के येशूको पुनरुत्थानपश्चात् उहाँलाई देख्नेहरू दृष्टि भ्रममा परेका थिए ?

ख्रीष्टियमतको कुनेढुङ्गोको रूपमा लिइएको येशूको शारीरिक पुनरुत्थानलाई लौकिक दृष्टिकोणबाट व्याख्या गर्न क्रूसका वैरीहरूले विभिन्न परिकल्पनाहरू अगाडि सारेका छन् जसमध्ये एक हो— दृष्टि भ्रमको सिद्धान्त । नयाँ करारअनुसार पुनरुत्थानपश्चात् येशू विभिन्न मानिसहरूकहाँ देखा पर्नुभयो । जो जतिले येशूलाई देखे तिनीहरूले वास्तविक येशूलाई नदेखेर तिनीहरू दृष्टि भ्रममा परेका थिए भनी यो सिद्धान्तले बताउँछ । उन्नाइसौँ शताब्दीको पूर्वाद्धमा डेभिड स्ट्राउसले यसलाई प्रतिपादन गरेका थिए । यस परिकल्पनाको खण्डन गर्ने विभिन्न तर्कहरूमध्ये यहाँ हामी ५ ओटालाई ध्यान दिनेछौँ ।

१. पुनरुत्थानपश्चात् येशूलाई देख्ने मानिसहरू धेरै थिए ।

दृष्टि भ्रम निजी, व्यक्तिगतसाथै आत्मपरक अनुभव हो । एकै चोटि धेरै मानिसहरू एउटै कुरामा दृष्टि भ्रममा पर्दैनन् । येशू विभिन्न मानिसहरूकहाँ देखा पर्नुभयो: मरियम मग्दलिनीकहाँ (यूहन्ना २०:११–१८); स्त्रीहरूकहाँ (मत्ती २८:८–१०); पत्रुसकहाँ (१ कोरिन्थी १५:५); दुई जना चेलाकहाँ (लूका २४:१३–३२); १० जना प्रेरितकहाँ (यूहन्ना २०:१९–२५); ११ जना प्रेरितकहाँ (यूहन्ना २०:२६–२८); सात जना चेलाकहाँ (यूहन्ना २१:१–१४); ५०० जनाकहाँ (१ कोरिन्थी १५:६); याकूबकहाँ (१ कोरिन्थी १५:७); आफ्ना चेलाहरूकहाँ (प्रेरित १:३–८) । यति धेरै मानिसहरू उही कुरोमा भ्रममा परे भन्ने व्याख्यालाई मनोवैज्ञानिकहरूले स्वीकार गर्दैनन् ।

२. ५०० जना मानिस उही कुरोमा एकै चोटि दृष्टि भ्रममा पर्दैनन् ।

पुनरुत्थानपश्चात् येशूका प्रकटीकरणहरूलाई सूचीकृत गर्ने क्रममा प्रेरित पावल लेख्छन्, “त्यसपछि उहाँ [येशू] एकै समयमा पाँच सयभन्दा बढी भाइहरूकहाँ एकसाथ देखा पर्नुभयो, जसमध्ये धेरैजसो अहिलेसम्म छँदैछन् तर कोही–कोही सुतिसकेका छन्” (१ कोरिन्थी १५:६) । एकै चोटि उही ठाउँमा पाँच सय जनाभन्दा बेसी मानिसहरूले पुनरुत्थान हुनुभएका येशूलाई देखे भनी पावल बताउँछन् । यदि पावलले काल्पनिक कुरो लेखिरहेका थिए भने तिनको लेखलाई सजिलैसित खण्डन गर्न सकिन्थ्यो किनकि येशूलाई देख्नेहरूमध्ये धेरै जना जीवितै थिए जसकहाँ गएर यथार्थताबारे सोध्न सकिन्थ्यो । अनुसन्धानपश्चात् नास्तिकवादबाट ख्रीष्टियान बनेका लि स्ट्रोबेलले भनेका छन्, “येशूको मृत्युपश्चात् ५०० जना मानिसहरूले उहाँलाई देखेको दाबी कतै दृष्टि भ्रम त होइन भनेर एक जना मनोवैज्ञानिक मित्रकहाँ गएर सोधेँ मैले । दृष्टि भ्रमहरू व्यक्तिगत घटनाहरू हुन् भनी तिनले बताए । यदि ५०० जना मानिस उही कुरोमा दृष्टि भ्रममा परे भने त्यो [येशूको] पुनरुत्थानभन्दा ठुलो आश्चर्यकर्म हुन जान्छ ।”

