२०५० सम्ममा संसारमा ख्रीष्टियानहरूको सङ्ख्या ३ अरब नाघ्नेछ

येशूले जम्मा १२ जना चेला छान्नुभएको थियो (मत्ती १०:२–४) । उहाँको स्वर्गारोहणसम्म उहाँलाई पछयाउनेहरूको सङ्ख्या १२० पुग्यो भनी इतिहासकार लूकाले अभिलिखित गरेका छन्, “यी मानिसहरूको संख्या प्राय: एक सय बीस थियो” (प्रेरित १:१५) । त्यसको केही समयपछि पेन्तिकोसको दिनमा पत्रुसको प्रवचन सुनेर एकै दिनमा ३,००० मानिस मण्डलीमा थपिए, “तब जस–जसले उनको कुरा ग्रहण गरे तिनीहरूले बप्तिस्मा लिए, र त्यसै दिन प्राय: तीन हजार मानिसहरू तिनीहरूको संख्यामा थपिए” (प्रेरित २:४१) । त्यो सङ्ख्या बढेर छिट्टै नै ५,००० पुग्यो, “तर वचन सुन्नेहरूमध्ये धेरैले नै विश्वास गरे, र विश्वास गर्ने मानिसहरूको संख्या प्राय: पाँच हजार भयो” (प्रेरित ४:४) ।

ख्रीष्टाब्द ३१३ सम्म ख्रीष्टियानहरूले उग्र सतावट भोग्नु परे तापनि विश्वासहरूको वृद्धिमा कमी आएको थिएन । ३१३ मा सम्राट् कन्स्टेन्टाइन महान्ले  मिलानको घोषणा जारी गर्दा विश्वासीहरूको सङ्ख्या ६० लाख पुगेको थियो । ख्रीष्टाब्द १,००० सम्म आइपुग्दा त्यो सङ्ख्या बढेर ५ करोड पुगेको थियो भनी अनुमान गरिएको छ । अठारौँ शताब्दीको अन्त्यसम्ममा विश्वासीहरूको सङ्ख्या २१ करोड ५० लाख पुग्यो । १७९३ मा भारतमा आधुनिक मिसनका पिता भनेर चिनिने विलियम केरीको आगमनसँगै येशूको महान् आज्ञालाई गम्भीरतापूर्वक लिइयो । परिणाम स्वरूप ख्रीष्टियान वृद्धिले नाटकीय रूपमा फड्को मार्‍यो ।

प्यु रिसर्च सेन्टरको सर्वेक्षणअनुसार १,९१० सम्ममा ख्रीष्टियानहरूको सङ्ख्या ६० करोड पुगेको थियो । २०१२ मा आइपुग्दा यो सङ्ख्या बढेर २ अरब १८ करोड भयो । उही सेन्टरको सर्वेक्षणअनुसार यही दरमा ख्रीष्टियानहरूको वृद्धि भएमा ख्रीष्टाब्द २०५० सम्ममा ख्रीष्टियमत नै संसारको सर्वाधिक ठुलो धर्म रहिरहनेछ । त्यस बेला ख्रीष्टियानहरूको सङ्ख्या ३ अरब नाघ्नेछ । 

  

Leave Your Comments Here.