चार ओटा सुसमाचारमध्ये मत्ती र लूकाले येशूको जन्मको बारेमा केही महत्त्वपूर्ण विवरणहरू
उपलब्ध गराएका छन् (मत्ती १:१८-२:२३; लूका १:२६-५६; २:१-४०) । यी विवरणहरूलाई नियाली मुक्तिदाता येशूको
जन्मको वरिपरि भएका ९ ओटा घटनालाई हामी सङ्क्षिप्त रूपमा ध्यान दिनेछौँ। यहाँ ती घटनाहरूलाई क्रमैसँग राखिएका छन् ।
१. योसेफ र मरियमको मगनी भयो (मत्ती १:१८-१९; लूका १:२६-२७) ।
योसेफ याकूबका पुत्र थिए । तिनी धार्मिक मानिस थिए र दाऊदको वंशका थिए । तिनी
गालीलको नासरतका बासिन्दा थिए । मरियम यहूदाको कुल र दाऊदको घरानाका थिइन् । लूका
३ अध्यायमा उनको वंशावली अभिलिखित छ । मरियम र योसेफ दुवै नै यहूदी जातिका भएकाले
तिनीहरूको मगनीलाई यहूदी संस्कृतिअनुसार नै बुझिनुपर्छ । विवाहको व्यवस्था मिलाउने
काम बुबाआमाले नै गर्थे । मगनीपश्चात् समाजले उक्त जोडीलाई पति र पत्नीको रूपमा हेर्थ्यो यद्यपि तिनीहरू सँगसँगै बस्न भने पाउँदैनथ्ये । मगनी र विवाहको बिचमा एक
वर्षको परीक्षणकाल हुन्थ्यो जुन बेला यदि केटी गर्भवती भएको थाहा हुन आयो भने
विवाहलाई रद्द गर्न सकिन्थ्यो । तर विवाहलाई आँच नपुर्याउने त्यस्तो कुनै
तत्त्व नदेखिएको खण्डमा विवाह सम्पन्न भई नव जोडी सँगसँगै बस्न सुरु गर्थे ।
यहूदीहरूको चलनअनुसार मगनी यति कडा संस्कार थियो कि त्यसको विघटनको लागि
सम्बन्धविच्छेदको औपचारिक घोषणाको खाँचो पर्थ्यो ।
२. स्वर्गदूत मरियमकहाँ देखा परे (लूका १:२६-३८) ।
योसेफसँग मगनी भएकी कन्या मरियम नासरतमा रहँदा गब्रिएल नाउँ गरेका स्वर्गदूत उनीकहाँ देखा परे । मरियम कन्या छँदै गर्भवती भएर
लामो समयदेखि प्रतिक्षा गरिएको मसीहलाई उनले जन्माउने थिइन् भनी स्वर्गदूतले बताउँदा
उनी छक्क परिन्, "यो कसरी हुन सक्छ,
किनकि म एक कन्या हुँ" । "उनको गर्भधारण अलौकिक हुने थियो भनी स्वर्गदूतले मरियमलाई प्रस्ट पारे,
"पवित्र आत्मा तिमीमा
आउनुहुनेछ, र सर्वोच्चका शक्तिको
छाया तिमीमाथि पर्नेछ । यसैकारण जो जन्मनुहुनेछ, उहाँ पवित्र, अर्थात् परमेश्वरका पुत्र कहलाइनुहुनेछ ।"
३. स्वर्गदूत योसेफकहाँ देखा परे (मत्ती १:२०-२५) ।
योसेफले मरियमसित मगनी गरे, तर तिनीहरूको
विवाहअगि नै मरियम गर्भवती भएको थाहा हुन आयो । मरियम अविश्वासयोग्य भएको ठानी
योसेफले उनलाई गुप्तमै त्याग्ने मनसाय बनाए । योसेफले चाहेको भए उनलाई न्यायको
लागि सार्वजनिक स्थानमा उभ्यान सक्थे जसले मरियमको ज्यानै जान पनि सक्थ्यो
(व्यवस्था २२:२३-२४) । तर योसेफ
धार्मिक मानिस भएकाले र मरियमलाई साँचो रूपमा प्रेम गरेकाले तिनले त्यो बाटोलाई रोजेनन् । मरियम
कसरी गर्भवती भइन् भनेर योसेफलाई पनि अवगत गराउनुपर्थ्यो भनी परमेश्वर
जान्नुहुन्थ्यो । तसर्थ, वास्तविकतालाई
प्रकट गराउन सपनामा एउटा स्वर्गदूत योसेफकहाँ देखा परे र तिनले मरियम पवित्र आत्माद्वारा