३. दृष्टि भ्रम केही सेकेन्ड वा मिनेटसम्म मात्र लम्बिन्छ ।

दृष्टि भ्रम घण्टौँसम्म लम्बिदैन । येशू सुटुक्क कोही एक वा दुई जनाकहाँ मात्र देखा परेर स्वर्ग जानुभएन । उहाँ चालिस दिनसम्म विभिन्न थरीका मानिसहरूकहाँ देखा पर्नुभयो, “आफ्नो दु:ख–भोगपछि धेरै अकाटय प्रमाणद्वारा तिनीहरूका सम्मुख उहाँ [येशू] ले आफैलाई जीवित प्रस्तुत गर्नुभयो । चालीस दिनसम्म उहाँ तिनीहरूकहाँ देखा पर्नुभयो अनि परमेश्वरका राज्यको विषयमा तिनीहरूलाई बताउनुभयो” (प्रेरित १:३) ।

४. दृष्टि भ्रमले खाँदैन ।

कम से कम दुई ओटा अवसरमा पुनरुत्थान हुनुभएका येशूले केही न केही खानुभएको छ ।

येशू चेलाहरूकहाँ देखा पर्नुभएपछि तिनीहरू डरले आत्तिए र तिनीहरूलाई येशू प्रेतजस्तो लाग्यो । तर आफू प्रेत नभएको र वास्तवमै पुनरुत्थान भएको पुष्टि गर्न उहाँले तिनीहरूलाई प्रश्न गर्नुभयो, “के तिमीहरूसित यहाँ केही खानेकुरो छ ?” चेलाहरूबाट उहाँले पकाएको माछाको टुक्रा “लिएर तिनीहरूकै सामुन्ने खानुभयो” (लूका २४:३६–४३) ।

अर्को अवसरमा येशू तिबेरियास समुद्रको छेउमा सात जना चेलाकहाँ देखा पर्नुभयो जहाँ येशूले तिनीहरूसँगै खानपान गर्नुभयो (यूहन्ना २१:१–१४; प्रेरित १०:४१) ।

यदि येशूका चेलाहरूले जे देखिरहेका थिए त्यो केवल तिनीहरूको दृष्टि भ्रम थियो भने भ्रमले कसरी खान सक्छ ?      

५. दृष्टि भ्रमले रित्तो चिहानलाई व्याख्या गर्न सक्दैन ।

चेलाहरूले त्यही ठाउँमा साहसपूर्वक येशूको पुनरुत्थानको घोषणा गर्न थाले जुन ठाउँमा येशूलाई गाडिएको थियो । यदि येशूका सबै प्रकटीकरणहरू दृष्टि भ्रम थिए भने येशूको मृत शरीर अरिमाथियाका योसेफको चिहानमा नै हुनुपथ्र्यो । पुनरुत्थानको विषयमा चेलाहरूको प्रवचनलाई सुन्नेहरूले येशूको मृत शरीरलाई देखाई सजिलैसित चेलाहरूको खण्डन गर्न सक्थे । तर कहिल्यै त्यसो भए ।

येशूको पुनरुत्थानसित जोडिएका सबै विवरणहरूलाई विश्लेषण गर्दा दृष्टि भ्रमको परिकल्पना बौद्धिक वृत्तमा टिक्न सक्दैन । मनोवैज्ञानिक गेरी कोलिन्सको भनाइसँगै हामी यस आलेखलाई निष्कर्षमा ल्याउँछौँ, “दृष्टि भ्रमहरू व्यक्तिगत घटनाहरू हुन् । तिनको स्वभावको कारणले केवल एक जना व्यक्ति एउटा समयमा दृष्टि भ्रममा पर्न सक्छ । निस्सन्देह, ती मानिसहरूको समूहद्वारा देख्न सकिने कुरो होइन । ... दृष्टि भ्रम केवल आत्मपरक, वैयक्तिक अर्थमा अस्तित्वमा हुने भएकोले यो प्रस्ट छ कि अरूहरूले यसलाई देख्न सक्दैनन् ।”      

       

       

Leave Your Comments Here.