२,६०० वर्ष पुरानो बाइबलीय पात्रको नाउँ उल्लिखित छाप पत्ता लाग्यो

यहूकल बाइबलको पुरानो करारमा उल्लिखित एक जना दरबारिया कर्मचारीको नाउँ हो । बाइबलमा तिनको नाउँ केवल दुई पटक उल्लेख भएको पाइन्छ (यर्मिया ३७:३ र ३८:१) ।

यर्मिया ३७:३ मा लेखिएको छ, “सिदकियाह राजाले शेलेम्याहका छोरा यहूकल र मासेयाहका छोरा सपन्याह पूजाहारीसित यर्मिया अगमवक्ताकहाँ यसो भनेर पठाए, ‘हाम्रा निम्ति परमप्रभु हाम्रा परमेश्वरलाई प्रार्थना गरिदेऊ’ ।” दोस्रो खण्डले भन्छ, “मत्तानका छोरा शपत्याह, पशहूरका छोरा गदल्याह, शेलेम्याहका छोरा यहूकल र मल्कियाहका छोरा पशहूरले यर्मियाले सबै मानिसहरूलाई यसो भन्दै गरेका सुने” (यर्मिया ३८:१) । यी दुई ओटा खण्डहरूबाट प्रस्ट छ कि ५८६ ख्रीष्टपूर्वमा बेबिलोनीहरूद्वारा यरूशलेमको मन्दिर नाश गर्नुअगि यहूकल यहूदाका राजा सिदकियाहको दरबारमा काम गर्ने गर्ने एक वरिष्ठ कर्मचारी थिए ।

ख्रीष्टाब्द २००५ मा पुरातत्त्वविद् इलट मजारले दाऊदको सहरमा उत्खनन गर्ने क्रममा माटोको एउटा छाप फेला पारिन् जसमा “सेभीका छोरा शेलेम्याहका छोरा यहूकल” भनेर लेखिएको छ । यो छैटौँ शताब्दी ख्रीष्टपूर्व अर्थात् आजभन्दा २,६०० वर्ष पुरानो छाप हो जुन समयमा बाइबलीय यहूकल यस धरतीमा बाँचेका थिए ।

बाइबलका आलोचकहरूले बाइबलको ऐतिहासिक विश्वसनीयतामाथि आशङ्का गर्दै आएको भए तापनि यो खोज बाइबलीय पात्रको पुष्टि गर्ने दरिलो प्रमाण हो । पुरातात्त्विक खोजबाट पुष्टि भएका बाइबलका थुप्रै पात्रहरूमध्ये एक हुन्, यहूकल । यस खोजले बाइबलीय अभिलेखको ऐतिहासिक सच्चाइलाई थप प्रमाणित गर्ने काम गरेको छ ।      

Leave Your Comments Here.