गर्भवती भएको तथ्य जाहेर गराए योसेफलाई । कन्याबाट येशूको जन्म हुँदा सैयौँ वर्ष पुरानो यशैयाको भविष्यवाणी पनि पुरा हुने थियो भनी
बताए स्वर्गदूतले ।
४. जनगणनाको लागि हुकुम जारी गरियो (लूका २:१-६) ।
कैसर अगस्टस जसले यस जनगणनाको
आदेश दिएका थिए, तिनी २७
ख्रीष्टपूर्वदेखि ख्रीष्टाब्द १४ सम्म रोमको सम्राट् भएका थिए ।
योसेफ र मरियम गालीलको नासरतमा बस्दै गर्दा यो जनगणनाको लागि हुकुम जारी भयो ।
योसेफ दाऊदको वंशका भएका हुनाले नाउँ लेखाउन तिनी मरियमलाई साथमा लिई दाऊदको सहर अर्थात्
बेथलेहेम गए । नासरतदेखि बेथलेहेम झण्डै ६५ माइल टाढा थियो ।
५. बेथलेहेममा बालकको जन्म भयो (लूका २:७) ।
नाउँ दर्ता गराउन आउने
आगन्तुकहरूले बेथलेहेम खचाखच भएकोले योसेफ र मरियमले पौवामा कुनै ठाउँ पाएनन् । परम्पराअनुसार
योसेफ र मरियम पौवा नजिकैको गुफामा बसे जहाँ मरियमले बालकलाई जन्म
दिइन् अनि डुँडमा राखिन् । येशू बेथलेहेममा जन्मनुहुँदा मीका अगमवक्ताले
बोलेको ७०० वर्षअगिको भविष्यवाणी पुरा भयो (मीका ५:२) ।
६. गोठालाहरू बालकलाई भेट्न आए (लूका २:८-२०) ।
स्वर्गदूतले मसीहको जन्मको कथा पहिलो पटक गोठालाहरूलाई बताए जो बेथलेहेमको
इलाकामा बगालको हेरचाह गर्दै थिए । खुसीको सन्देश सुनेर तिनीहरू हतार-हतार बालक भएको ठाउँमा आए । तिनीहरूले देखेको कुरो
अरूहरूलाई पनि बताए र सुन्नेहरू आश्चर्यमा परे ।
७. बालकको खतना गरी "येशू" नाउँ राखियो (लूका २:२१) ।
यहूदी चलनअनुसार आठौँ दिनमा बालकको खतना गरियो, सम्भवतः बेथलेहेममा नै । अब्राहामको समयदेखि नै
सबै यहूदी पुरुषहरूले पालना गर्नुपर्ने शारीरिक चिन्ह थियो, खतना । स्वर्गदूतले भनेअनुसार योसेफ र मरियमले बालकको नाउँ येशू राखे । संसारका
मुक्तिदाताको लागि यो नाउँ उपयुक्त थियो ।
८. येशूलाई मन्दिरमा अर्पण गरियो (लूका २:२२-४०) ।
यहूदी परम्पराअनुसार ४० दिनपछि बालकलाई मन्दिरमा अर्पण गरिन्थ्यो । योसेफ र
मरियमले यी दिनहरू सम्भवतः बेथलेहेममा नै बिताए । दुईवटा उद्देश्य लिएर तिनीहरू
यरूशलेमस्थित मन्दिरमा गए— बालकलाई
परमप्रभुको सामु अर्पण गर्न र मरियमको निम्ति शुद्देइँको बलिदान चढाउन । बालक
येशूलाई मन्दिरमा अर्पण गर्दा परमेश्वरका भक्तजन शिमियोन र अगमवादिनी हन्ना दुवैले
उहाँलाई मसीहको रूपमा
पहिचान गरे ।
९. येशूलाई भेट्न पूर्वबाट ज्योतिषीहरू आए (मत्ती २:१-१२) ।
योसेफको परिवार बेथलेहेमबाट फर्केपछि पूर्वबाट केही ज्योतिषीहरू (गगनबारे जानेका
ज्ञाताहरू) येशूलाई भेट्न आए । तिनीहरूको सङ्ख्या, वास्तविक पहिचान र आगमनको समयबारे किटेर भन्न गार्हो छ । तिनीहरूले
आकाशमा मुक्तिदाताको जन्मलाई अङ्कित गर्ने तारा देखे अनि तिनीहरू धेरै लामो यात्रा
गरेर मसीहलाई भेट्न आए । तिनीहरूले बालक येशूलाई आफूले ल्याएका महत्त्वपूर्ण उपहारहरू
दिए ।
