युद्धमा घाइते बनेका सैनिक परिचत ख्रीष्टियान संस्थाको संस्थापक बन्न पुगे

तिनी सैनिक थिए । तिनी स्पेनका भएकाले तिनी स्पेनको तर्फबाट फ्रान्सको विरुद्धमा युद्ध लड्दै थिए । २० मे १५२१ मा भएको युद्धमा तिनी सख्त घाइते बनाइए । तर तिनको वीरता देखेर शत्रुहरूले तिनको तारिफ गरे र केही दिनपश्चात् तिनलाई आफ्नै देशमा फिर्ता गरियो ।  

तिनको स्वास्थ्य अवस्था नाजुक बन्दै गएको थियो । तिनले यस्ता लक्षणहरू देखाउँदै थिए जसबाट तिनको मृत्यु नजिकै थियो भनी अनुमान लगाउन सकिन्थ्यो । तिनको चङ्गाइको सम्बन्धमा डाक्टरहरूमा पनि थोरै मात्र आशा बाँकी थियो । तर अविश्वसनीय रूपमा तिनको स्वास्थ्यमा सुधार आयो जसलाई तिनले प्रभुको निगाह सम्झे । तिनी निको हुँदै गएका थिए तर गोडामा चोट लागेकोले तिनी अझै पनि खडा हुन सक्दैनथ्ये । त्यसैले, तिनी ओछयानमा नै लम्पसार पर्थे ।

आख्यानसाथै शुरवीरका कथाहरू पढ्नमा तिनलाई रुचि लाग्थ्यो । तर त्यो घरमा तिनले खोजेका पुस्तकहरू पाइएनन् । त्यसैले, तिनलाई येशू ख्रीष्टको जीवनी र सन्तहरूको जीवनी पढ्न दिइयो । ती पुस्तकहरू पढ्दा तिनलाई आनन्द मिल्यो । तिनको मनभित्र रहेका सांसारिक विचारलाई बिस्तारै–बिस्तारै स्वर्गीय विचारले विस्थापित गर्न लागे । तिनले परिवर्तनको महसुस गरे ।

को थिए यी घाइते फौजी ? तिनी थिए लोयोलाका इग्नेसिएस जो पादरी, ईश्वरशास्त्रीसाथै संस्थापक बने । तिनले ख्रीष्टाब्द १५४० मा येशूको समाज नामक संस्थाको स्थापना गरे जसको सदस्यलाई जेसुइट भनेर चिनिन्छ । छात्रवृत्ति, शैक्षिक उन्नतिसाथै व्यापक मिसनरी कामको लाग जेसुइटहरू निकै परिचित छन् ।   सत्रौँ शताब्दीको पूर्वाद्र्धमा जेसुइट पादरी काठमाडौँमा आएको ऐतिहासिक विवरण छ । यसको अर्थ हुन्छ कि नेपालको मण्डली इतिहास नेपालको एकीकरणभन्दा पुरानो छ ।

      

        

Leave Your Comments Here.