मेरी स्लेसर: सुसमाचारद्वारा कालाबारलाई सभ्यताको सिँढी चढाउने निर्भीक मिसनरी

मानिसहरूको भिड जम्मा भएको थियो । लाग्थ्यो, त्यहाँ कुनै तमासा हुँदै थियो । एक जना स्त्रीलाई गलत किसिमले व्यभिचारको दोष लागेको थियो । त्यस्तो दोषीलाई बाँधेर राखिन्थ्यो अनि उसको शरीरमा उम्लिरहेको तेल खन्याइन्थ्यो । तर त्यस्तो अमानवीयसाथै क्रूर प्रथाको विरुद्धमा उठ्ने जमर्को गरिन् एक जना स्त्रीले । उनी आरोपित महिला र यातना दिने व्यक्तिको बिचमा खडा भइन् । उनले ती यातना दिने व्यक्तिलाई यसरी एक टकले हेरिरहिन् कि त्यो मानिस पछाडि हट्यो । ती स्त्रीको साहस र उनले विश्वास गरेका परमेश्वरको शक्ति देखेर मानिसहरू छक्क परे । उनको नाउँ हो, मेरी स्लेसर ।

मेरी स्लेसर अफ्रिकी मुलुक नाइजेरियामा मिसनरी भएर जाने स्कटल्यान्डकी निर्भीक स्त्री हुन् । स्थानीय बालबालिकाहरूको बचावट र नारी अधिकारको प्रवद्र्धको लागि उनले उल्लेखनीय भूमिका निर्वाह गरेकी छन् । नाइजेरियामा बस्ने एफिक नाउँको आदिवासीको बिचमा जुम्ल्याहा सन्तानलाई मार्ने चलनलाई रोक्ने श्रेय उनलाई नै जान्छ ।

पिता रोबर्ट र माता मेरीबाट जन्मेका सात सन्तानमध्ये दोस्रो सन्तानको रूपमा मेरी स्लेसरको जन्म २ डिसेम्बर १८४८ मा स्कटल्यान्डमा भएको थियो । गरिब परिवारमा जन्मेकी मेरीका पिताको पेसा जुत्ता बनाउने थियो । तर तिनी जँड्याहा भएकोले तिनको त्यो पेसा पनि गुम्न पुग्यो । कामको खोजीमा रोबर्टको परिवार डुन्डी भन्ने ठाउँमा पुग्यो । तिनीहरूको नयाँ घर भन्नु नै एउटा कोठा थियो जहाँ न पानी उपलब्ध थियो न बत्ती न त शौचालय । तिनीहरू भुइँमा सुत्थे ।

दस वर्षको उमेरदेखि मेरीले आधा समय मिलमा काम गरेर बिताउन थालिन् त आधा समय स्कुलमा पढेर । चौध वर्षको उमेरमा उनले आफ्नो पुरै समय काममा लगाउनुपर्‍यो । उनी हप्ताको ५८ घण्टासम्म काममा खट्थिन् ।

गरिबीमा पौडी खेल्दै आएकी मेरीको जीवनमा परमेश्वरको अद्भूत योजना थियो । नाइजेरियामा मिसनरी भएर गएका प्रभुका जनबाट प्रवचन सुनेपछि उनको ह्दयमा मिसनरी हुने रुचि बढेको थियो । किशोरी अवस्थामा प्रभु येशूलाई अङ्गालेपछि उनले मिसनरी रिकर्ड नामक पत्रिकामा विख्यात मिसनरी डेभिड लिभिङ्गस्टोनको बारेमा पढ्न पाएकी थिइन् जसले उनको रुचिलाई बढावा दियो ।

मेरीले त्यो समयमा मिसनरी हुने सपना देखेकी थिइन् जुन समयमा छोरी मान्छे मिसनरी भएर गएको कथा सुनिँदैनथ्यो । उनले मिसनरीको लागि आवेदन दिँदा उनलाई लागेको थियो उनमा दुई ओटा असमर्थता छ: एकातिर उनी स्त्री थिइन् भने अर्कोतिर उनी श्रमिक वर्गकी थिइन् । तथापि परमेश्वरले मिसनरी बन्ने उनको अन्तरबिन्तीलाई सुन्नुभयो । उनी ख्रीष्टियान सन्देश लिएर “गोराहरूको चिहान” भनेर चिनिने पश्चिम अफ्रिका जानलाई तयार भइन् ।

ख्रीष्टाब्द १८७६ मा २८ वर्षको उमेरमा मेरी कालाबारको लागि प्रस्थान गरिन् जुन ठाउँ हाल नाइजेरियामा पर्छ । सुसमाचारको खातिर त्यहाँ उनले सङ्घर्षपूर्ण जीवन बिताइन् । ती क्रूर आदिवासीहरूलाई सभ्यताको उचाइमा पुर्‍याउन उनले पुर्‍याएको योगदानको कारणले आज उनको नाउँ इतिहासमा अमर छ ।

कालाबारका मानिसहरूका लागि मेरीको प्रयासमा स्थापना गरिएको अस्पतालको नाउँमा उनी जीवित छिन् । उनकै प्रयासमा स्कुलहरू खोलिए; बालबालिकाहरूले लामो जीवन पाए; जुम्ल्याहा मार्ने अन्धविश्वासी चलनमा पूर्ण विराम लाग्यो; नियमित जाँड खाने र एक अर्काको हत्या गर्ने अभ्यास इतिहास बन्यो; सबैभन्दा ठुलो उपलब्धि त त्यहाँका आदिवासीहरूले परमेश्वर र बाइबलको बारेमा सिक्न पाए ।

१३ जनवरी १९१५ मा मेरी आफ्नो अनन्त घरमा प्रवेश गरिन् ।

  

Leave Your Comments Here.