परमेश्वरले संसारलाई यस्तो प्रेम गर्नुभयो, कि उहाँले आफ्ना एकमात्र पुत्र दिनुभयो

यूहन्ना ३:१६ मा लेखिएको छ, “किनभने परमेश्वरले संसारलाई यस्तो प्रेम गर्नुभयो, कि उहाँले आफ्ना एकमात्र पुत्र दिनुभयो, ताकि उहाँमाथि विश्वास गर्ने कोही पनि नाश नहोस्, तर त्यसले अनन्त जीवन पाओस् ।”

यूहन्ना ३:१६ लाई बाइबलको सबैभन्दा प्रसिद्ध खण्ड मानिन्छ । यसलाई व्यापक रूपमा उद्धृत गरिएको छ । यसलाई “संक्षिप्त सुसमाचार” पनि भनिन्छ किनकि यसमा परम्परागत ख्रीष्टियमतको केन्द्रिय विषयवस्तुको सारांश पाइन्छ । संसारमा भएका सारा साहित्यको योगले पनि यी पच्चिस ओटा शब्दमा अन्तर्निहित खजानासित प्रतिस्पर्धा गर्न सक्दैन । यसमा आशाविहीनहरूले आशा पाउँछन् । यसलाई कागजको सानो टुक्रामा लेख्न मात्र सकिँदैन तर सजिलैसित कण्ठस्थ पार्न पनि सकिन्छ । तपाईंलाई बाइबलको बारेमा केही थाहा छैन भने यहाँबाट सुरु गर्नुस् । तपाईंलाई बाइबलको बारेमा हरेक कुरो थाहा छ भने यहाँ फर्कनुस् । हामी सबैलाई यस पदको खाँचो छ । मानिसको ह्दयको समस्या उसको ह्दय हो । यूहन्ना ३:१६ मा परमेश्वरले आफ्नो उपचारको विधिलाई अभिलिखित गर्नुभएको छ । त्यो हो, उहाँको प्रेम । उहाँले प्रेम गर्नुभयो त्यसैले सर्वोत्तम उपहार दिनुभयो ।        

यस पदको बाइबलीय पृष्ठभूमिमा प्रवेश गर्दा हामी देख्छौँ कि येशू यरूशलेममा हुनुहुन्थ्यो । निकोदेमस नाउँ गरेका व्यवस्थाका गुरु राती उहाँलाई भेट्न आए । दुई जनाको बातचितको क्रममा परमेश्वरको राज्य देख्नलाई नयाँ जन्म पाउनुपर्छ भनी येशूले तिनलाई बताउनुभयो । उहाँले तिनलाई स्वर्गीय कुराहरू, उद्धारसाथै उहाँमाथि विश्वास नगर्नेले भोग्नुपर्ने दण्डाज्ञाबारे पनि अवगत गराउनुभयो ।

विनान्सले भनेका छन्, “मेरो लागि यूहन्ना ३:१६ मेरो विश्वासको मुख्य आधार हो । उहाँले गर्नुभएको प्रेमको कारणले म सदाको निम्ति बाँचेको छु ।” म्याक पोवेलले भने, “म यूहन्ना ३:१६ लाई प्रेम गर्दछु किनकि यो संक्षिप्त सुसमाचार हो । यसले हाम्रो निम्ति परमेश्वरको प्रेमलाई मात्र बताउँदैन तर हामीलाई उहाँको आवश्यक छ भनेर पनि बताउँछ ।” पास्टर ग्रेग लाउरीले भनेका छन्, “परमेश्वरको प्रेम केवल राय होइन तर यस्तो कुरो हो जसलाई उहाँले मूर्त रूपमा देखाउनुभयो । परमेश्वर हामीलाई अनन्त जीवनको उपहार दिनुहुन्छ । उपहार लिनको लागि तपाईंले यसलाई स्वीकार गर्नुपर्छ र खोल्नुपर्छ ।”   

Leave Your Comments Here.