के येशू क्रूसमा बेहोस मात्र हुनुभएको थियो ?

येशू वास्तवमा क्रूसमा मर्नुभएको थिएन तर उहाँ बेहोस मात्र हुनुभएको थियो भन्ने सिद्धान्तलाई मुर्छाको सिद्धान्त भनिन्छ । उहाँलाई योसेफको चिहानमा राखिँदा उहाँ अझै जीवितै हुनुहुन्थ्यो र केही घण्टा बितेपछि चिहानको चिसो वातावरणमा उहाँको होस खुल्यो अनि उहाँ त्यहाँबाट प्रस्थान गर्नुभयो भनी यस परिकल्पनाले बताउँछ । येशूको शारीरिक पुनरुत्थानलाई पाखा लगाउन दुष्प्रयास गर्ने यस सिद्धान्तलाई ख्रीष्टाब्द १७८० मा कार्ल फ्रेडरिकले अगाडि सारेका थिए । तलका ५ ओटा तर्कहरूले यस परिकल्पनाको खण्डन गर्छन् भनी यस सिकारु विश्वस्त छ ।

१. येशू रोमी क्रूसारोहणबाट बाँच्न सक्नुहुन्नथ्यो ।

रोमी पद्धति यति होसियार थियो कि क्रूसारोहणबाट येशू बाँच्न सक्ने सम्भावनालाई त्यसले नामेट पाथ्र्यो । पेसेवार जल्लादहरूले येशूलाई कोर्रा लगाएका थिए; उहाँलाई निर्ममतापूर्वक पिटेका थिए । उहाँका हात र खुट्टामा ६/६ इन्च लामा काँटीहरू ठोकी उहाँलाई क्रूसमा झुण्डयाइएको थियो । उहाँको शिरमा काँडाको मुकुट लगाइएको थियो । रोमी कानुन यति कडा थियो कि मृत्युदण्ड पाएको अपराधी बाँचेको खण्डमा सिपाहीलाई नै मृत्युदण्ड दिइन्थ्यो ।   

२. येशू मर्नुभएको थियो भनी शत्रुहरूसाथै मित्रहरूले निष्कर्ष निकाले ।

येशू शुक्रबार नै मरिसक्नुभएको थियो भन्ने तथ्यमा कसैले शङ्का गरेन । प्रत्यक्षदर्शी यूहन्नाले गवाही दिएका छन् कि एक जना सिपाहीले येशूको कोखामा घोच्दा रगत र पानी निस्क्यो (यूहन्ना १९:३४) । यसले येशूको फोक्सोले काम गर्न छाडेकोले श्वास अवरोधबाट उहाँको मृत्यु भइसकेको थियो भनी देखाउँछ ।   क्रूसमा टाँगिएको व्यक्तिलाई चाँडै मृत्युको मुखमा पुर्‍याउन खुट्टा भाँच्ने गरिन्थ्यो । तर येशूको मृत्यु भइसकेकोले सिपाहीहरूले उहाँको खुट्टा भाँचेनन् (यूहन्ना १९:३३) । येशूको मृत्यु भएको पक्का थाहा भएपछि मात्रै पिलातसले उहाँको मृत शरीर योसेफलाई लैजाने अनुमति दिए (मर्कूस १५:४५) ।   

३. चेलाहरूले वास्तवमै पुनरुत्थान हुनुभएका येशूलाई देखे ।

यदि येशू ख्रीष्ट केवल बेहासीपश्चात् चिहानबाट आउनुभएको थियो भने उहाँमा शारीरिक कमजोरीहरू हुनैपथ्र्यो । तर पुनरुत्थानपश्चात् उहाँका विभिन्न प्रकटीकरणका विवरणहरूमा यसको कुनै सङ्केत पाईंदैन । पुनरुत्थानपश्चात् येशूका प्रकटीकरणहरूलाई चेलाहरूले वास्तविक बौरी उठाइको रूपमा बुझेका थिए । येशू बेहोस भएर चिहानबाट फर्कनुभएको थियो भनी तिनीहरूले कल्पनासमेत गरेका थिएनन् । चेलाहरूले रगताम्मे, शरीरभरि चोट लागेका, औषधीको खाँचोमा परेका येशूलाई देखेनन् । त्यस्तो दृश्यले तिनीहरूलाई कहिल्यै बदल्दैनथ्यो । तिनीहरूले मृत्युमाथि विजय हासिल गर्नुभएका येशूलाई देखे जसले तिनीहरूलाई सदाको निम्ति परिवर्तन गरिदिनुभयो ।

