आत्महत्या गर्न तम्सेका टाल्सटाय ख्रीष्टको शिक्षाबाट प्रभावित भए

लिओ टाल्सटाय विश्व साहित्यमा एक ओजस्वी नाउँ हो । रुसी उपन्यासकार टाल्सटायलाई एक महानतम स्रष्टाको रूपमा आदर गरिन्छ । वार एन्ड पिस र अन्ना करेनिना नामक दुई ओटा शक्तिशाली उपन्यासका लागि तिनी विख्यात छन् । तिनका कृतिहरूले तिनको जीवन कालमा मात्र नभएर अनुगामी इतिहासमा पनि विचारणीय प्रभाव पारेका छन् ।

ख्रीष्टाब्द १८२८ मा रुसमा जन्मेका टाल्सटायले दुई वर्ष नपुग्दै आफ्नी आमा गुमाएका थिए । कुलीन परिवारमा जन्मेका टाल्सटायले उपन्यास अन्ना करेनिनालाई पूर्णता दिएसँगै तिनी आत्मिक सङ्कष्टको भूमरीमा जेलिए । तिनी निकै निराश भए । जीवनको उद्देश्य प्राप्तिको लागि तिनले सङ्घर्ष गरे । अन्तत: आत्महत्या गरी आफ्नो जीवनलाई पाखा लगाउने विचार गरे यी विख्यात उपन्यासकार टाल्सटायले । तर तिनी रोकिए । 

ख्रीष्टाब्द १८७९ मा तिनी ख्रीष्टियमतमा  आए । ह्वाट आई बिलिभ नामक आफ्नो पुस्तकमा तिनले खुला रूपमा ख्रीष्टियान विश्वासलाई स्वीकार गरेको तथ्यलाई अभिलिखित गरेका छन् । तिनले येशू ख्रीष्टको शिक्षामाथि विश्वास गरे, खास गरी तिनी डाँडाको उपदेश (मत्ती ५–७) बाट औधी प्रभावित भएका थिए । 

आर्थिक भौतिकबाट नभई मानवीय स्वभावको असल अवस्थालाई वृद्धि गरेर सिद्ध समाजको स्थापना गर्न सकिन्थ्यो भन्ने टाल्सटायको विचार रहेको थियो । तत्कालीन रुसी अर्थोडक्स मण्डलीसित तिनको पूर्णत: सहमति नभए तापनि ख्रीष्टको शिक्षाको सारमा तिनी रमाएका थिए ।  

Leave Your Comments Here.