम केरी केन्द्रिय पात्र हुन् ।

  

Leave Your Comments Here.