४. येशूको चिहान रुँग्न पहरेदारहरूको एउटा दल खटाइएको थियो ।

येशूलाई जुन चिहानमा राखिएको थियो त्यसको मुखमा एउटा ठुलो ढुङ्गो राखिएको थियो जसमा छाप लगाइएको थियो । पहरेदारहरू चिहानको सुरक्षाको लागि खटिएका थिए । मर्नै लागेको मान्छेले कसरी चिहानको विशाल ढुङ्गोलाई हटाउन सक्छ ? कसरी येशू ती पहरेदारहरूबाट उम्केर आउन सक्नुहुन्थ्यो ? के येशूको मृत शरीर कुनै पनि तरिकाले त्यहाँबाट गायब नहोस् भनेर पहरेदारहरू सजग थिएनन् र ?

५. थुप्रै गैरख्रीष्टियान लेखकहरूले क्रूसारोहणबाट येशूको मृत्यु भएको साक्षी दिएका छन् । 

येशूको क्रूसारोहणको निम्ति हामीसँग चार ओटा सुसमाचारीय श्रोतका अतिरिक्त थुप्रै गैरख्रीष्टियान श्रोतहरू पनि छन् । उदाहरणको लागि रोमी इतिहासकार टासिटसले बताए कि येशूले “तिबेरिअसको शासनकालमा चरम दण्ड भोग्नुभयो ।” यहूदी इतिहासकार योसिफसले अभिलिखित गरेका छन् कि पिलातसले “उहाँ [येशू] लाई क्रूसारोहणको निम्ति सुम्पिदिनुभयो ।” सामोसाटाका ग्रिक व्यङ्ग्यकार लुसियनले क्रूसारोहणलाई उल्लेख गरेका छन् । मारा बार सेरापियोनले येशूलाई मृत्युदण्ड दिइयो भनी बताएका छन् । यहूदी ताल्मुडले पनि अभिलिखित गरेको छ, “येशू झुण्डयाइनुभयो ।”

येशूको पुनरुत्थानसित सम्बन्धित सबै विवरणहरूलाई एकत्रित गरी तिनको विश्लेषण गर्दा मुर्छाको सिद्धान्त जाँच पडतालमा खडा हुन सक्दैन । यो तर्कसङ्गत व्याख्या हुन सक्दैन । येशू क्रूसबाट उम्कन सक्नुहुन्थेन । उहाँ मर्नुभयो । येशू वास्तवमै मर्नुभएको थियो भनी आधुनिक डाक्टरहरू पनि सहमत छन् । तिन जना डाक्टरहरूले निकालेको निष्कर्ष यस्तो छ, “स्पष्टत:, ऐतिहासिक र चिकित्सकीय साक्षीले अङ्कित गर्छ कि उहाँको दायाँपिट्ट भएको चोटलाई खलबल्याउनुअगि उहाँ मरिसक्नुभएको थियो र उहाँको दायाँ करङको बिचमा घुसारिएको भालाले सम्भवत: दाहिने फोक्सोलाई मात्र छेडेन तर मुटुको थैली र मुटुलाई नै छेड्यो जसबाट उहाँ निश्चित तवरले मर्नुभएको थियो भन्ने परम्परागत दृष्टिकोणलाई पनि यसले समर्थन गर्छ । तदनुसार, येशू क्रूसमा मर्नुभएन भन्ने अनुमानमा आश्रित अर्थ खोलाइहरू आधुनिक चिकित्सकीय ज्ञानसित बेमेल देखा पर्छन् ।”

Leave Your Comments Here.