मर्कुस डोईको जन्म अफ्रिकाको पश्चिमी तटमा अवस्थित लाइबेरिया नामक
मुलुकमा भएको थियो । लाइबेरियाका एक्काइसौँ राष्ट्रपति समुएल डोई (ख्रीष्टाब्द
१९५१-१९९०)
सित मर्कुसका पिताको रगतको कुनै नाता नभए तापनि तिनका पिताले राष्ट्रपतिको निम्ति
विशेष सुरक्षा दिने काम गर्थे । साबिक राष्ट्रपतिको हत्या गरी सैनिक कुमार्फत सत्तामा आएका थिए समुएल
डोई । तर तिनको शासनकालको अन्त्यतिर आरम्भ भएको गृहयुद्धको कारणले गर्दा
लाइबेरियामा रगतको खोलो मात्र बगेन, तर स्वतन्त्रताको पक्षमा लड्नेहरूले समुएल डोईलाई पक्रेर मृत्युदण्ड
पनि दिए ।
सानै उमेरदेखि मर्कुस डोईको जीवनमा दुःखको थालनी भएको थियो । १०
वर्षको उमेरमा तिनले आफ्नी आमा गुमाएका थिए । तिनका पिता राष्ट्रपतिकै कुलका
भएकाले पिता खतरामा थिए । विद्रोही सिपाहीहरूको पञ्जामा पर्नुअगि पिताको सल्लाहलाई
मानी मर्कुस आफ्ना दाजु रुजरभेल्टकहाँ गए । विद्रोहीहरू यति निष्ठुर थिए, कि तिनीहरूले शङ्काकै भरमा
निर्दोष मानिसहरूको हत्या गरिदिन्थे । दिनमा एक छाक मात्र खाएर मर्कुस लुकेर
हिँड्नु परेको थियो । मासु र सफा पानी दुर्लभ थिए । आशा मधुरो थियो । स्कुल नगएको
६ महिना भइसकेको थियो ।
आफ्ना दाजुसँगै मर्कुस शरणर्थीहरू बोक्ने पानी जहाजमार्फत घाना प्रस्थान गरे ।
दिनहरू सामान्य बन्दै गर्दा तिनले आफ्ना पिताको हत्या गरिएको खबर सुने । तिनी अनाथ
बने । बदलाको भावनाले ओतप्रोत बनेका तिनको जीवनको उद्देश्य बन्योः हत्याराको खोजी
गरी तिनलाई मार्नु ।
पछि दाजुसँगै मर्कुस अमेरिका पुगे । तिनी अमेरिकी सेनामा भर्ना हुन
खोजे तापनि अयोग्य ठहरिए । परिस्थिति जटिल हुँदै गर्दा अर्को समस्या आइपर्यो तिनको जीवनमा— ३८ वर्ष पुगेका तिनका
दाजुलाई ह्दयघात भयो । तिनी कोमामा गए । मर्कुसका दाजु तिनले चिनेका परिवारका एक
मात्र जीवित सदस्य थिए । यस्तो दुःखको भूमरीमा जीवन गुजार्नु पर्दा तिनी
घन्टौँसम्म रुन्थे ।
परमेश्वरपट्टि फर्केर तिनले प्रश्न गरे,
“किन ?” तिनले
आफूले
भोग्नुपरेका सबै दुःखकष्टको निम्ति परमेश्वरसित प्रश्न गरे । तिनले आमा गुमाए; बुबा गुमाए; युद्ध भोगे; परिवारबाट बिछोडिए आदि ।
अन्त्यमा प्रिय दाजु पनि गुम्ने अवस्थामा थियो ।
मर्कुस ख्रीष्टियान भए तापनि प्रार्थनामाथि तिनको विश्वास थिएन वा
कमै विश्वास थियो । तर यस पटक तिनले ह्दयको गहिराइबाट इमान्दारीपूर्वक दाजुको
स्वास्थ्यलाभको निम्ति प्रार्थना गरे । चार दिनपश्चात् दाजु निको हुने भयो भन्ने
खबर पाएपछि तिनको विश्वासको यात्राको आरम्भ भयो । तिनी बिस्तारै विश्वासमा बढ्न
थाले ।
बदला र निराशाले बन्जर बनेको तिनको ह्दयको भूमि बिस्तारै उर्बरायुक्त
बन्दै गयो । विश्वास र आशाका पुष्पहरू फक्रन थाले । बदलाको गहिराइलाई क्षमाको
पानीले भर्दै गयो । तिनले आफ्ना पिताको हत्यारालाई भेट्ने निधो गरे । तिनी यसो
भन्न चाहन्थे, “म
तिमीलाई क्षमा दिन चाहन्छु ।”
लाइबेरिया छाडेको बिस वर्षपश्चात् ख्रीष्टाब्द २०१० मा ३१ वर्षको
उमेरमा मर्कुस आफ्नो जन्मभूमि फर्के । तर तिनले आफ्ना पिताको हत्यारालाई भेट्न पाएनन् किनकि युद्धमा
तिनको मृत्यु भइसकेको रहेछ । तरै पनि मर्कुसले तिनलाई क्षमा दिए ।
